Read Kok Borok JISAIA 22 Bible Online

JISAIA 22 - Kok Borok bible

JISAIA 22

¹Omo wng kha phunukjakmani harungno tẃi kók sajakmani: Tamni bagwi norok aswk kuchugo máng kasa lai kha, tamo bebakno norok núkhúng khúngchili-o máng?

²Norokni kamiyung hohom-dodom tei tongthothok. Nini aroni butharjaknairok seng bai tanjagwi butharjak ya.

³Norokni bebak tẃiphangrok baksa khe khár bai kha; bórok badukhung phungsa kok yaui’-no romjak bai kha. Hakchalo khár phano norokni bere baksa manjagwi romjak bai kha.

⁴Abo bai’-no ang hai hwnwi sa-o, “Ani samo ta tong bai di, ano asi yógwi kap rw di; ani bororokni sajwkni komornanino tẃiwi ano bwkha methepna ta nai di.”

⁵Omo tabuk phunukjakma harungo Subraiyung sengkrakrokni Kaitor bai tekto rwjakma, káduljakma tei buma man ya khlaijakma jora. Chini kamiyungni chokdeualrok tabuk swbaina bagwi tangjagwi tongo tei hatháirokno naharwi kabwi chirik laijak.

⁶Elam korai malkhung kanairok bai tei korai kasajak sengkrakrokno tẃiwi makalrok tẃijak. Kir khe bini phuino tikhlaijak.

⁷Norok hamjak kukmani harungrok korai malkhungrok máng kupulung tei korai kasajakrok khe duglam kotor kotoro bacha laijak.

⁸Bo Judani katimungrok naui pái bai kha. A salo nwng seng-phuirok bolongni noyungo se naituknai.

⁹Norok Daudni kamiyungni chokdeualrogo kekhokrok nuknai. Norok kamiyungni khámani pukhiri-o twi khógwi rúngnai.

¹⁰Nwng Jerusalemni nokrokno lekhaui nai kha tei nok báijakrokno tei chokdeual báijakrokno tisana bagwi nokrokno swbai kha.

¹¹Nwng pukhiri kwchamno twi rúngna bagwi chokdeual kwnwini kwcharo twi tonjaknai snam kha. Tamo khe nwng a snamnaino khe naisik li ya, eba sal kwbángma swkango abono snamnaino sak nang li ya.

¹²A salo sengkrakrokni Subraiyung kapnani bagwi tei khorok silwi, rí soroi kanwi kapsimang kapna bagwi ringo;

¹³tamo khe nai di, musukrok ratharwi merarok tanwi bahan chá laiwi tei arakrok nung laiwi se tongthok laiwi hai hwnwi sa lai-o, “Khwna’-no chwng thwi lainai ba chá lai sinai tei nung lai sinai.”

¹⁴Sengkrakrokni Subraiyung baithang ani khunju-o hai hwnwi sa kha, “Nwng thwi ya sak nini o sumsok nakarjak glak,”

¹⁵Hakhe Subrai, sengkrakrokni Kaitor hai hwnwi sa-o: Thángwi rangkhókni barja manjak tei noyungni barja manjak Sebnano saui di:

¹⁶Nwng sakno tamo hwnwi chongwi tong? Nini sakni bagwi hatháirogo khurwi tisanani nini oro tamo tong?

¹⁷Nai di, Subraiyung phan khe khitarwi rohorna nai tongo. Bo nono kwrak khe sebwi romnai.

¹⁸Bo nono maidul hai khe kwrak khe dului páinai tei nono ha kotor kaisa-o khitarwi rohornai. Nwng aro ma thwinai tei nini korai malkhung kahamrok aro klaiwi tongnai, nwng nini nokphangni nokni lachimung wngnai.

¹⁹Ang nono nini samung barjani nornai tei nini tongthaini tikhlaiwi rwnai.

²⁰A salo ang ani seleng Hilkiani bwsla Eliakimno ringnai

²¹tei ang bono nini ríno kan rwnai tei nini chango khamano bono khá rwnai, nini suarno bini yago yapharwi rwnai; bo Jerusalemo tongnairokni bupha wngnai tei Judani núkhungni bupha wngnai.

²²Ang Daudni núkhungni suranino bono yapharnai. Bo phiyok khe khoroksa phano kholobwi man glak tei bo kholop khe khoroksa phano phiyogwi man glak.

²³Ang bono duglam berepjaknai buphang hai khe kwrakma khlainai; phiya bo bini buphani núkhungni chẃngsacha achukthayungni bagwi wngnai.

²⁴Bini núkhungni bebak chẃngsacha bini saka-o khachijaknai; bini bosong bwsa-bẃtẃi tei sandai masakrok tei bórokni bwsate khurini sini chengwi dangai-golarok bebakno aro khachijaknai.

²⁵A salo sengkrakrokni Subraiyung sakhlai-o, kwrago tonjak a berepma buphang norjagwi thángnai; abo tanwi khibijaknai tei klainai, aboni saka-o bokjak manwi tongmani abo tankhlaijaknai hwnwi, kwplaisa Subraiyung sa-o.