Read Kok Borok RWCHAPMUNG 5 Bible Online

RWCHAPMUNG 5 - Kok Borok bible

RWCHAPMUNG 5

¹Ang ani tháiblwngo phai-o, o ani khásuk, ani bwrwi; ang ani langi-thok motom bai baksa angur murbo thumo, ang ani piya bwlap bai baksa piya bwtwi nungo, angur bwtwi bai baksa abuktwi nungo. O kichingsong chá se chá di nu-se nung di hamjakmano phek súgwi nung di.

²Ang thu phano, ani bwkha sichajak. khna di! Ani kháni borok dugar bú phai-o. “Dugar phiyok di, o ani khásuk, ani hamjakma, ani tokthu katswi kaham kuk; tamni hwn ba ani bokhorok pantwi bai si kha, horni siyari bai ani bwkhnai si kha.”

³Ang ani rírok kheng kha; abono tei bahai kan phinai? Ang ani yakung sú kha; bahai khe meka phnang phinai?

⁴Ani hamjakma duglam bwlam tẃi yak sitok kha, tei ani bwkha bini bagwi ui-ui wng kha.

⁵Ang ani khájani borokno duglam phiyokna bacha kha, ani yak mur motomo chomsajak, ani yasi mur bwtwi nangjak dugar berepma-o nang kha.

⁶Ani khájani borokno ang phiyók rw kha, phiya ba ani hamjakma kiphilwi tháng kha. Bo kók sa phuru khunju kaichomwi man li ya, ang bono naitugwibo man li ya, ang bono naituk kha tamo khe bono man li ya; ang bono ring kha, tamo khe bo mungsa sa li ya.

⁷Kamiyung mwrwknairok himgurung lai tong phuru ano nuk kha; bórok ano bú lai kha, ano kwsa cha rw kha, kamiyungni chokdeual mwrwknairok ani dulai segwi na kha

⁸O Jerusalemni bwrwirok ang norokno kwrak khe sa-o, tumung norok ani khájani borokno nuk khe bono sa di: Ang hamjagwi kobor cha kha.

⁹O naithok kuk bwrwi, nini chwla ba buini slái de ham kuk? Nini hamjakma chwla ba buini slái bwswk hamtiui nwng ba chwngno koina klai?

¹⁰Ani khájani borok le sak kwchẃng tei sakur chakkhlaijak, khorok chisai-o se kaisa.

¹¹Bini khorok rangchak kaham hai, bini bwkhnai koitroi tei tokhaborok hai kosom.

¹²Bini mokolrok twisa rukungni tokthu bojro abuktwi-o tuku rwui naithok khe bajak hai.

¹³Bini khangarrok, motom mosolani thuyam hai motom báhai ongkhorjak. Bini khukchwi mur bwtwi nangjak lili khumbar hai.

¹⁴Bini yaktwkrok holong morok thepaui rangchak khopjak raidang hai. Bini sakduk khebo saphirarok thepajak mayung bua hupreui milik rwjak hai.

¹⁵Bini yaphungrok khe rangchak saka-o holong marbelni thongla bacha rwjak hai. Bo Lebanon hai tei saijak sidar buphang hai kuchuk kotor.

¹⁶Bini khúk belai kwtẃi, bini bebakno ang hamjago. O Jerusalemni bwrwirok bo le ani khájani borok ani hamjakma khásukti.