Read Kok Borok PHRWNGNAINI 1 Bible Online

PHRWNGNAINI 1 - Kok Borok bible

PHRWNGNAINI 1

¹Omorok wng kha phrwngnaisani kókrok, bo wng kha Daudni bwsla, Jerusalemni habugra.

²Chúk ya, chúk suk ya, hwnwi phrwngnaisa sa-o, chúk ya, chúk súk ya! bebakno chúk ya, katswi chúk ya.

³O nokha tola-o borok aswk kolomtwi khiklaiwi samung tangwi tamo man?

⁴Piri kusung kusung thángo tei phai-o, tamo khe o ha le ahaino ahai tongo.

⁵Sal kasa-o tei thángo, phiya bo kasa thani doui kiphilwi thángwi aroni ahaino ahai kasa phiro.

⁶Nokbar salgra phaising sibo tei salsibai-o kitingwi thángo; tei omo hai khe sipsa te sipsa te swkango tongma-o’no tongma-o kiphilwi phai phiro.

⁷Bebak twimano twijlango thángwi klai-o, hai phano twijlang kupulung wng ya; twima yaphangrokni simi yorkhlai máng tongwi yorkhlai phlaimáng tongo.

⁸Bebakno kiting kitingwi phai-o, lengjak ya; abono sana bagwi khugo kók se kwrwi, mokol le nugwi tong phano teibo nukna muchungjago, khunjubo khna phano teibo khnanani muchungjago.

⁹Swkango wng langmarok abo wng phirnai, khlaijakmabo khlaijak phirnai; o salni tola-o kwtal hwnwi mungsa phano kwrwi.

¹⁰“Omo le kwtal” hwnwi mungsano phano sajaknai da tong? Abo swkango’-no tongo, bisi kwbángma swkango’-no tongo.

¹¹Bisi kwbángma swkangni bororokno tei muitu khlaijak ya, thinango achainai bororokno bórokni ulo achainairok muitu narwk glak.

¹²Ang kók kuthuk pírnaisa, Jerusalemo Israilrokni habugra tong phuru,

¹³ang o ha saka-o bebak wngmarokno cherwi naitugwi naina hwnwi kha chap kha; Kaitor le bororokno bwkha srang ya samung bai pái lai ya khe tongna bagwi rwui rw kha.

¹⁴O ha saka-o khlaijakma bebak samungrokno ang nuk kha; omorok bebakno chúk ya máng se; abo le nokbarno riphrik tẃi se.

¹⁵Kokoino kepleng khlaiwi man ya, ká súk yanobo ká súk rwui man glak.

¹⁶“Ani slái swkang Jerusalemo habugra wng langnairokni slái ani simung teibo bángsa kha, ani belai khe simung-rwngmung báng kha,” hwnwi ang sak-sak sa kha.

¹⁷Ang simung bai butua tamo tei kobor chama tamo sinani chong kha. Hakhe abórokbo nokbarno riphrikma hai se hwnwi ang romwi man kha.

¹⁸Tamni hwn ba siyan báng khe tektobo bángsa-o, rwngmung man khe bwkha báimabo bángo.