Read Kok Borok JISAIA 32 Bible Online

JISAIA 32 - Kok Borok bible

JISAIA 32

¹Nai di, bugra khoroksa kubui bai khe hano naikolnai tei bokhorokrok bujsói bai tẃithernai.

²Bórok bebakno nokbar kotoro khárjakthai hai wngnai tei bangkundri-o kati rwnai hai tei ha kwrano twisa yor tẃi tei kirimasingcha ha-o khamprajak holongthai kotor bai saklom rwma hai wngnai.

³Hakhe mokol baithang nuknairok mukum glak tei khnanairok khunju kaichomwi khnanai.

⁴Tei khá sina rwng ya borok bo simung kahamno mannai tei kók kwchaui sanairokbo srai-srai khe tei juda khe kók sanai.

⁵Butuarokno tei borok kotor hwnjak glak tei phemloknairoknobo bórom gwnang hwnjak glak.

⁶Tamni hwn khe, butua kók mwlang-kwlang sa-o tei bini bwkha-o hamya chabo tei Subraiyungno hamya hwnwi sa-o, ok khuinairokno ok bukcha khe rwi rohoro tei twi kangnairokno nungnani seple-o.

⁷Phemloknairokni chapmani abo hamya; bo tatal kók saui bigrarokno sokomorna bagwi hamya uansukma bai khe hamya chabo, kwrwirokni samani kók sói nangma kók phano, bo cha yano uansugo.

⁸Phiya ba, borok kotor kaham kaham uansukmungno uansugo tei bo kahamno tẃiwi’-no bachaui tongo.

⁹O uanama kwrwi bwrwimasong, bacha di, ani khorangno khna di; o khá tongthokjak sajwkrok ang sama kókno khna di.

¹⁰O mungsa sak nangjak ya bwrwirok, nokha bisi sani bara jora norok uana lai anw, tamo khe angur bwtháirok krainai, bwthái khaknani jora sók phai glak.

¹¹O mungsa sak nangjak ya tongnairok kiri di, o tongthok khe tongnairok uana lai di; kanmung chummung khugwi pái di, chango rí soroi kan di.

¹²Haphar naithokno tei bwthái kwbáng tháinai a angurni bagwi sak sakni khaklap bu lai di.

¹³Tamni hwn khe ani bororokni hapharo busu tei atakereng se er si-o; abo tongthotok kamiyungni bebak tongthok núkhungrogo abo achainai.

¹⁴Tamni hwn khe, noyung ma khibijaknai, hohom-dodom kamiyung bukcha khe khibijaknai; hachuk tei mwrwkma nok kuchuk mol brúm brúmni bagwi hakhor wngwi bolongni koraichirkarokni tongthotok thai tei mal-matarokni bagwi sula wngnai.

¹⁵Kuchuk sakani phola chini saka-o lukhlaijak ya sak, hasing haphar bwthái-bumuk tháinai wng ya sak tei haphar bolong hwnwi romjak ya sak,

¹⁶aphuru a hasing hapharo bujsói tẃijagwi tongnai tei a bwthái-bumuk gwnang hapharo kubui máng wngwi tongnai.

¹⁷Tei sói khe samung tangjakma bagwi aro tong kwchang wngnai; tei sói khe tangjakmani bagwi, siring siring wngnai, kusung kusung bwkha berajaknai.

¹⁸Tei ani bororok khakchang tongthai-o, kirima kwrwi-o khe kwchang kwchang khe lenglaui tongwi mannai.

¹⁹Phiya ba bolong uáisa bai’-no báiwi tháng bainai tei kamiyungrok bo uáisa bai’-no ha-o miligwi thángnai.

²⁰Norok twirukungo bwchlwi sarwi musuk tei koraichirkarokno phiyógwi chá rwnairokno hamchajak.