Read Kok Borok JISAIA 3 Bible Online

JISAIA 3 - Kok Borok bible

JISAIA 3

¹Tamni hwn ba nai di, Subrai, sengkrakrokni Subraiyung Jerusalem tei Judani tangmung tei chubachurok bebak chámungrok, twirok rwma mwthagwi rosaui naui páinai.

²Phan gwnang tei sengkrak buj thumnai, diyari, sinai borok tei chakra borok

³khorokbachi sengkrakni bokhorok tei bórom khlaijaknai borok tei kókbiti sanairok tei tang kwrwng tei kók kwrwngrokno tlangwi páinai.

⁴Hakhe ang sikla chasloksarokno bórokni bokhorok khlainai tei haino chwrai bwsarok bórokno tẃidulnai.

⁵Khoroksa tei khoroksano sátok lainai, khoroksa tei khoroksa borok bai kebeng lainai, nok ari bai nok ari sátok lainai; khoroksa chwrai bo chakrano sak nang ya wngnai, borok kusu se bórom gwnangno kebeng anw.

⁶Bórok sakni buphani bosongni takhukno romwi hai hwnwi sa anw, “Nini kamchwlwi lolang tongma ba, nwng’-no chini tẃiphang wng di tei o báiwi tongjak hani barja nini yapha-o wng si thung.”

⁷A salo bo chirikhógwi hai hwnwi sa anw, “Ang ham rwnai wngwi man ya; ani nogo chámung eba rírok mungsa phano se kwrwi; norok ano bororokni bagwi tẃiphang ta khlai di.”

⁸Bórokni khúk bai tei samung bai khe Subraiyungno bini chẃngsachani bwskangno kebeng kha, aboni bagwi Jerusalem thutaiwi klai kha tei Juda khe klaiwi tháng kha,

⁹bórokni mwkhangrok se bórokni cha yano sijak rwui tong kha; Sodomni bororok hai bórok bórokni sumsokni bagwi se kung chuk lai-o. Abono sabo nuk nuk ya bórok abono samung nangjak ya. Abo bórokni bagwi bwswk se hamya wngno, tamni hwn ba bórok sak-sakni bagwi kwbángma birman tubu kha.

¹⁰Norok sutrang tongnairokno bórok bwswk se talikha kaham gwja hwnwi sa di, tamni hwn ba bórok sakni samungni bwtháirok ma chá anw.

¹¹Cha ya khlainairokni khe bwswk kirimasingcha! Bórok bwswk se kwpal hamya, tamni hwn ba bórok khlaima tẃi’-no bo’-bo khlaijaknai.

¹²Ani bororokno chwrairok se sátogo tei bwrwirok se bórokno tẃidulo. O ani bororok, bórok norokno lama koró rwui tẃi-o tei nini himma lamano sokomoro.

¹³Subraiyung buj sachuna bagwi bacha kha tei bini bororokni buj thumnani bagwi tiyar wngjak.

¹⁴Subraiyung bini bororokni okrarokno tei tẃiphangrokno buj thumna bagwi tubu-ui tongo. Bo hai hwnwi majra berwi sa-o: Nwng angur bwlwngrok hogwi pái kha, bigrarokni aroni namani manwirok bai norokni nok kupulung.

¹⁵Norok tamni bagwi ani bororokni bokhorok sukhrubwi tong tei bigrarokno kádul lai tong? hwnwi Subraiyung sengkrakrokni Kaitor sa-o.

¹⁶Subraiyung hai hwnwi sa-o, “Nai di Jerusalemni bwrwirok bwswk khe kung chuk! Bórok bukung surchaui him lai-o. Bórok mokol tail rwui philik lai-o. Bórok yakung kolwi him lai-o tei yakungni gugra pung rwui him lai-o.

¹⁷Aboni bagwi Subraiyung Siyonni sajwksongni bokhorogo kwsakhlainai tei bórokni sakni huijak manwino nukjak rwui rwnai.

¹⁸A salo Subraiyung bórokni kung chugui tongmani manwirokno segwi nanai, mathiyarok, khaju khama khwnaidukrok tei kotokni madlwirokno,

¹⁹khunjuni uakhum, bengkho, rítuku,

²⁰khorok sórma rí, yaktwk khamani rí, changni rítuku, langi thok motom tei changduk;

²¹mung mari yasitem tei bukungni longphu;

²²bebak naithok rírok, kamchwlwi kolok, dulai tei yago tẃijaknai kholjang bwsarok;

²³bórokni khutwng kesengni rírok, lilon kahamni rírok, khorok sórma rírok tei hungma rírokno khengwi khibinai.

²⁴Hakhe thok motom wng thani mwnam se wngnai, changni rí kha thani dwkhwi se khanai, naithok khnai kháljak wng thani khorok thunta se wngnai; naithok rí morok tẃi thani rí soroi se wngnai; tei naithok tongmani se lachimung se wngnai.

²⁵Nini chwlarok seng bai tei nini sengkrakrok choba-o thwi bainai.

²⁶Hakhe bini dugayungrok bebak kapsimang kap lainai tei bo sichi-lala wngwi ha-o achuk anw.