Read Kok Borok JISAIA 24 Bible Online

JISAIA 24 - Kok Borok bible

JISAIA 24

¹Nai di, Subraiyung o hano borok kwrwi khlaiwi bukcha khiklai tonnai, bo o ha sakano ubrum-jabrum khlaiwi aro tongnai bororokno pisa-piring khlai rwnai.

²Borok bánglarokbo hai’-no wngnai tei ochairokbo haino wngnai; selengbo haino nokphang nokphangjwkbo haino wngnai, painai haino phalnai bo wngnai, solok nanai haino solok rwnai bo wngnai; lakai nanai haino lakai rwnai bo wngnai.

³O ha sói haino bukcha wng súgwi klaiwi tongnai tei chúk súk ya wngnai, tamni hwn khe Subraiyung se o kókno sa-o.

⁴O ha kabo tei mwrano bebak haktorno belwi tongo tei mwrano; nokha tei ha kwnwnwi’-no belo tei mwrano.

⁵O ha saka-o tongnairokni bagwi derajak wng kha; tamni hwn khe bórok kerongno swbai kha, raidano nor kha, kusung kusungni swmaino swbai kha.

⁶Aboni bagwino swraimung bai o ha monokjak kha, aro tongnairok bórokni samung cha yani bagwi manjak kha; aboni bagwi ha saka-o tongnairok khampro bai kha tei belai kisa se kwthang tong rwk si-o.

⁷Angur buphangrok mwran kha, angur bwtwirok kap kha. Swkango khá tongthogwi tongnairok bebakno tabuk mokjak máng,

⁸bórokni khnathothok chongprengrok tei kham khorangrok, sumui khorangrok mwthakjak kha.

⁹Angur bwtwi nungwi tongthogwi rwchap laimabo kwrwi kha, arak nungnairok arakno se kwkha wngjak lai si-o.

¹⁰Kamiyung bisingo ubrum-jabrum mwthakjak kha, nokrok bebakno berebwi tong laijak khoroksa phano tei habwi man li ya.

¹¹Aro angur bwtwi pái thángmani bagwi bororok laharrogo chirik laijak máng; tongthokma thák súgwi pái kha; ha saka-o tongthokma kwrwi kha.

¹²Kamiyung báijak tei bini duglam kotorrokbo báiwi klaijak.

¹³Ha sakani bebak dopharokni abo haino wngnai, Olib buphang bwtháirokno bukhraiwi khakma hai tei angur bwtháirokno pherema wngnai.

¹⁴Bórok khorang sochaui tongthokma bai rwchapnai. Subraiyungni tormano tẃiwi bórok salthángbai-o tongwi chirik lainai.

¹⁵Abo bai’-no salkabai-o tongnairok Subraiyungno lob di tei twijlang rukungo tongnairok Israilni Subraiyung Kaitorni mungwi lob lai di.

¹⁶Ha páithakni bujsói tẃinaino lobwi rwchapmani khorangno chwng khna-o. Phiya ba ang hai hwnwi sa-o, “Ani le khatungna kwrwi kha, haino pái kha. Ang swraimung nangjak, tamni hwn khe bandinai bandi máng tongo tei bórokni bandimani abo teibo se sitra khe bandi-o.”

¹⁷O ha saka-o tongnairok bwskango kirijaknai máng, hakhor tei khẃi nono naisingwi tongo.

¹⁸Kirimani khorang bai khárnairok bórok hakhoro klainai; phiya hakhorni yók khe bo khẃi-o klaiwi romjaknai. Nokhani uatwi belai khe uanaui tei abo bai hani yaphang jangrijaknai.

¹⁹Ha belai khe báikhrup kha tei ha kekhok bai kha, ha belai kheno jangrijak kha.

²⁰Ha, chuak kephek hai khe ninang-chichong wng kha tei nokbar kotor bai nok bai tẃi khe kobon kha. Haktor bini sumsok bai hilik kha, omo klai tháng kha tei bachaui man phi glak kha.

²¹A salo Subraiyung chuknohani sengkrakrokno, ha sakani bugrarokno ha saka-o majra rwnai.

²²Kaitor bebak habugrarokno aphuru alongo chopma hai khe hakhor kaisa-o khe thumnai. Bórokno alongo daui tonnai tei sal kolokmani yagulo khe majra rwjaknai.

²³Subraiyung Jerusalemni Siyon hathái-o bini tẃiphangrokni bwskango chẃngsacha khe bugra chá phuru khe tal cha ya manjaknai tei salbo ma lachinai.