Read Kok Borok PHRWNGNAINI 8 Bible Online

PHRWNGNAINI 8 - Kok Borok bible

PHRWNGNAINI 8

¹Siyan gwnang hai sabo wngwi man? Mungsa swkni kók kuthukno sabo saui man? Simung bini mwkhangno chẃng rw-o tei bini mwkhang sitrano slái rw-o.

²Habugra dagimano khlai di, tamni hwn ba nwng Kaitorni thani o swmai tang kha;

³bini aroni thángwi páina bagwi dosi-dophra ta wng di, mungsa swk hamya bai ta gwdal di, tamni hwn ba bo bini muchung tẃi bebak khlai-o.

⁴Habugrani kók khe phan gwnang, hakhe sabo bono “Nwng omo tamo khlai tong kha?” hwnwi sẃng raknai?

⁵Bini kók khnaui tongnairokni mungsa hamya wng glak tei siyan gwnang borok, bo buphuru bahai khe abo khlainai saui mano.

⁶Tamni hwn ba bebakni bagwino jora tei raida tongo, phiya ba bororokni saka-o hilikma jwngjal klaijak tongo.

⁷Au, tamo wngna naiwi tong kha abono bórok si ya, abo bahai khe wngnai abono bórokno sabo sanai?

⁸Khoroksa phano nokbarno romwi narwgwi tonwi man ya wngma hai thwinani salnobo kasu-ui narwgwi man ya; chobani jora-o phiyógwi rohorjak ya wngma hai samung hamyabo a samung hamya tangnairokno phiyógwi man glak.

⁹O ha saka-o khlaijakmarokno naichomwi naiwi uansugwi omorokno nuk kha; borok khoroksa tei khoroksano suar tongma bagwi hamya khlai-o.

¹⁰Aphuru khe ang borok hamyarok phobjakmano nuk kha; bórok tongthai kwtharo tháng-phai khlaiwi tongo, bórok kamiyungo abo tẃi samung khlai thani lobjago. Omobo chúk ya.

¹¹Tamni hwn ba samung hamya khlaijakmani manthaino doui majra berjak ya khe, borokni bwkha le samung hamya khlaina bagwi katswi chapjak.

¹²Borok hamyarok samung hamya khlaima saka khlai tong phano tei bórok umor kolok khe thangwi tong phano, hai phano ang saui mano Kaitorno kirinairokni le kaham’-no wngnai, tamni hwn ba bórok bono bórom khlaiwi bini bwskango bachaui tongo,

¹³tamo khe Kaitorno kiriyarokni le kaham wng glak, phiya bórokni langmabo sampili hai khe dakti’-no kwmaui páinai, tamni hwn ba bórok Kaitorno kiriui bórom khlai ya.

¹⁴O ha saka-o mungsa chúk ya wngmani wng kha, borok hamyarok khe borok kahamrokno khlaijak tẃi khe khlaijago tei borok hamyarok kheba borok kahamrok khlaijakna manna tongmano mano. Omorokbo chúk ya.

¹⁵Aboni bagwino ang tongthokna bagwi se ma sa-o, tamni hwn ba o ha saka-o cháui-nungwi tongthoknano karwi borokni tei kaham kwrwi, abo hai khlai khe Kaitor bororokno rwmani thangsungobo tongthokma bai khe tongnai.

¹⁶Ang siyanno sina bagwi nai khe tei o ha saka-o wngmarokno naiwi nai khe nuk kha, borok khoroksa tumung hor-sal mokol mukum yaui tong phano Kaitor tamo khlaiwi tong kha abono romwi man súk ya,

¹⁷aphuru ang o ha saka-o Kaitorni aswkni samungno nuk kha, abono khoroksa phano naitugwi man ya. Abono saui manna bagwi bororok chaitok súk phano bórok abono man glak; siyan kwrwngrok abono buchi kha hwnwi sa phano abono pái súgwi buchiui man glak.