Read Kok Borok PHRWNGMUNG 31 Bible Online

PHRWNGMUNG 31 - Kok Borok bible

PHRWNGMUNG 31

¹Omorok wng kha, Masani habugra Lamuelno buma bono phrwngmani kókrok:

²O angsla, chagwi manmani ani okni sajla, tamo?

³Nini phanno bwrwirokni bagwi ta khibi di, bórok habugrarokno sokomor kha.

⁴Lamuel, khna di, habugrarok chuak nungthai kwrwi tei tẃiphangrok phek rwnai manwirokno hamjakma cha ya;

⁵bórok nung khe raidarokno pogo tei tong kesebo tongnairokni manthaino rwna poknai se.

⁶Komorwi tongnairokno chuak rw di tei bwkha báiwi tongjaknairokno angur bwtwi rw di;

⁷bórok abono nungwi bórokni biyalni kókno tei bwkha báimano muitu ta wng thung.

⁸Sakni kókno sana rwng yarokni bagwi, kusupjakrokni manthaini bagwi nwng kók sa di.

⁹Siringcha khe ta tong di, bujsói khlai di, bigrarok tei biyalo klaijakrokni manthaini bagwi kók sa di.

¹⁰Sabo hik kaham manẃi man? Bo le morok moni-muktani sláibo morok.

¹¹Bwsai bono bwkha beraui tongo, phiya bo biyalo klai ya.

¹²Kwthang tong lang sak bo bwsaini kaham máng khlai-o, uáisabo hamya khlai ya.

¹³Bo mera buikhumu tei lilon khutwng naitugo, phiya yak srangwi samung tango.

¹⁴Bo bepar thwngnairokni rungkotor hai khe bo hakchalni chámungrok tubu-o.

¹⁵Bo hor tongsanino bacha-o tei bini nokni bororokno chámung rw-o, phiya selengjwkrokno samung phunugui rw-o.

¹⁶Bo ha painani swkang naiwi nai gra-o tei abono pai-o; bo bini yak baithang bai aro angur buphangrok kái-o.

¹⁷Bo chango rí kwrak khe kha-o tei samung kwrak tango.

¹⁸Bini samungrokni bising tẃi bo kwbáng khe ajiui manmano bo saui mano. Hor thugwibo bini chati thwi ya.

¹⁹Bo bini yak bai chókha yaktwk guri rw-o tei bini yasi bai khutwng dulo.

²⁰Bo bigrarokno yak kuar khe rw-o tei biyalo klaijakrokni thani yak phologwi yapharo.

²¹Bo bini nokni bororokni bagwi kothor kwsap klaimano kiri ya, tamni hwn ba bini nokni bebakno rí morok chum lai-o.

²²Bo sak baithangno rítrakrok tago; tei bini kanma khe kwkhrang lilon kahamni rí.

²³Bwsai bui bai kamiyungni duglamo bórijago tei tẃiphangrokni bisingo bo’-bo achugo.

²⁴Bo lilonni rí tagwi phalo tei bepar thwngnairokno chango rí khajaknairok rohoro.

²⁵Phan tei suar se bini kanmung-chummung, thinangni kókno bo uana ya.

²⁶Bo elem tẃiwi khúk pero tei khairokma gwnang khe kók sa-o.

²⁷Bo bini núkhungni kaham hamya naikolo, tei bo seler chá tẃi chá ya.

²⁸Bwsarok bachaui bini bwskango bono lobsa-o, bwsaibo bono bólai-o:

²⁹“Kwbángma bwrwirok’-no hik kaham wngo, tamo khe nwng khe abórokni bisingo kaham kuk”.

³⁰Naithothok borokno bandi-o, naithokmungbo chúk ya se, tamo khe Subraiyungno bórom khlainai bwrwi khe lobjago.

³¹Bini tangmani manthaino bono rw di, kamiyung hapsonma duglamrogo bo lobjak thung.