Read Kok Borok JISAIA 2 Bible Online

JISAIA 2 - Kok Borok bible

JISAIA 2

¹Amojni bwsla Jisaia, Juda bai Jerusalemno tẃiwi nukmani kók:

²Jora páithago omo hai wngnai, Subraiyungni noktharni hachuk, bebak hachukrokni slái kuchuk kuk hachugo tisajaknai; hakhe bebak hachukrokni slái kuchuk kugo lobsajaknai, tei bebak dopharok bini aro twi kotor hai khe kochogwi phainai.

³Phiya bororok kwbángma’-no phaiwi hai hwnwi sa lai anw; “Him di tho, chwng Subraiyungni hachugo,[4] tei Jakobni Kaitorni nogo thángwi kasa lai anw, bo chwngno bini lamano tẃi phrwng anw; hakhe chwng bini lama tẃi him lai anw;” Tamni hwn ba Siyonni aroni se kerong tei Jerusalemni aroni se Subraiyungni kókthái ongkhor anw.

⁴Hakhe bo dopharokni bisingo buj thumnai, tei kwbángma bororokni buj sachu-ui rwnai, bórok sak sakni seng swbaiwi, langonni phal snam anw, tei bórokni chakhlarokno swbaiwi chekhra snam anw, kaisa dopha tei kaisa dophano kebengwi seng tisa glak; tei choba nang laina bo phrwng lai glak.

⁵O Jakobni bosong, phai di chwng Subraiyungni pohoro him lai anw!

⁶Tamni hwn ba nwng nini borok Jakobni bosongno khibi kha, phiya bórok salkani bororok bai tei Philistiasarok hai bedua kwrwng kupulung. Bórok phatarsarok bai baksa yapha khorop lai-o.

⁷Bórokni ha rangchak tei rukphai bai kupulung, bórokni rang-rírokni páimung kwrwi; bórokni ha-o korairok kupulung, phiya bórokni korai malkhungrok bwswk kwbáng abo lekha bai ya.

⁸Bórokni ha takjak mwtai bai kupulung; bórok sak baithang takmani manwino khulumo, aile abono bórokni yasirok bai takmarok se.

⁹Hakhe bororok hachero karijaknai tei bororok koinene khlaijaknai, aboni bagwi bórokno ta nakar di!

¹⁰Subraiyungno kiriui tei bini kwplaima chẃngsachani bagwi norok holong gurung bisingo hap di tei ha bisingo huijak lai di.

¹¹Bororokni kung chukma khorok koinene khlaijaknai tei bororokni thamchi tungmani khorok bom rwjaknai, a salo Subraiyung simi se lobsajaknai.

¹²Tamni hwn khe sengkrakrokni Subraiyungni sal kaisa khatijak tongo, a salo bebak kung chuknairok tei borok tornairok, kuchugo tisajakrok bebakno khorok bom rwjak bai anw.

¹³A salo Lebanonni kuchuk tei kaham sidar buphangrok tei Basanni bebak uk buphangrok,

¹⁴bebak kuchuk hachukrok tei hathái kuchukrok,

¹⁵bebak nok kuchukni bosokrok tei bebak chokdeual kwrakrok,

¹⁶Tarsisni bebak rungtorrok tei naithok khe snamjakrok swklwkjak bainai.

¹⁷Hakhe borokni kung chukma koinene khlaijaknai; tei thamchi kutungrok khorok bom rwjak anw. Phiya a salo Subraiyung simi se lobsajaknai.

¹⁸Takjak mwtairok bebak pái súgwi swkwmajak bainai.

¹⁹Subraiyung bachaui o hano jangrina bagwi bacha khe, bini thamchino tei chẃngsachano kiriui holongni hakhoro tei hani hakhoro bórok khárwi ma huijagwi anw.

²⁰A salo bororok surinani bagwi takmani rukphaini mwtai tei rangchakni mwtairokno bebak sinjokungdrung tei tokbakrokni thani khitar bai anw.

²¹Subraiyung bachaui o hano jangrina bagwi bacha khe, bini thamchino tei chẃngsachano kiriui holongni hakhoro tei holongdap besero ma huijagwi anw.

²²Norok borokni saka bwkha beramano mwthak di, bórokni bukungo simi se hama tongo, bórok tamo chúknai?