Read Kok Borok RWCHAPMUNG 1 Bible Online

RWCHAPMUNG 1 - Kok Borok bible

RWCHAPMUNG 1

¹Solomonni[1] khnathok kukma rwchapmungrok.

²Nwng ano motom suma saka motom su di! tamni hwn ba nini hamjakma angur bwtwini slái se kaham kuk,

³nwng phulmani thok motomrok jip-jip motomsajak, nini mungbo lukhlaijak thok motomrok hai’-no motom; aboni bagwino bwrwirok siklarok nono hamjago.

⁴Ano nini aro tẃi di, phai di doui tháng lainai. Habugra ano bini thumani khotolo tubu kha; chwng nwng bai bagrum bárwi tong thok lainai; angur bwtwi slái phano nini hamjakmano chwng teibo bólainai; bórok nono hamjagwi sóino khlai-o.

⁵O Jerusalemni bwrwirok, ang Kedarni ríni nok hai, Solomonni noyungni rí swngjakrok hai; ang sak kosom tei naithok

⁶Ani sakur kosom hwnwi ano ahai khe naisigwi ta tong di, tamni hwn ba satung khamprama bai se ang ahai wngo. Ani takhukrok ano jolijagwi angur bari-o samung tang rw-o; bórok ano angur bwlwngrokno mwrwknai snam kha tamo khe ani sakni angur bwlwngno khe ang naikini khlai li ya!

⁷O ani khájani borok, nwng ano sa di, buro nini merarokno mwrwk? Sal khorogo kasa phuru khe, buro lengla rw? Tamni bagwi ang kubun mera mwrwknai bodolrokni thani mwkhango rí rwui thángnai?

⁸O bwrwi naithok kuk, abo buro si ya hwn khe, mera bodolni yapai songwi tháng di, tei mera mwrwknairokni ríni nok gana-o nini punsarokno mwrwgwi di.

⁹O ani hamjakma, ang nono Pharaoni malkhungrok sonai korai bwrwi bai se su-o.

¹⁰Nini khunjuni lolairok nini babainwi khangar mwchangjak, tei kotok madlwirok bai mwchangwi tong kha.

¹¹Chwng nini bagwi rukphaini bubak gwnang rangchakni toya, uakhum tagwi rwnai.

¹²Ani bugra bini thongaro rokoui tong phuru ang ani motom báhai nokbaro kupulung wng kha.

¹³Ani hamjakma borok mur langi hai ani khája-o roko-o.

¹⁴Ani hamjakma borok Engedini angur bwlwngo barnai bolongni khum hai.

¹⁵O ani hamjakma, nwng bwswk se naithok; au, nwng naithok; nini mokol kolnwirokbo tokthu hai.

¹⁶O ani hamjakma nwng bwswk se naithok, belaino naithok. Jabra kwkhrang se chini thuyam;

¹⁷sidar buphangno chini nokni thongla khlainai, tei Pain buphangni khe uyar snamnai.