Read Kok Borok PHRWNGNAINI 2 Bible Online

PHRWNGNAINI 2 - Kok Borok bible

PHRWNGNAINI 2

¹“Tongthokma abo tamo bubotẃi chánaiwi nai grana” hwnwi ang sak-sak sa kha. Phiya ba abobo mungsa chúk ya hwnwi saui man kha.

²“Mwnwi-kelek bo kobor chama se tei tongthok-cháthok tongwibo mungsa manna kwrwi” hwnwi ang hwno.

³Ang kwkwrwk-kwthang twtwi angur bwtwi nungwi sakno tungphla rw kha tei butua tong tẃi khe tongwi sakno tongthok rwna nai kha. O ha saka-o borokni langma le salnwi salthamni bagwi se ba, aboni bagwi siyan gwnang khe tongma de, eba butua khe tongma de kaham, abono sina nai kha.

⁴Ang samung kotor khlai kha: ang sakni bagwi nokrok tang kha tei angur bwlwngrok snam kha;

⁵ang tháiblwngrok, khum bwlwngrok snam kha tei aro juda juda bwtháini buphangrok kái kha.

⁶Buphang-uáphangrogo twi luna bagwi pukhirirok khur kha.

⁷Ang selengrok tei selengjwkrok paiwi tubu kha tei ani nogobo selengrok achai kha. Ani mal-matarok kwbángma tongo, abo ani slái swkang Jerusalemo bugra cháui thángnai bebakni slái báng kungo.

⁸Ang ha gwnangwi tongnai habugrarokni hani tei amchoini rangchak-rukphai, rang-rírok rúng kha; ani chwla tei bwrwi rwchapnairok tongo tei sak tongthok tongna bagwi kwbángma hik kotoibo tongo.

⁹Aboni bagwino ang Jerusalemo aswk tong langnairokni bere kotor kuk wng kha; tei ani simungbo ano yakarwi tháng ya.

¹⁰Ani mokol bai naiwi muchung tẃi’-no ang khlai kha; ani bwkha tongthok tẃi’-no ang tong rw kha; ang kolomtwi khiklai tangma-o ani bwkha tongthogo, omono ani tangmani manthai.

¹¹Tamo khe ang aswk samung tangmarokno tei bwswk tamo man kha abono naiwi nai khe nugo bebak se chúk ya máng, nokbarni utung-utung riphrik tẃi se, o ha saka-o mungsa phano se manna kwrwi.

¹²Hakhe ang siyan, butua tei kobor chamano tẃiwi uansuk kha; swkangni habugrarok samung khlai tẃi khe ulni habugrarokbo khlainai hwnwi chwng saui da man ba?

¹³Ulo khe ang nuk kha, mwnakni slái pohor hamo, abo hai’-no butuani slái siyanbo kaham.

¹⁴Siyan gwnangsa khe nugo, tamo khe butuasa khe mwnakma-o himgurungo. Hai phano ang saui man kha bórok khoroknwino manjakmung dalsano manjaknai.

¹⁵Hakhe ang sak-sak hai hwnwi sa kha, “Angbo a butua manjak tẃi’-no manjaknai; hakhe ang sinai wngwi le tamo manna tong ba?” hakhe omobo chúk ya hwnwi ang sa kha.

¹⁶Tamni hwn ba khoroksa phano siyan gwnang borokno eba butuano muitu khlainai kwrwi, thinangni salrogo bebakno pogwi thángjaknai. Siyan gwnangsa thwima hai kheno butuasabo thwi-o!

¹⁷Aboni bagwi ang kwthang tongmano naislero, tamni hwn ba o ha saka-o aswk tangmarok ani thani bebakno bwkha khamnani máng se; bebakno chúk ya, nokbarno riphrikma hai se.

¹⁸Ang o ha saka-o kolomtwi khiklaiwi tangwi manmarokno ang naisler kha, tamni hwn ba ang abórokno ani ulo phainairokni bagwi se yakarwi ma klangnai

¹⁹tei, bo siyan gwnang de wngno butua da wngno sabo sinai? Phiya ba ang o ha saka-o kolomtwi khiklaiwi tei ani simungno samungo thepaui manmarokni bo se nokphang wngnai. Omobo chúk yano.

²⁰Aboni bagwi ang o ha saka-o aswk samung tangmarokno kháchiching wng kha,

²¹tamni hwn ba khoroksa borok sakni simung-rwngmung tei phan bai tangmani abono khoroksa aboni bagwi tangma kwrwi tei khoroksa borokno chána bagwi yakarwi ma klango. Omobo chúkya’-no tei belai khe habo hamya.

²²O ha saka-o bororok kolomtwi khiklaiwi samung tangmani tei uanaui bo tamo man?

²³Tamni hwn ba sal brúmno bo samungo dukhu tei tekto mano; horobo bini bwkha lenglamung man ya. Omobo mungsa chúk ya.

²⁴Borokni bagwi le bini ajimani bai cháui-nungwi tongthoknano karwi tei ham kukmung kwrwi. Hai phano, ang saui man kha, omobo Kaitorni aroni se phai-o;

²⁵bono[1] karwi sabo cháui mannai tei tongthogwi mannai?

²⁶Tamni hwn ba Kaitorno bwkha ham rwnairokno, bo siyan tei rwngmungrok rw-o; tamo khe sumsok gwnangrokno khe Kaitorno bwkha phur rwnairokno rwna bagwi bo rang-rí aji rw-o. Omobo chúk ya, nokbarno riphrik tẃi se.