Read Kok Borok JISAIA 27 Bible Online

JISAIA 27 - Kok Borok bible

JISAIA 27

¹A salo Subraiyung a khárnai chibuk Lebiathonno[18] bini kotor tei kwrak seng bai khe majra rwnai. Lebiathon a kóisajak chibuk tei twijlango tongnai a dragonno bo butharnai.

²A salo: Naithok angur bwlwng aboni bagwi rwchapnai.

³Ang Subraiyung baithang se abono mwrwgo; ang aro twi lu máng se tongo. Khoroksa swk da abono dera rwno hwnwi hor sal mwrwgwi máng se tongo;

⁴ang joli ya. O, atakereng tei busurok ano kebengsai nang laina phaima te! Ang abórok bebakno’-no thumwi sógwi pái khamun.

⁵Eba bororok ang bai kati rwui tonjakna hwn khe, bórok ang bai kwthaui tong thung, bórok ang bai kwthaui tong thung.

⁶Bwskangni salrogo Jakob yarwng surnai, Israil bársa phinai tei rotomsa phinai tei ha gwnangwi bwthái supungnai.

⁷Bórokno butharnairokno butharma hai khlai da bo bórokno buthar kha? Bórokno ratharnairok ratharma hai khlai da bo bórokno rathar lang?

⁸Bórokno bo rwtajaknai bai’-no rwta di, nwng bórokno hani phataro rwi horwi asi yókjak kha. Salkabaini nokbar kwrak sibcha rwui bo bórokno kobonwi norwi hor kha.

⁹O cha yani bagwi Israil sátokma mannai tei omo hai khe bórokni sumsok nakarjak súgwi mannai, bórok bebak holongrokno tei háyá’-ono takjak mwtairokno sukhrubwi swbai ma páinai.

¹⁰Tamni hwn khe chasajak kamiyung bukcha siring siring wng kha, khibijak tei yakarjak bolong bukcha khibijak tẃi khibijak kha. Aro mal-matarokni jabra cháthai tei lenglathai se wng si-o.

¹¹Buphang ransa bai kha bedekrokbo bái pái kha; bwrwirok phaiwi abórokno bol se snam si-o. Tamni hwn khe o bororokni uansukma kwrwi gwja. Abo bai’-no snamnaisa bórokno khairok glak tei bórokno mwkhang naisik glak.

¹²O Israil bororok a salo Subraiyung Uphratis twima rukungni simi ha Ijip jora bini borokno khoroksa khoroksa khe mairung maichlam sai tẃi khe thumnai.

¹³Tei a salo totro kotor kaisa tamjaknai phiya ha Asiriya-o kwmanairok tei ha Ijipni rwkhlai rohorjaknairok phaiwi Jerusalemni hathái kwtharo[19] Subraiyungno khulum phi anw.