Read Kok Borok JISAIA 33 Bible Online

JISAIA 33 - Kok Borok bible

JISAIA 33

¹Swbainaisa, nwng bati nangjak, nwng sak baithangbo swbaijak ya kho; o phemloknaisa nono khoroksa phano phemlok ya kho! Nwng swbaima thak kheno, nwng swbaijaknai; nwng phemlokma yakar kheno, nwng phemlokjaknai. Swbai sukhrupma samung pái sukmani ulo nwng swbai sukhrupjaknai; phemlok baiwi pái súk khe nwngbo bui bai phemlokjaknai.

²O Subraiyung, chwngno khairok ja di; phung ai brúmno chini yaktwk wng ja di, digi-sigini jora-o chini mwthangnai wng ja di.

³Nini phirang hai khorang khnaui bororok khár bai kha, nwng bacha ma bai dopharok oroi-poroi wng bai kha;

⁴tei hamyarokno yóngphakrok thumma hai khe bororok norokni sekproma manwirokno thumnai; kuk bodolrok bársama hai khe bororok bórokni saka-o bársa lainai.

⁵Subraiyung lobsajak; tamni hwn khe bo kuchugo tongo: Bo Siyonno bujsói tei kubui bai supungnai;

⁶tei bo nini jora-o kwrak wngnai, mwthangjaknani phan, simung tei rwngmung bai beglai rwnai; Subraiyungno kirima wng kha bini rangkhók.

⁷Nai di, bórokni bwkha kotor borok haino kapnai; kwthamungni bagwi rohorjaknairok muisubuk cháui kap lainai.

⁸Lahar kotorrok bebakno bukcha máng, himnairok kwrwi kha. Swmairok swbaijak kha, nugwi sanairok sak bokjak li ya gwja tei khoroksa phano bórokno chernai kwrwi kha.

⁹Ha kap lai-kok lai wng kha tei lengprojak; Lebanon lachimung man kha tei rampra kha; Saron hasing haphar hai wng kha tei Basan bai Karmelni bebak bwláirok swkraijak bai kha.

¹⁰“Ang tabuk bachanai,” hwnwi Subraiyung sa-o, “Tabuk ang sakno kuchugo tisa sinai; tabuk ang bórom khe lobjaksinai.

¹¹Norok gundakno ogo chu kha tei chwkap bá kha; norokni hama hór hai, abo norokno monok anw.

¹²Tei bororok chwndwi sókjak hai wngnai; tei tanwi sókjaknai busurok hai wngnai.”

¹³O hakchalo tongnai bebak bororok, ang tamo khlai kha khna di; tei norok sampha-o tongnairok ani phanno saui man di.

¹⁴Siyonni sumsok gwnangrok belai kirijak bai kha; Kaitorno kiri ya bororok kwlwibra bai kha, bórok hai hwnwi sa lai kha, “Chini bisingo sabo khampro rwnai hóro tongwi mannai tong? Chini bisingo sabo thwi phlai ya hórjlai-o tongwi mannai tong?”

¹⁵Kubui lama-o himo tei sói kók kubui sanai, kusubwi manmano selengnai, yak bara rang tukmarokno yago nangnai se hwnwi yak jangrinai, butharnani kókrok khnanai se hwnwi khunju muthubwi tongnai tei samung hamya khlaima nuknai se hwnwi mukumui tongnai borok,

¹⁶bo kuchuk saka-o tongnai; bini katimung nok kwrak khe holongni wngnai; bini chámung bono rwjaknai tei bo nungjaknai twi man suknai.

¹⁷Nini’-no mokol baithang bugrano bini naithokma tẃi nono nuknai; bórok hakchal jora pholokjak a hano nuknai.

¹⁸Nini khá-o a kirimano tẃiwi hai hwnwi uansuknai; “A lekhanai buko buro? A khangnai ba buro? Tei a nokni bororokno lekhanairok ba buro?”

¹⁹Nwng tei a thamchi kutung bororokno nuk phir glak, a bororokni kókno nwng man ya tei buini hani bororokni kók, nwng romwi man ya.

²⁰Chini terni pandarokni bagwi chongjak kamiyung, Siyonno naharwi nai di! Nini mokol bai kwchang kwchang tongthai Jerusalemno nuknai, kwrak ríni nok, bini thongrok tei phuichajak glak tei aboni twngsa dwkhwi phano cho glak.

²¹Tamo khe Subraiyung sakni phankrak phan bai chini bagwi twima kotor tei twisa kuar wngnai; aro chwrwi ua bai chogwi rungrok tháng phai khlai glak tei phan gwnang rungkotor phano basu-ui phai man glak.

²²Tamni hwn khe Subraiyung se chini buj thumnai, Subraiyung se chini tẃithernai, Subraiyung se chini bugra; bo’-se chwngno mwthangnai.

²³Nini dwkhwi khajakrok luthurwi kengjak; bórokni chokphungno kwrak khlaiwi man ya, choknabo man gra li ya, aphuru kwbángma sekmani manwirok banta khe na lai kha; khorarok phano sekma manwirokno man anw.

²⁴Tei kami khungsa phano hai hwnwi sa glak, “Ang sak hamya;” tei aro tongnai bororokni sumsok nakarjak bainai.