Read Kok Borok JISAIA 17 Bible Online

JISAIA 17 - Kok Borok bible

JISAIA 17

¹Damaskosno tẃi kók sajakma. Nai di Damaskos tei kamiyung tong glak abo swbaiwi burung khe rúngjak se wngnai.

²Bini kamiyungrok mol brúmni bagwi khibijaknai; abo mal-matarokni tongthai se wngnai, bórok aro thunai tei khoroksa phano aro bórokno sikirinai tong glak.

³Ephraimni kamiyung kwrak kwmaui thángnai tei Damaskosni habugrani phanbo kwmaui thángnai; tei Siriyani yógwi tong rwknairok Israilsarokni chẃngsacha hai wngnai hwnwi sengkrakrokni Subraiyung sa-o.

⁴A salo Jakobni chẃngsacha bálaiwi thángnai tei bini sakni bupham ransaui ramwi thángnai.

⁵Abo maiphang bachajakno ra tẃi khe rajakma hai wngnai tei ranaisa bini yak bai ra tẃi wngnai, Rephaim harungni maitang kholwi rama hai srai-srai khe rajaknai.

⁶Hai phano aro santijak angurrokni bere kisicha karwi klangjaknai tei tháistwi buphangno jangri khe buphangni buchugo tháinwi eba tháitham bwthái tong rwkma hai’-no Israilrok wngnai hwnwi Israilni Kaitor sa-o.

⁷A salo bororok bórokno taknairokno samung nangjaknai tei Israilni kwtharsano bórok mokol bai naituk lainai;

⁸bórok háyárokno, bórokni yakni samungrokno samung nangjak glak tei bórokni yasi bai takmarokno naisik glak eba bórok yak baithang satrai sókna bagwi snam laima háyárokno samung nangjak glak.

⁹A salo bórokni kamiyung kwrakrok norjaknai Israilrok bai norjagwi Hibisarok tei Amorsarok[14] norjakma hai khe norjaknai. Abo haino khibijak bukcha wngnai.

¹⁰Tamni hwn khe nwng nono mwthangnai Kaitorno pok kha tei nono holong kwrak hai khe kati rwnaino pok kha, aboni bagwi nwng buini mwtaino bórina bagwi naithok buphang kái phano,

¹¹káimani salo nwng abórokno rotom rw phano tei sarmano nwng phungo barsa rw phano, bwkha hamya wngmani bagwi tei ham phlai ya kwsa dunokmani bagwi a salo hai’-no rana tongmarok kwmaui thángnai.

¹²Kwbángma lukurok kutuk lai-o; bórok twijlangni twi kutuksama hai khe kutuk lai-o; tei twi kotorma báima hai khe dopharok báiwi klai-o!

¹³Dopharok twi kwbángma kutuk tẃi khe kutugo tamo khe bo bórokno damrok khe bórok hakchalo khárwi ma thángnai, hathái saka-o nokbar bai gundak kobon rwjak tẃi khe tei nokbar kotor bai hasing kobon rwjak tẃi khe kobonwi ma thángnai.

¹⁴Nai di sanja-o khe kirimasingcha se tongmani! Tamo khe ai ya sini’-no bórok tei aro kwrwi kha! Omo’-no chwngno dera rwnai tei tantharnairokni manthai.