Read Kok Borok PHRWNGNAINI 10 Bible Online

PHRWNGNAINI 10 - Kok Borok bible

PHRWNGNAINI 10

¹Thampui kwthwi se thok motomno mwnam rwui mano; phiya kisa butua wng kheno abo simung bai bóromno dera rwui mano.

²Siyan gwnangni bwkha khe kaham bwkhak rwktharwi thángo tamo khe butuani bwkha khe hamya bwkhak thángo.

³Butuarok lama him phuru phano siyan kwrwi sijago; tei bo butua, abono jotonono saui man rw-o.

⁴Tẃiphang tumung nono jolijak phano nwng nini samungno ta yakar di, tamni hwn ba kwchang kwchang khe tong khe[3] kotor-kotor cha yarokbo nakar jago.

⁵O ha saka-o ang mungsa cha ya wngma nuk kha, tẃiphangrok omo hai cha ya khlai lai-o:

⁶Butuarok se barja kotor kotor rwjago tei gwnangrok khe achukthai hache-o achuk rwjago.

⁷Ang selengrokno korai saka-o kajak khe nuk kha tei borok kotorrokno khe selengrok hai khe yakung bai himma nuk kha.

⁸Hakhor khurnairok khe aro’-no ma klainai; tei chokdeual swbainairok khe chibuk bai sukjaknai.

⁹Holong tankhurnairok khe abo bai’-no dukhu mannai; tei buphang ra phainairok khe buphang bai’-no dukhu manna tongo.

¹⁰Tumung rua buk ya hwn khe tei huljak ya khe abo bai samung tangnani le phan kwbáng nangnai; tamo khe borok siyanno samungo thepaui samung cha-o.

¹¹Chibuk romnaisa chibukno muphunslap ya sini abo bai sukjak khe bo muphunma rwngma le mungsa chúk ya.

¹²Siyan gwnangni búkhúkni kókrok le bui bai kaham hwnjago, tamo khe butuani kók le bono so se sokomoro.

¹³Bo butua khe se kók sana chengsa-o tei páithago khe ailang-kuilang khe pái-o;

¹⁴hai phano butua khe khúk thak ya kók sa máng tongo. Tamo wngnai wng ya khoroksa phano saui mannai kwrwi, thinango tamo wngo khoroksa swkno sabo saui rwui mannai?

¹⁵Butua samung tangwi lengjago, bo aswk khe butua, kamiyungni lamano suda bo sini ya.

¹⁶Hani habugra chwrai hwn khe tei tẃiphangrokbo phung ai kheno chálaimung panda khlai khe, ham li ya!

¹⁷Hani habugra borok kotor hwn khe tei bini tẃiphangrokbo phegwi tongthokna bagwi chá ya-nung ya, tamo khe phan khanani bagwi sói jora-o chánai-nungnairok hwn khe, a ha le hamchajak!

¹⁸Selersa seler wngmani bagwi bini nokni núkhúng paui twi choroi-o tei báikhrubwi klai-o.

¹⁹Mwnwi-kelek khe tongthokna bagwi chámung ter khlaijago; angur bwtwi khe langma-o tongthok rw-o tei rang khe aswkni nangmano man rw-o.

²⁰Bwkha bising-bising phano habugrano ta swrai di, eba nini thumani thongaro tongwi gwnangrokno ta swrai di; tamni hwn ba nokha-o birnai tokrok phano nini kókno tunwi saui rwui mano.