Read Kok Borok PHRWNGMUNG 2 Bible Online

PHRWNGMUNG 2 - Kok Borok bible

PHRWNGMUNG 2

¹Angsla, nwng ani kókrokno khunju kan khe tei ani dagimarokno nini bwkha-o chu khe,

²tumung nwng simungno khunju kai khe tei nini bwkha bai kaichom khe;

³tumung nwng mokol kiyokna bagwi káphra khe tei sinani bagwi khorang socha khe;

⁴tumung nwng bono rukphaino naituk tẃi naituk khe tei rang gola naituk tẃi khe naituk khe

⁵hakhe nwng Subraiyungno bórom khlaina sinai, phiya Kaitorni simungno mannai.

⁶Tamni hwn ba Subraiyung se simung rwnai; bini búkhúkni se simung tei elem ongkhoro;

⁷bo borok sutrangrokni bagwi kaham elem khati-o; srai-srai khe tongnairokni bagwi bo se phui wngo,

⁸buj tẃinairokno hamyani kati rwui bono mwrwgwi bini kók khnanai bororokni bagwi lama wngo.

⁹Hakhe nwng sóino tei buj tẃimano buchinai; phiya bujsóino tei lama kahamno saui mannai;

¹⁰tamni hwn ba, nini bwkha-o elem phainai tei simung nono bwkha tongthok rwnai;

¹¹nini kaham-hamya uansukmung nono mwrwgwi tongnai; a simung-no nono mwrwknai.

¹²Abo borok cha yarokni lamani tei kók hamya sanairokni yakni nono phiyóknai,

¹³bórok mwnak lama-o himna bagwi borok kahamrokni lamano khibinai,

¹⁴samung hamya khlaiwi tongthokjaknairok hamya chap laima-o tongthokjago;

¹⁵lama kokoi-o himnairok sakni tongmung bai’-no lama korójak.

¹⁶Nwng a bwrwi baliknaini yakni phiyókjaknai, uaijanairokni kók kwtẃi samarokni yakni yóknai,

¹⁷bo sikla phuruni mángsongno tei swmai tangmano khibi-o.

¹⁸Tamni hwn ba bini nok lama le thwina lama-o thángma se, aro thángma le morke phaising thángma lama se;

¹⁹bini thani thángnairok bórok tei kiphilwi phai ya, tei thangna lamabo man phi ya.

²⁰Aboni bagwi borok kahamrokni lama tẃi him di tei borok sóirok tong tẃi tong di.

²¹Tamni hwn ba borok sutrangrok ha-o tongnai, koinenerok aro tong phlainai;

²²tamo khe borok hamyarok khe hani rwkhlaijaknai tei bandinairok aroni phuichaui khibijaknai.