Read Kok Borok PHRWNGMUNG 3 Bible Online

PHRWNGMUNG 3 - Kok Borok bible

PHRWNGMUNG 3

¹Angsla, ani phrwngmano ta pok di, tamo khe nini bwkha-o ani dagimarokno ton di;

²ahai khe nini umor kolok wngwi tongnai tei nwng belai khe hamchanai.

³Kók khnaui tongmani tei kók narwgwi tongmani tongmungno ta khibi di; abórokno nwng kotogo kanwi ton di tei nini bwkha-o swiwi ton di.

⁴Hakhe nwng Kaitor bai tei borok bai khá phurjaknai tei kaham hwnjaknai.

⁵Bwkha rw súgwi Subraiyungno poito khlai di tei nini sak-sak sima-o bwkha ta bera di.

⁶Bebago’-no nwng bono bwskango ton di, hakhe bo nini lamarokno kepleng khlainai.

⁷Sakno sinai hwnwi ta nuk di; Subraiyungno kiri di tei hamyani kiphil di.

⁸Abo nini bwsakno kaham khlainai tei nini bekrengno rak rwnai.

⁹Subraiyungno nini manwi kaham kuk bai tei bebak nini tháiswkangrok bai bórom khlai di;

¹⁰hakhe nini mayamnok mai bai kupulung wngnai tei nini angur bwtwi kupulung wngma bára se beglaiwi klainai.

¹¹Sajla, Subraiyung phrwngmano ta nor di tei bo khoraimano bwkha-o tẃi tong di,

¹²tamni hwn ba bupha bini hamjak kukma bwsano khorai tẃi se Subraiyung bo hamjakma borokno khorai-o.

¹³Elem tei simung mannai borok bo hamchajak,

¹⁴tamni hwn ba, a borok manma le rangchak tei rukphai manẃi chamani slái se cha kugo.

¹⁵Abo, holong kwchẃngrokni slái se nang kugo tei bo nwng naimani mungsa bai phano su thai kwrwi.

¹⁶Umor kolok bini yagra yago tongo; tei yaksi-o khe gwnang wngna bai bóromrok tongo.

¹⁷Bini lamarok wng kha tongthothok tei bini lamarok wng kha tong kwchangni lama.

¹⁸Bo wng kha bono romnairokni bagwi langmani buphang; bono kwrak khe romnairok hamchajak hwnjago.

¹⁹Subraiyung, bini elem bai o hano snam kha; bini simung bai nokharokno songcha kha;

²⁰bini elem bai ha kuthukrokni twi tikhlaiwi tubu-o, tei chumuirokni pantwirok khiklai-o.

²¹Angsla, abórok nini bwskangni yógwi ta tháng thung, nwng abono ta yakar di.

²²Tei abórok nini bagwi mwthangwi tonnai tei nini kotokni naithok madwlwi hai wngnai.

²³Hakhe nwng nini lama tẃi mungsa kirina kwrwi khe thángwi mannai tei nini yakung mungsa-o thutai glak.

²⁴Achugwi tong phuru nwng kirina nang glak tei thu phurubo muktrwi kaham mannai.

²⁵Borok hamyarok achomsa khe sikirimano, eba nokbar kotor hai khe nono digi-sigi phnangna naimano ta kiri di;

²⁶tamni hwn ba Subraiyung nono kati rwui tonnai tei bo nini yaprino khẃi-o khiklai glak.

²⁷Nwng samung kaham khlaina phan tong khe chubajakna nangma bororokno chuba yaui ta tong di.

²⁸Nwng nini nok arini borokno chubaui manẃi tong khe, “Tháng di khwna phai di ang nono khwna rw anw” hwnwi ta sa di.

²⁹Nono bwkha beraui tong janai nini ganani nini nok arini borokni bagwi mungsa hamya khlaina bagwi bwkha ta chap di.

³⁰Nono uáisabo hamya khlai ya, abo hai borok bai haino kók ta báng lai di.

³¹Thamchi kutungrokno nugwi mokol ta kiyór di, eba bórok samung khlai tẃi mungsa phano khlainabo ta nai di.

³²Tamni hwn ba samung hamya khlainairokno Subraiyung naislerjago tei borok sóirokno khe bini bwkha-o tono.

³³Borok hamyarokni núkhungo khe Subraiyung swraimung rw-o, phiya ba borok kahamrokni núkhungo khe bo hamari rw-o.

³⁴Bo buino hamya sanairokno khe hamya hwno tei koineneno khe bo khá súgo.

³⁵Siyan gwnang bororok khe bórom khlaijaknai, gwdna kwrak butuarokni manthai le lachimung se.