Read Kok Borok PHRWNGMUNG 25 Bible Online

PHRWNGMUNG 25 - Kok Borok bible

PHRWNGMUNG 25

¹Omo wng kha Judiani habugra Hejekiani bororok Solomonni kók phrwngmarokno swiwi narwkmani. Manwirokno kholobwi tonma wng kha Kaitorni chẃngsacha tei naitugwi

²naimarok wng kha habugrani bagwi chẃngsacha.

³Nokha chukma haino tei twijlang thuk tẃi’-no habugrarokni bwkhanobo saui man ya.

⁴Rukphai bisingni tei kubun manwino tikhlai pái di, taknaisa abo bai naithok manwi tagwi mano;

⁵habugrani bwskangni borok hamyano nor di, hakhe bini achukthayung bujsói bai khe songchajaknai.

⁶Habugrani bwskango sakno kotor khe ta phunuk di eba tei borok kotorrokni bwskango tor-rere khe ta bacha di;

⁷tamni hwn ba borok kotorrokni bwskango lachi rwjakmani slái “Oro bachaui phai di” hwnjakmani abo se hamo. Nini mokol bai nukmasing

⁸dodro-dodro buj thumthani ta tubu di; yagulo nini nok arini borok nono lachimung rw khe nwng tamo khlainai?

⁹Nini nok arini borok bai pháng-pháng khe sa lai di tei khoroksani kók huijakno tei khoroksani thani khupro-ui ta saui di;

¹⁰wng ya khe nini kók khnanairok nono lachi rwnai tei nini mung hamya wngmani tei hujagwi tháng glak.

¹¹Sói jora-o gothok rwui kók sama le, rukphai bai naithok khe snamjak manwi saka-o rangchakni bwthái berajak hai.

¹²Rangchakni longphu tei uakhumrok haino, khunju kaichomnaini thani siyan gwnang khorainaini kókbo abo hai’-no klai-o.

¹³Mai rama jora telekar kothor kwsap wng tẃi, kók tunnaisa kahambo abo haino bini bugrani bwkhano kwchang rw-o.

¹⁴Buino yapharna hwnwi kók kotor kotor saui yaphar yarok khe uatwi phai ya siyari tei nokbar hai.

¹⁵Thamchi tung ya khe tongwi man khe tẃiphangno sakni kók khna rwui mano tei kók kwchang hwn khe bekreng swbaiwi mano.

¹⁶Tumung nwng piya bwtwi man khe, nwng cháui manma swk simi chá di, bára chá khe nwng kwbanai se.

¹⁷Nwng nini nok arini nogo tháng máng ta tong di, wng ya khe bo nono naislerjaknai se.

¹⁸Nok arini borokni bagwi tatal khe kók sanai wng kha, chobani makal tei seng kubuk hai se.

¹⁹Digi-sigi phuru poito khlai man ya borokno bwkha berama le bua kwrwino eba yakung man yani thani bwkha berama hai se.

²⁰Bwkha báijakni thani rwchabwi khna rwma le abo masing jora-o kamchwlwi khukjak eba kwsa-o sóm rwjak tẃi se klai-o.

²¹Nini kena arirok ok khuijak khe bono chámung rw di, twi kangjak khe bono twi khan rw di;

²²hakhe nwng bini bokhorogo hokhi jolo-jolo beraui rwma hai wngnai tei Subraiyung nono sokat rwnai.

²³Salsibaini nokbar uatwi tubu tẃi khe uklogo hunu-hanai samabo joliui naisik rw-o.

²⁴Bwrwi uálai kwrak bai nok thansa khe tongma slái saichung susuk khe núkhung khungchi-o tongma phano hamo.

²⁵Hakchalni hani kóktma kaham sók phaima abo twi kangjak borok twi kwchang ma nwng tẃi se.

²⁶Sumsogo klaijak borok kahamrok le rumu-ui thángjak twimuk chersajak twi hai se.

²⁷Belai khe piya bwtwi cháma khe hamya tei bórom manna saka manna muchungmabo hamya.

²⁸Sak soiwi tongwi man ya bororok le katijaknai kwrwi chokdeual báijak kamiyung hai se.