Read Kok Borok JISAIA 30 Bible Online

JISAIA 30 - Kok Borok bible

JISAIA 30

¹“Kók khna ya bwsarok bati nangjak,” hwnwi Subraiyung sa-o, kók chapmano tẃimani, phiya ba abo ani ya; tei kók kha lai-o, phiya ba ani pholani muchung tẃi ya, abo wng kha, bórok sumsokni saka-o sumsok boksinma se klai-o.

²Bórok ang bai kókbiti sa lai yaui’-no Ijip ha-o thángna bagwi lam rw kha, Pharaoni aro katiui bomna bagwi tei nono lachi rwna bagwi Ijipni saklomo tongthai naitugwi tháng kha.

³Aboni bagwi Pharaoni kati rwmung norokni lachimung wngnai tei Ijipni saklomo khorok bommanibo norokni mwkhang sókjaknai.

⁴Tamni hwn ba, bórokni tẃiphangrok Joano tong phano tei bini hani tẃitunrok Haneso sók phai phano;

⁵bebak phainairok, bórokni mungsa kaham khlai man ya bororokni bising tẃi phaimani lachimung máng se; chubachu buya eba tẃichru rwnai buya, tamo khe lachimung tei mwkhang khamna máng se tubu-o.

⁶Negebni yabrwi malrokno tẃiwi kók sajakma wng kha ahai; ha saka-o digi-sigi tei kengaijakni bisingo singho bwrwi masa tei singho chwla masa tei chibuk masa, chibuk birnai masa phai kha, bórok bórokni rangchak-rícharok koraichirkarokni saka-o boksaui tei bórokni rang-rírokno mangingangrokni saka-o boksaui tubu-ui bororokni aro phai-o hai phano a borok bórokno hamcha rwui man glak.

⁷Tamni hwn khe Ijipni chubachu mungsa chúk ya tei bukcha; aboni bagwi ang bono, “Rahab chók-chók achugwi tongnai” hwnwi mung pharo.

⁸Tabuk tháng di, bórokni bwskango o kókno holong bwlabo khe swi di tei bijabo kóktháirok swi di; abo ulni dopharokni bagwi kusung kusungni nukmung mari tong rwk thung.

⁹Tamni hwn khe bórok wng kha kók khna ya tei tatal gwja; bórok Subraiyungni phrwngmano khnanani lon ya gwja.

¹⁰Bórok nukmung nuknairokno hai hwnwi sa-o, “Ta nuk si thung” tei diyarirokno chwngno kók kubui kók diyari ta sa thung; chwngno tongthokni kók tei kothoma hairokni kók diyari simi se sa di,

¹¹lam phér di, lama yakarwi him si di, Israilni a kwthar kukni kók chwngno tei ta khna rw si di.

¹²Aboni bagwi’-no, Israilrokni Kwthar kuk hai hwnwi sa kha, “Tamni hwn khe norok o kókno sak nang ya wng kha tei sátoknairok bai tongmung sitra tongnairokni thani khá bera kha tei bórokno poito khe tong lai kha;”

¹³aboni bagwi o sumsok norokni bagwi deual kuchuk kuakma tẃi wngnai, deual kekhokma hai wngnai, omo achomsa kuak srapsani bisingo’-no wngnai;

¹⁴tei omo báimani abo twk taknaisani twk báima hai kheno abono swbai sukhrubwi khibinai, abo bai thapani hór khokchana eba twikhorni twi khokna bagwi biphiring kaisa phano man glak.

¹⁵Tamni hwn khe Subraiyung Kaitor Israilrokni a kwthar hai hwnwi sa kha, “Kiphilwi phaiwi kwchang kwchang khe tong khe, norok mwthangjaknai; tei siring siring khe poito khlai tongmano norokni phan wngnai,” hai phano norok soi glak,

¹⁶phiya norok hai hwnwi sa kha, “I’nhi! Abo tẃi ya, chwng korai kasaui doui thángnai,” aboni bagwino norok doui thángna nangnai; tei norok hai hwnwi sa kha, “Chwng donai kuk korai kasaui thángnai,” aboni bagwino norokno riphriknairok do kugui thángnai.

¹⁷Khoroksa borokno khoroksai bororokno khár rw anw. Khorokbano kiriui norok pái súgwi khár anw, abo bai norok hachuk bochlongni bana khachima buphung eba hachuk bwsate saka-o nukmari simi hai se wngnai.

¹⁸Aboni bagwino Subraiyung norokno khairoknani bagwi naisingwi tongo; tei aboni bagwi bo norokno khairokna muchungma bai sakno kuchuk khe tisaui tongo. Tamni hwn ba Subraiyung wng kha bujsói tẃinai Kaitor; bono naisingwi tongnairok hamchajak.

¹⁹Kubui’-no, o Siyonni Jerusalemo tongnai bororok; norok tei kapna nang glak. Nini kapmani khorang khnaui bo nono khá se khairoknai; bo abono khna khe nono uphilwi sanai,

²⁰tei Subraiyung norokno kolomtwi khiklaiwi chámung tei sátokmungni twi rw phano, norokni phrwngnai tei huijagwi tong glak kha, phiya nini mokol baithang nini phrwngnaino nuknai.

²¹Tei nini khunju-o uklokni simi omo hai kók sama khna anw, “Omo se lama, o lama tẃi’-no him di,” nwng yagra phano eba yaksi phano phér khe,

²²hakhe norok norokni takjak rukphai bai khopjak mwtairokno tei rangchak gele rwui khopjak mwtai mangrokno dera rwui rw di. Nwng abórokno manwi sitrarok hai khe khitarwi rw bai di; tei bórokno, “Khár di, khár di!” hwnwi sa di.

²³Tei ha-o bwchlwirok pinmani-o, bo nini bwthái-bwchlwirokni bagwi uatwi rwnai, abo bai ha-o kwbángma burung-burung khe tháinai. A salo nini mal-matarokni bodolrok ada chánai.

²⁴Musukrok tei koraichirkarok bebakno chámung kaham tei chokjak chámung, sabuljak chwkap chá anw.

²⁵Tei a uanamasingcha borok butharma salo bebak nok kuchukni bosokrok báiwi klai anw, a salo bebak hachuk tei hapungrogo twisa yornai.

²⁶Tei a salo Subraiyung bini bororokni kwsarokno khaui rw phuru tei bo bai bujakma kwsano ham rw anw, a salo talni pohor salni pohor hai wngnai tei salni pohor khe kaisni salni swk kwbáng wngnai, phiya salsa-o salsnini pohor bai baksa chẃngnai.

²⁷Nai di Subraiyungni bumung hakchalni phai-o, bini thamchini hór chẃngwi tongo tei rwja hoku budul kasajak; bini khukchwi-o thamchi kupulung, bini bwslai sókpronai hór hai.

²⁸Bini hama twi torwi tokhlai phaima hai, abo totra jora sógwi kha; abo bebak dopharokno sokomornai, jangini bai chwkainai; tei bororokni búkhúgo lama korómungni jing thepjaknai.

²⁹Kwthar terni horo rwchapmung rwchap tẃi khe norok rwchap lainai; tei bororok Subraiyungni hathái-o Israilrokni holongni thani tháng phuru sumui tamma hai khe’-no norokni bwkhani tongthokma mannai.

³⁰Subraiyung belai jolima, khampronai hór, nokbar-uatwi tei kothor klaima bising tẃi bini phankrak khorang bororokno khnana rwnai tei bunani bagwi bini yak pholokmano phunuknai.

³¹Tamo khe Subraiyung bini raidang bai swprak phuru khe bini a khorang bai Asiriyarok kirima chá bainai.

³²Tei Subraiyung bórokno majrani bagwi swprakma swk’-no kham bwsa tei chongpreng khorang khe tamjaknai; tei bo a dopharok bai yaktwk jangriui choba nang lainai.

³³Tamo sóknani bagwi sal kwbángma swkang’-no sóknani bagwi tiyar khlaijakmani; omo habugrani banta tiyar khlaijakmani, bo abono kuthuk tei kuar khlai kha, bini simalwngo hórni bagwi bol kwbángma; Subraiyungni hama gwndwkni hórjlai kochokma hai wngwi abono sóknai.