Read Kok Borok PHRWNGMUNG 7 Bible Online

PHRWNGMUNG 7 - Kok Borok bible

PHRWNGMUNG 7

¹Sajla, ang samani kókrokno muitu khe ton di tei ang khlai di hwnwi dagimarokno nwng bai ton di;

²ang dagimarokno khna di, ani phrwngmarokno nini mukchlwino ton tẃi khe kaham khe ton di;

³abórokno nini yasirogo khe khaui ton di tei nini bwkha-o swiwi ton di.

⁴Elemno ahai hwnwi sa di, “Nwng ani hanok,” tei buchimungno khe nini khásukni kiching hwn di,

⁵hakhe abórok bwrwi baliknairokni yakni tei kók kwtẃi saui beloknai bwrwini yakni kati rwnai.

⁶Ang ani nokni tailam tẃi naharwi tongmani,

⁷ang kwbángma siklarokni bisingo khoroksa butuasano nuk kha, a chwlasa khe siyan kwrwi,

⁸bo a bwrwi tongma ganani a lama tẃi thángwi bo bini nok lama bwkhak phérwi tháng kha

⁹aphuru khe sanja som-som, ulo khe hor thugwi mwnak saui phai kha.

¹⁰Hakhe a bwrwi bini thani phai kha, bo sak phalnairokni kanmung-chummung kanjak-chumjak, bini bwkhabo buino belokna bagwi tiyar wngjak.

¹¹Bo gelek gelek wngo tei lama korójak bwrwi; bini yapri nogo bathak ya;

¹²uáisa-uisu khe lamarogo, uáisa-uisu khe lamprarogo tei uáisa uisu khe aro-uroni lamprarogo naisingwi tongo.

¹³A bwrwi a chwla siklano kwbakchwrabwi motom su kha tei lachina mwkhang kwrwi khe sa ti kha:

¹⁴“Ang ratharmungrok ratharwi yapharna tongo tei tini khe chakmano yaphar kha;

¹⁵hakhe ang tabuk nwng bai malaina phaima se, nono jai khe naitukna phaimani, tabuk khe nono oro man kha!

¹⁶Ang ani thuyamo ha Ijipni lilonni metreng-matrang rítrak bo kha,

¹⁷ang ani thuyamno mur thok motom, aloi tei elachi thok bai khe motomsa rwui ton kha.

¹⁸Pha se phai di, chwng ai ya sakno hamjak laiwi thu lai anw; hopungno tongthok laiwi mansak tongthok lai anw.

¹⁹Tamni hwn ba ani angsai nogo kwrwi; bo hakchalma-o thángjak.

²⁰Bo bini kholjang supungwi rang tlang kha; bo tal nukson jora phai ya sak nogo kiphil glak.”

²¹Bo bini belokma Kókthái bai khe bono lon rw kha; tei bini khúk kwtẃi bai bono soi rw kha.

²²Logi logi’-no bo a bwrwini utung-utung musuk ratharna bagwi tlangjak tẃi khe tei mosok khẃi-o klaina tháng tẃi khe rwktharwi tháng kha,

²³ulo khe bini kháchúgo chakhla bai yóphlajago. Bo si yaui toksa bura thonjago nangna tháng tẃi khe tháng kha, abo bono butharnai hwnwi bo saui man ya.

²⁴Sajlarok, tabuk ani kókno khna di, ang samarokno khunju kai di.

²⁵Abo hai bwrwini bwkhak nini bwkha ta tháng thung; nwng bini lama tẃi thángwi lama ta koró twrwng di;

²⁶tamni hwn ba bo kwbángmano’-no dera rw kha tei bo bai kwbángma’-no sokomorjak kha.

²⁷Bini nok lama le butharna phaising se tlangwi thángo, bini thongar khe kwthwini thongar se.