Read Kok Borok JISAIA 16 Bible Online

JISAIA 16 - Kok Borok bible

JISAIA 16

¹Bórok hani tẃiphangrokno Selani merarok hili rohor kha. Hasing hapharni lama tẃi khe Selani Siyonni hathái-o rwi rohor kha.

²Bothopni rwkhlai rohorjaknai tokrok koproiwi ayang-uyang bir laima hai’-no Moabni sajwksongrokbo abo haino Arnonrokni sengkrak bathamo wng lai tong kha.

³“Chwngno tamo khlainai kókbiti sa ja di, chwngno bujsói man rw ja di; sal diborni kutungo saklom hai khe chwngno kati rwui ton ja di; o basijakrokno hui ton ja di, o riphujirokno ta khibi ja di.

⁴Moabni basijakrokno norokni bisingo ton ja di; bórokno sokomornairokni yakni kati rwnai wng ja di; sátoknairok kwrwi wng phuru khe sokomormani mwthak khe yakung bai kádulnairok ha saka-o kwrwi kha hwn khe,

⁵hakhe kubui hamjakma bai khe ha songchajaknai tei Daudni bosongni bere khoroksa bugra chánai, bo bororokno sói khe tei hamjakma bai khe nainai. Bo kubui’-no khlainai tei doui bujsói khe nainai.”

⁶Chwng Moabsongni kung chukma khna kha, bórok bwswk se kung chukjak tongmani; bini thamchirok, kung chukmarok, sak nang ya wngmarok bebakno bukcha se.

⁷Aboni bagwi Moab kap thung tei bebak bororokbo bini bagwi kap thung. Kir-hareseto ma cháma a auan kothokni bagwi bwkha nangwi uansugwi kap thung.

⁸Hesbonni hapharni mai-khulrok tei Sibmani angur bwlwngrok mwran bai kha. Aroni angurni angur bwtwirokno dopharokni tẃiphangrokno phek rwui uaija rw-o. Salsa aroni angurrok Jaser kamiyung jora sógwi kha tei salkabai phaisingo hasing haphar jora tei salthángbai bwkhak twijlang kwthwini ayang nar jora sógwi kha.

⁹Aboni bagwi ang Sibmani angurni bagwi Jaser bai baksa kabo; Hesbon bai Elealeni bagwi ani muktwi klai-o; tamni hwn khe aroni bwtháirok kwrai tháng bai kha tongthogwi rajaknairok kwrwi kha.

¹⁰A bwthái kwbángma tháinai hapharni tongthok rosaui tlangjak kha; a angur bwlwngo khoroksa phano rwchapnai kwrwi kha tei chirik lainairokbo kwrwi kha. Khoroksabo angur pherenai kwrwi kha, tongthokni khorang tei kwrwi kha.

¹¹Ang Moabni bagwi khá hamya wngwi swlwgwi kabo tei Kir-heresni bagwi khá mogo.

¹²Moabni bororok sak sak uana laijak tei hatháini abo bórokni mungsa kaham wng glak.

¹³Subraiyung swkango Moabni bagwi o kókrok nono sa-o,

¹⁴Tamo khe tabuk Subraiyung hai hwnwi sa-o, “Nokha bisik thamni bisingo Moabni aswk rang-rírok kwmanai. Bini aswk borok kwbángmani bisingo kisicha borok se tong rwknai tei phan kwrwi wngnai.”