Read Kok Borok PHRWNGMUNG 27 Bible Online

PHRWNGMUNG 27 - Kok Borok bible

PHRWNGMUNG 27

¹Thinangni kókno tẃi kung ta chuk di, tamni hwn ba thinango tamo wngno nwng si ya.

²Bui se nono bólai thung, nini baithangni khúk sakno ta bólai thung au, bui se bólai thung.

³Holong khe hiligo hasing teibo hilik, tamo khe butuano thamchi kasa rw khe a mungnwirokni slái’-bo abo hilik kugo.

⁴Jolima-o le khairokma kwrwi, thamchi tungma khe twi kotor hai, tamo khe sabo músúma bwskango bachaui tongwi mannai?

⁵Bwkha bisingo simi hamjakmani slái le pháng-pháng khe kulma se cha kugo.

⁶Kena ari kwbángma bandiui motom su-ui mano, tamo khe kiching bu phano aro kók narwkma tongo.

⁷Ok kupulung hwn khe piya bwtwibo chána muchungjak ya, tamo khe ok khuijak borok le kwkhanobo kwtẃi wngjaknai.

⁸Nok khibiui ongkhorwi berainai borok le tok masa bothopni ongkhorwi thángnai hai.

⁹Thok motom tei satrai motom bwkhano srang rw-o tei kiching bwkha rwui kókbiti rwmabo abo hai’-no kwtẃi.

¹⁰Nikichingno tei nwphani kichingno ta yakar di; digi-sigi manjak phuru nini takhukni nogo ta tháng di. Hakchalo tongnai nini sandaini slái nok ganani borok se cha kugo.

¹¹Angsla siyan gwnang wng di tei ani bwkha tongthok rw di, hakhe ano tentainairokno ang kók saui man anw.

¹²Hus gwnang borok khe dob nuk khe kháro; tamo khe butua khe haino swkangwi thángo tei aboni bagwi tekto ma manjago.

¹³Sini ya borokni[8] bagwi bachanaini ríno na di; buini hani borokni bagwi bachana khe bono’-no kók rwmani mari khe na di.

¹⁴Phung aidrobo bini nok ganani borokno chirigwi hamari rw khe abo swraimung se hwnwi romjaknai.

¹⁵Hik kók khna ya le basal phuru uatwi rup-rup khe cho yaui phai tẃi se;

¹⁶bono kasuma mwthakna naima le abo nokbarno kasu tẃi se tei thokno yagra yak bai mochomna naima hai se.

¹⁷Sor bai sorno hului buk rw tẃi’-no borok khoroksa tei khoroksano snamwi ma tisa-o.

¹⁸Khwichang buphangno naikolnai borok’-no khwichang bwtháino ma chá-o tei bubagrano monnai khe bo bórom khlaijago.

¹⁹Twi-o mwkhangni sampili nuk tẃi’-no borok khoroksani tongmungno sakni tongmungno romwi mano.

²⁰Morke bai kwthwini ha tei ok pungjak ya wngma hai’-no borokni mokolbo tei nai sini naiwi akaijak ya.

²¹Rangchak bai rukphaino hór bai se chánai-o tei borok khe bini bólaijakmano naiwi se chánaijago.

²²Butuano sukhrupjaknai bai sukhrup phano tei mai súkjak bai baksa khe súk phano, bini butua wngma le kwrwk glak.

²³Nini mera bodolrokno kaham khe saui man di tei mal-matarokno kaham khe mokol kai di;

²⁴tamni hwn ba rang-rírok le tong phlainai ya, bugrani motokbo kusung kusung bosong mareui tong phlainai ya.

²⁵Samrok pái tháng khe sam phang kwtalrok achai phiro tei hathái sakani samrok rajago,

²⁶mera bwsarok nono rí-chum rwnai tei punrok khe nini hani banta rang wngnai.

²⁷Nini tei nini núkhungni bororok chána bagwi nwng mojomo pun abuktwi mannai, nini sikla selengjwkrokbo abo bai sak kaham tongnai.