Read Kok Borok PHRWNGNAINI 4 Bible Online

PHRWNGNAINI 4 - Kok Borok bible

PHRWNGNAINI 4

¹O ha saka-o bebak sátok-pitok wngmaroknobo ang nuk kha, kusupjaknairokni muktwino naisik di, bórokno bwkha kwchang rwnai khoroksa phano kwrwi! Bórokno sátoknairokni phan kwbángma tongo.

²Tabuk kwthang tongnairokni slái thwiwi thángnairok se kwpal kaham kuk hwnwi ang uansuk kha;

³o kwnwini slái khe tabuk phano o ha saka-o achaiwi samung hamyarokno nuk ya kho bórok se ham kugo.

⁴Ang nuk kha, bororokni rwngmung tei samung kolomtwi khiklaiwi samung tangma le nok arini bororokno músúmani aroni se phai-o. Omobo chúk ya nokbarno riphrikma hai se.

⁵Butuasa khe yakrok berebwi tongo tei sakni bahan se chá-o.

⁶Mochomnwi swkni bagwi samung khlaiwi kolomtwi khiklai nokbaro riphrikmani slái kwchang kwchang khe mochomsa manma se ham kugo.

⁷O ha saka-o ang teibo chúk ya nuk kha:

⁸Khoroksaswk katswi saichung-susuk, bwsabo kwrwi takhukbo kwrwi hai phano se bo panjalwi samung bo pái phlai ya tei bini rang-puisarokno bwkha kochomjak ya. Bo sak hai hwnwi sẃngo, “Ang saboni bagwi samung tang? Tamni ang tongthok cháthok bai sakno hakchal rwui tong?” Omobo chúk ya tei dukhu rwnai.

⁹Saichungni slái le khoroknwi se ham kugo, tamni hwn ba bórok bórokni samungni bagwi sokat kaham mannai.

¹⁰Tamni hwn ba tumung bórok klai khe khoroksa tei khoroksano tisaui mannai; tamo khe saichung susuk tongnai le khairok susuk, bo klai khe bono tei khoroksa sochanai kwrwi.

¹¹Abono karwi tumung khoroknwi thansa khe thu lai khe túng-túngbo wngo; tamo khe saichung susuk le bahai khe sakno túng-túng khlainai?

¹²Borok saichung hwn khe dakti’-no cheno, tamo khe khoroknwi hwn khe sak-sakno katiui tong laiwi mano. Buduk twngthamno phánwi mwsak khe abo ahaino cho ya.

¹³Kók biti na ya butua habugrani slái le siyan gwnang bigra sikla phano ham kugo.

¹⁴Khoroksa bo alongni yógwi achukthayungo achukna phano phaiwi mano, bo bigrani núkhungo phano achainai wng thung.

¹⁵Ang nuk kha, o ha saka-o bebak kwthang tongwi tháng laisu-ui tongnairok a habugrano sláijaknai siklasano rwkthar lai kha;

¹⁶swkango o borokni kwbángma borok tongmani tei bo bórokni habugra wngwi tongmani tamo khe ulni bororok khe bono bwkha phurjak li ya. Omobo chúk ya, nokbarno riphrikma hai.