Read Kok Borok PHRWNGNAINI 7 Bible Online

PHRWNGNAINI 7 - Kok Borok bible

PHRWNGNAINI 7

¹Mung kaham le thok motomni slái se hamo tei achaima salni slái thwimani sal se hamo.

²Chá lai-nung lai tongthok laithani thángmani slái kap laiwi tong thani thángma se ham kugo; tamni hwn ba omono joto bororokni páithak tei kwthang tongnairokbo o kókno bwkha-o muitu narwk anw.

³Mwnwinani slái bwkha mokma se ham kugo, tamni hwn ba abo mwkhangno kosom khlai phano nini bwkhano srang rw-o.

⁴Siyan gwnangni bwkha-o khe bwkha khammung tongo; tamo khe butuasani bwkha-o khe bagrumwi tongthoknano máng uansugo.

⁵Butuarokni rwchapmung khnamani slái siyan gwnangrokni kulmano khna ma se ham kugo.

⁶Butuarok mwnwima le hóro busu khamwi perma hai se; abo mungsa chúk ya.

⁷Siyan gwnangsa sátok-pitok khlai khe bo butua se wngo tei rang cháma khe bwkhano hamya khlai-o.

⁸Bebakni’-no chengmani slái páithak se ham kugo; kung chukmani slái khe bwkha lokma se ham kugo.

⁹Dakti khe ta joli di, tamni hwn ba butua se bukungo thamchi tẃi-o.

¹⁰“Tabukni salrokni slái lái thángma salrok tamo wngwi ham kuk?” hwnwi ta sa di, tamni hwn ba omo le siyan gwnangrokni sẃngmung wngwi man ya.

¹¹Siyan gwnang wngma le ma-phani aroni manmari manma hai kaham tei abo bebak kwthang tongnairokni kaham khlai-o.

¹²Tamni hwn ba siyan rang-rí hai’-no khom-khom khe kati rwui tono, tamo khe siyan hammani khe, siyan a siyan gwnangni langmano kati rwui tono.

¹³Kaitorni samungno uansugwi nai di; bo kokoi khlaimano sabo sepengwi mannai?

¹⁴Hamchama-chasama jora-o tongthok di, tamo khe tekto nang phuru o kóknobo uansuk di, abo khe; borok bini thinangni kókno mungsa phano saui ta man thung hwnwi Kaitor tongthok rwma hai tektobo rw kha.

¹⁵Ang ani o mungsa chúk ya thangsungo bebak nuk kha; khoroksa borok kaham bini kahamno tẃiwi thwi-o, phiya tei khoroksa samung hamya tangnai borok hamya khe umor kolok khe thangwi tongo.

¹⁶Belai kaham ta wng di tei belai sinai hai khe ta phunuk di; nwng tamni sak-sakno sokomornai?

¹⁷Belai khe borok hamya ta wng di tei butua ta wng di; nini jora phai ya sini nwng tamni thwinai?

¹⁸Nwng o phrwngmung tháinwirokni bere tháisano phano khibi yaui khnaui tong khe hamo; tamni hwn ba Kaitorno bórom khlaiwi kirinairok o tháinwino’-no khnaui tongwi mannai.

¹⁹Kamiyungni khorokchi tẃiphangrokni slái siyan khoroksa siyan gwnangno teibo phankrak khlai-o.

²⁰Au, o ha saka-o khoroksa phano aswk khe borok kaham, uáisa phano sumsok khlai ya tamo khe kaham simi khlai tongnai abo hai kwrwi.

²¹Bororok sa laima bebak kókrokno khunju ta kan di, hakhe nini seleng nono swraiwi tongmano nwng khnanai;

²²nwng buino uái-re uái sraimano nini bwkha saui mano.

²³Omorokno bebakno ang ani simung bai amjogwi nai kha; “Ang siyan gwnang wngnai” hwnwi sa kha tamo khe ang abono yasuk ya.

²⁴Abo belai’-no kwchalma tei belai’-no kuthukma; abono sabo saui mannai?

²⁵Ang siyanno tẃiwi uansuktang chapjak tongmarokno naitugwi sina bagwi tei borok hamya wngma khe butua wngmani tei butua wngma khe uansukna rwng ya wngmani o kókno sinani bagwi sakthar kha.

²⁶Thwimani slái kwkha mungsano ang nuk kha, abo wng kha bwkha-o uarai tei chei tei yak kongnwi khe sorduk a bwrwi, Kaitorno bwkha phur rwnai borok khe bini yakni yógwi tongnai, phiya sumsok gwnangrokno khe bo kwcha rwnai.

²⁷Nai di, kaisano sina bagwi kaisa bai tei kaisano dalwi ang omono si kha hwnwi phrwngnaisa sa-o,

²⁸ang naituk naitugwi naibo ang abono man li ya. Khoroksasai borokni bisingo chwla khoroksa susukno kaham man kha tamo khe bwrwi khoroksano phano kaham man li ya.

²⁹Nai di, omorokno’-no ang saui manmani, Kaitor borokno srai-srai tei kepleng khe snam kha, tamo khe bórok kwbángma kokoi-mokoi snam kha.