Read Kok Borok PHRWNGMUNG 28 Bible Online

PHRWNGMUNG 28 - Kok Borok bible

PHRWNGMUNG 28

¹Borok hamya le bono riphriknai kwrwi phano kháro, tamo khe borok kahamrok le singho hai bwkha kotor.

²Hani bororok sumsok khlai khe aro tẃiphang kwbángma wngo; tamo khe siyan kwrwng tei buchinairok tong khe a ha-o sal kwdwkma khe tei kwrak khe tongwi tongo.

³Bigra tẃiphang twtwi bigrarokno sátoknai, bo wng kha mai-khulrok kochok rwui tlangnai uatwi hai.

⁴Subraiyungni kerong-raidarokno khibinairok khe borok hamyarokno bólai-o, tamo khe abono rákhogwi tongnairok khe borok hamyarokno kebengwi bacha-o.

⁵Borok hamyarok bujsóino si ya, tamo khe Subraiyungni muchung tẃi tongnairok khe abono srai-srai khe buchiui mano.

⁶Rang gwnang wngwi lama kokoi tẃi himmani slái, bigra wngwi kók narwknai borok wngma se ham kugo.

⁷Kerong rákhoknairok khe siyan kwrwng bwsa, tamo khe chákrak-nungkrakrok bai kwthanai bwsa khe ma-phani mwkhang sógo.

⁸Buini rang bwsa tei yak bára naui gwnang khanaisani rang abo kwrwirokno khairoknai khoroksa swkni yago sógwinai.

⁹Kerongni kókno khna tw tẃi abono rákhogwi tong ya khe a borokni surimung suda selengjaknai.

¹⁰Borok kahamno lama hamya-o tlangnai borok bo sak-sakno baithang khurma hakhoro klainai, tamo khe khait kwrwi borok khe hamari mannai.

¹¹Gwnangsa sak-sakno siyan gwnang hwnwi chongo, tamo khe siyan gwnang bigrasa khe bo a gwnangsano sói khe romwi mano.

¹²Borok kahamrok tẃiphang wng khe lukurok tongthokjago tei borok hamyarok kuchugo ka khe lukurok huijago.

¹³Sakni sumsokrokno huinai borok bo hamwi man ya, tamo khe abórokno gosiui yakarnai borok bo khe khairokjaknai.

¹⁴Subraiyungno kiri máng tongnai borokno hamchajak; tamo khe bwkha ragwi tongnai borok bo khe báiwi klainai.

¹⁵Singho sokromjak hai tei akarjak gong hai se borok hamya tẃiphang le bigrarokni bagwi wngo.

¹⁶Tẃiphang butua hwn khe, khairokma kwrwi tei sátoknai wngo; tamo khe bujsói tẃi yarokno naislernai khe ayuk kolok khe ma tongnai.

¹⁷Tumung khoroksa swk borok butharwi uanaui hángchaui tong khe a borok butharnaisa thwi ya sak khárwi ma tong thung; bono khoroksa phano ta chuba thung.

¹⁸Kók bai tongmung bai gothokjak khe tongnairok khe yóknai, tamo khe lama hamya-o himnai khe hakhoro klainai.

¹⁹Sakni bari-okthai-o samung tangnai borokni chámung biyal wng glak, tamo khe betha yarokni utung-utung wngnairok khe katswi biyal wngnai.

²⁰Kók narwknai bororok khe kwbángma hamari mannai, tamo khe doui gwnang wngna muchungnairok sátokjak yaui tong glak.

²¹Yasa babai simi wngwi buj thumma cha ya, abo hai khlainairok mai khopsani bagwi suda cha ya khlaiwi mano.

²²Rang-rí khichiknai borok aboni uklogo doui thángo, bo bigra kha se khanai abono saui man ya.

²³Búkhúk bai simi tatal khe bólainaini slái khorainai borok bo ulo teibo khásukjaknai.

²⁴Ma-phani rang-rí segwi naui, “Omo le cha ya wng ya” hwnnai borok dagaitni pal se.

²⁵Khámainaisa khe uálaimungno khursa-o, tamo khe Subraiyungni thani bwkha beranai borok khe hamchanai.

²⁶Sak sakni buchima-o bwkha beranai borok wng kha butua; tamo khe siyan tẃi tongnai yógwi tongnai.

²⁷Bigrarokno rwnaisa bini mungsa biyal wng glak, tamo khe abono nuk tw tẃi nuk ya khe tongnairok khe belai khe bati nangnai.

²⁸Borok hamyarok tẃiphang wng khe lukurok ma huijago; tamo khe bórok komor khe Kaitorno kirinairok bángo.