Read Kok Borok PHRWNGNAINI 6 Bible Online

PHRWNGNAINI 6 - Kok Borok bible

PHRWNGNAINI 6

¹Ang o ha saka-o hamya mungsa nuk kha, abo bororokni thani belai khe hilikma:

²Kaitor baksa baksano khe rang-mai, bórom, nok-huk rwui bórokno mungsa phano biyal wng ya khe ton kha, tamo khe Kaitor bórokno a manwirokno cháui nungwi tongthokna rw ya, bui se abono cháui nungwi tongthogo. Omobo chúk ya; belai khe cha ya.

³Borok khoroksani bwsa khoroksara phano wngwi mano tei bisi kolokma romwi phano thangwi mano; tamo khe bo nokha bisi kwbángma romwi thang phano tumung bo kwthang tong phuru bwkha kochomwi tongthok lang ya khe eba simalwng kaham man ya khe, aboni slái achai drobo thwima se ham kugo hwnwi ang ma sa-o.

⁴A chwrai kwrwi kwrwino achaiwi mwnakma-o thángwi pái-o tei mwnakma bai’-no bini mung kholopjagwi pái-o;

⁵bo salbo nuk lang ya tei mungsano phano si lang ya; hai phano bo a borokni slái lenglamung man kugo.

⁶Bo bisi nwira thangwi tong lang phano tongthogwi se ma tong lang ya—bórok joto’-no kwrẃngsa’-ono ma tháng ya diba?

⁷Borok chámungni bagwi se samung ma tango, ahai phano bo ok khuima hamya.

⁸Butuani slái siyan gwnangni tamo bwswk tamo man kukma tong? Phiya kwrwisa bahai khe himna-thángna nangnai abono siui le tamo chúknai?

⁹Teibo manna muchungmani slái mokol bai nugwi tongma’-ono bwkha kochomma se ham kugo; omobo chúk ya tei nokbarno riphrikma hai se.

¹⁰Bebak wngmarok bebakno swkango’-no chongjak tei borok, bo tamo-tamo ya abo swkango’-no saui manjak, bo bini slái khoroksa kwrak bai kók tan laiwi man ya.

¹¹Kók báng khe chúk ya wngmabo bángo, hakhe borokni bagwi bubo kaham?

¹²Borok bini thangsungo a chúk ya salrokno sampili hai khe lái rw phuru bini bagwi bubo kaham bubo khe hamya sabo saui mannai? Bo thángwi páima yagulo o ha saka-o tamo wngnai abono bono sabo saui mannai?