Read Kok Borok JISAIA 29 Bible Online

JISAIA 29 - Kok Borok bible

JISAIA 29

¹Ariel bati nangjak, Daudni batham kamiyung Ariel bati nangjak. Bisi bai bisi manju-o; bisi kitingwi’-no ratharwi panda khlai lai si thung.

²Hai phano ang Arielni saka-o digi-sigi tubu-ui phainai tei aro kap lai-kok lai wngnai muisubuk cháui kap lainai tei ani thani bo Ariel hai wngnai.

³Tei ang nono kitingwi gerebwinai, nono kitingwi nok kuchuk kuchuk tangwi gerebwi tonnai tei gerebwi tonna samungo bororok thepanai.

⁴Hakhe hakhor kuthukni nwng kók sanai, nini khorang hadlwini pasanai; burasani khorang hai khe, nini khorang ha bisingni sók phainai tei hadlwini kók serek sama hai khe nini khorang wngnai.

⁵Phiya ba kwbángma nini arirok hadlwi hai se wngnai tei chwkap kwran hai khe kobonwi thángnai. Tei bacha bacha, achomsa,

⁶sengkrakrokni Subraiyung phirang bai bangla bai khe khorang kotor khe nwng bai malai phainai. Nokbar kotor bai khe, kutung khe tei sokomornai hor bai khe phainai.

⁷Tei dopharokni bebak lukurok Ariel bai choba khlainairok, bo bai nang lainairok tei bini nok kwrakrok norokno swpraknairok tei bono sátoknairok bórok imang hai se wngnai tei horo nuk tẃi wng anw.

⁸Ok khuijak borok imango ma chá tẃi tei ok khuino ok bukcha khe ma sichanai hai wngnai tei kangjak borok imango twima nungwi tei sicha phuru khe kangwi lengwi sichanai hai wngnai, abo haino dopharokni bebak bororok Siyon hathái bai choba khlainairok ma wngnai.

⁹Butua kha di tei butua wng di, mokol kholobwi nuk ya wng di tei nuk ya kha di! Phek di tamo khe chuak nungwi ya; didak-midak wng di tamo khe arak nungwi ya.

¹⁰Tamni hwn khe Subraiyung nini saka-o muktrwi tháng rwnai pholano lukhlai rw kha tei diyarirokni mokolno nuk ya khlai rw kha tei nuk rwnai bokhorok kholobwi rw kha.

¹¹O phunukjakmarok nini thani bebakno abo kholobwi mari bujak bijap hai se wng si-o. Poriui mannai khoroksa swkno “Pori di” hwnwi a bijapno rwjak khe, “Omo kholobwi mari bujak ang poriui man ya,” hwnwi sa-o.

¹²Tei poriui man ya khoroksa swkno, “Omono pori di” hwnwi rw khe bo hai hwnwi sa-o, “Ang poriui man ya.”

¹³Tamni hwn khe Subraiyung hai hwnwi sa-o, “Tamni hwn khe o bororok khúk bai simi se ani thani phai-o khukchwi bai simi se bórom khlai-o, bórok ano kirima khe bororokni haino dagima hai khe se tei haino raida rwgwi srwngma simi se;

¹⁴aboni bagwi ang haino hai o bororok bai uanamasingcha samung tangnai, kwmamsingcha tei ma naisiknai samung tangnai; bórokni sinai nuknairokni simung kwmaui thángnai, bórokni kaham-hamya sinairokni simung kwma rwjaknai.”

¹⁵Bórok chapmano Subraiyungni thani hui tonnairok bati nangjak! Mwnago samung tangnairok, “Chwngno sabo nuknai? Sabo chwngno sininai?” hwnnairok bórok bati nangjak.

¹⁶Nwng bebakno philo! Hani manwi taknai da ha wngnai; takjak manwi taknaisano tamo “Bo ano tak ya” hwnwi saui da manno? Eba khe a takjak manwi sakduk rwui taknaino “Bini mungsa simani kwrwi” hwnwi saui da manno?

¹⁷Tei kwbáng dwk glak, Lebanon abo daktino bwthái kwbáng tháinai haphar wngnai tei bwthái kwbáng tháinai haphar abo bolong chanai.

¹⁸A salo nathongrok bijapni kóktháirokno khunju bai khnanai tei mwnago tongnai mokol nuk yarok mokol nuknai.

¹⁹Koinene bororok Subraiyung bai kwtal khe tongthoknai tei bororokni bisingo bigrarok, Israilni kwtharsano lob lainai.

²⁰Tamni hwn khe, cha ya bororok ma thaknai tei buino hamya sanairok rosajaknai tei samung hamya tangna bagwi lama naituknairok norjaknai.

²¹Buino khukni kók bai kebengnai khlai khe, hamna lama thángma-o bini bagwi khẃi thonnairok tei kók tháisa bai bujsói manna kati rwnairokno sokomornai.

²²Aboni bagwi Subraiyung hai hwnwi sa-o, Abrahamno sabo phiyók, Jakobni núkhungni kókno saui: “Jakob tei lachima man glak tei bini mwkhang komok wngna nang glak kha.

²³Tamni hwn khe bo bini bwsarokno nuk khe, bini bisingo ani yak bai tangma samungno nuk khe, bórok ani mungno kwthar khe tẃinai; bórok Jakobni a kwtharsano kwthar khe tẃinai tei Israilni Kaitorni bwskango kirima bai khe ma bachanai.

²⁴Phola-o korójakrok romwi mannai tei kók swbángnai bororok ang phrwngmano yachak lainai.”