Read Kok Borok JISAIA 28 Bible Online

JISAIA 28 - Kok Borok bible

JISAIA 28

¹Ephraimni phekplai kung chukjak motok thupnaisa bati nangjak, tẃiphangrokni khorokni naithok motok khum hoi tẃi khe bálai kha, bórokni hapharni gwnang bokhorokrok chuak bai khe mechenjak máng.

²Nai di, Subraiyungni phan gwnang tei kwrak kuk borok khoroksa tongo; bo sokomornai kothor duljak nokbar kotor hai khe tei twi kotor kochok rw tẃi khe bo joliui ha-o khiklai rwnai.

³Nwng kwrak Ephraimni kung chukma a motok yakung yaphango khe káduljaknai;

⁴tei a gwnang hapharni khorokni chẃngsacha naithok khum abo sachlang phai ya sini munnai khwichang kwma tẃi khe páiwi thángnai: Mun slabwi man yauino yago tẃiwi cháui páijak tẃi khe páiwi thángnai.

⁵A salo sengkrakrokni Subraiyung se chẃngsacha motok wngnai tei yógwi tong rwknai bini bororokni bagwi chẃngsacha naithok rwnai motok wngnai.

⁶Buj thumnairokno bo bujsóini bwkha man rwnai tei choba-o tháng yaui kamiyung duglamni kiphilnairokno bwkha kotor wng rwnai.

⁷Bórok angur bwtwi nungwi didak-midak wngo tei arak kaham nungwi goirok lai-o; ochai tei diyari chuak nungwi ninang-chichong wngo, bórok arak bai lama koró laijak; ahai khe se bórok korójak khe Kaitor phunukmarokno nugo; omo hai khe bórok bujsói khlai phuru derajak wngo.

⁸Thongar kupulung kwbatwi máng se, kwrẃngsa phano se srai-srai kwrwi kha.

⁹“Bo tei sabono rwngmungno phrwng sinai tei bo saboni thani sajaknai kókno swbai sa sinai? A phrwngmarok achaidrop chwrai abuktwi cháui tongnairokni bagwi simi se nango hai da?

¹⁰tamni hwn khe omo ba bwtang bwtang khe bwchap rwgwi bwthái mareui, oroni kisa uroni kisa khe phrwngo.”

¹¹Wng ya khe Subraiyung o bororokno sini ya bororokni búkhúk bai khe tei kókmung sini ya kókrok bai khe kók sa anw.

¹²Bo bórokno hai hwnwi sa kha; “Omo lenglama; kirinairokno lengla rw di, omono sajak phimani;” hai phano bórok khunju kai ya gwja.

¹³Abo bai’-no Subraiyungni kók bórokni thani bwchap khe, bwtang bwtang khe kókthái mareui aroni kisa uroni kisa khe sajaknai, bórok hai khe’-no thángwi uklogo klaiwi tei baina tẃi khe tei khẃi-o klai rwui tlangjakna tẃi khe se sajago.

¹⁴Jerusalemo tongwi o bororokno tẃithernairok o kók khna yarok norok Subraiyungni kókno khunju kai di!

¹⁵Tamni hwn khe, norok hai hwnwi sa lai-o, “Chwng kwthwi bai kók kha lai kha tei hakhor bai khe kók wng lai kha; bebak sokomornai hamya phai phuru khe chini thani nang phai glak; tamni hwn khe norok tatalno kati rwnai khlai lai kha tei kubui yano bwkha bera lai kha.”

¹⁶Abo bai’-no Subraiyung Kaitor hai hwnwi sa-o, “Nai di ang Siyono thonglani bagwi holong kaisa káinai, kaisa holong abo chánaijak holong, nangmani nok busupni holong, sói kubui thongla; abono poito khlainai bororok ninang glak.

¹⁷Ang bujsóino khe sujaknai tei khe kók srai-srai khe kók narwkmano khe rwtajaknai khlainai. Kothor klaimani abo norokni tatal nokhor hai tongma nokno sokomornai.”

¹⁸Hakhe nwng butharnai bai kók kha laima thwimani yagulo se nangnai tei kwthwirokni ha bai kók wng laima nang glak; nini saka tẃi digi-sigi sók phai khe nwng abo bai swpragwi khiklaiwi rwjaknai.

¹⁹Abo phai brúmno nono tlangwi thángnai; phung ai brúmno abo nini saka tẃi lái sinai, hor bai sal bai’-no wngnai. Abono sinani nai phano mungsa si glak bukcha se wngnai.

²⁰Thuyam aswk bara wngnai bini bwsak se pholok súgwi man glak; tei chumjaknai rí khe bwsak se ból súgwi man ya, hai wng kha.

²¹Bini uanamasingcha samung sijakna bagwi bo khlaina muchungma haino khlai nai, Subraiyung Perajim hathái-o bachama haino bachanai tei Gibeon hathái-o khlai tẃi’-no khlainai.

²²Ang nono hus khe samano nwng ta mwnwi di, wng ya khe nwng teibo se sitrana tongo. Bebak o hano sokomor hwnwi sengkrakrokni Subraiyung Kaitor chongmano ang khna kha.

²³Ang samano khunju kai di, ani kókno kaichomwi khna di.

²⁴Ha chuainai sa borok bo maichwlwi sarna bagwi chuai máng da tong ba? Bo bo tamo ha phíl máng da tong ba?

²⁵Bo ha tiyar khlai pái khe bo khundrupui, banta bwchlwirok pino. Bo bwtang khe gom, barlino[20] saro tei chámani tẃi khe ha páithago tei kubun bwchlwino saro.

²⁶Tamni hwn khe bo sói khe phrwngjago, bini Kaitor se bono phrwngo.

²⁷Khundrupui manwi kotor bai bukhraijak ya tei bantanobo gorgori kotor bai phér ya. Khundrupuino latha bai bukhrai-o tei bantano raidang bai se bu-o.

²⁸Swbaijak auanno sabo sukhrup phinai? Bo abono sukhrup phlai ya; bo bini korai malkhung bai abono lái tháng phuru abono sukhrup ya.

²⁹Omo o sengkrakrokni Subraiyungni aroni se phai-o. Bo kókbiti sa thani uanamasingcha tei bini simung srai-srai.