Read Kok Borok JISAIA 25 Bible Online

JISAIA 25 - Kok Borok bible

JISAIA 25

¹O Subraiyung nwng ani Kaitor; ang nono bólainai, nini mungno lobnai; tamni hwn khe nwng uanamasingcha samungrok khlai kha, bisi kwbángma swkango chapmano nwng sói kubui kheno khlai kha.

²Nwng kamiyungrokno burung rúngjak khlai kha, tei bórokni chasajak kamiyung báijak; arirokni kamiyung, kamiyung kwrwi kha, abo tei tisajak glak kha.

³Aboni bagwi phan gwnang bororok nono chẃngsacha khlainai; yarwng kwrwi dopharokni kamiyungrok nono ma kirinai.

⁴Tamni hwn khe nwng wng kha bigrarokni bomthai nok kwrak, tei kwrwirokni digi-sigi phuru nwng se kati rwui tonnai nok, nwng se bórokno nokbar kotorni kati rwnai nok, tei satung phurubo saklom rwui tono. Khairok ya bororok masingni nokbar hai se swprago,

⁵tei ha kwrano satung klai tẃi se wngo. Tamo khe o Subraiyung nwng, arirokni khorangno muthubwi ton kha; satungno chumui kholop tẃi khe nwng khairok yarokni khorangno siring khe rw kha.

⁶O hathái’-ono sengkrakrokni Subraiyung bebak bororokni bagwi chámung panda kotor kaisa rwnai bebak kothok kothok chámung tei bupham gwnang bahanrok bai tei kaham kuk angur bwtwi bai panda khlaijaknai.

⁷Oro bebak dophano kholobwi tonnai ríno o hathái-o sokomorwi páinai.

⁸Kwplaisa Subraiyung thwimano monogwi páinai tei Subraiyung Kaitor bororokni mokolni muktwino hu-ui rwnai tei ha gwnangwini bebak bororokni lachimungrokno bo khibiui rwnai; hwnwi Subraiyung sa-o.

⁹A salo hai hwnwi sajaknai “Nai di omo chini Kaitor; chwngno mwthangna bagwi bo naisingwi tong kha. Bo wng kha Subraiyung; chwng bono naisingwi tong kha; phai di chwng bini mwthangmani bagwi bwkha srangwi tongthok lai anw.”

¹⁰O hatháini saka-o Subraiyungni yak tonnai. Moab khe musuk khi hakhoro chwkap daui káduljak tẃi khe káduljaknai.

¹¹Bo aboni kwcharo twi yóknairok twi-o yak pholok tẃi khe yak pholoknai, tamo khe Subraiyung bono bini rwngmarokno bo bai baksano bini kung chukmano lachi rwnai.

¹²Bini kuchuk kuchuk chokdeualrok swbai khiklai rwjaknai tei ha-o burungsa khe rwjaknai, hadlwi cha rwui rwnai.