Read Kok Borok JISAIA 35 Bible Online

JISAIA 35 - Kok Borok bible

JISAIA 35

¹Haphar bukcharok tei hakung kwranrok tongthok anw, hasing haphar tongthok anw, tei aro podrepot khumrok bar anw;

²aro kwbángma khumrok barnai, tei tongthok lainai tei rwchap lainai, ahaino chẃngsachano rwjaknai, Karmel tei Saronni suarno rwjaknai. Bórok Subraiyungni chẃngsachano nuknai, tei chini Kaitorni bóromno nuknai.

³Yak kebelrokno rak rw di, yáskú kebel kwrak wng di.

⁴Bwkha-o kiriui tongnairokno hai hwnwi sa di, “Kwrak wng di, ta kiri di! Norokni Kaitor yagul sunani bagwi, tei su-ui rwnani bagwi phainai, bo phaiwi norokno phiyók phainai.”

⁵Aphuru phularokni mokol nuk rwjak bainai, tei nathongrokni khunju kuphúngjak tong glak;

⁶aphuru khorarok mwswi hai khe baharnai, tei bobarokni bwslai tongthogwi rwchapnai.

⁷Tamni hwn khe hasing kutung pukhiri khanai, tei twi kangjak hapharo twimuk chersanai; siyalrokni tongthairok buduk buphangrok tei jabrarokni bwlwng wngnai.

⁸Aro kaisa lahar kotor wngnai, tei abo lama kwthar hwnwi hwnjaknai; sumsok gwnangrok a lama tẃi himwi man glak; tei butuarokbo a lama-o lama koró glak.

⁹Aro singho masa phano tong glak; mungsa uátharnai yabrwirokbo aro phai glak; abo hairokno aro nuk glak, phiya ba phiyókjak bororok simi se a lama tẃi him anw.

¹⁰Tei Subraiyung bai phiyókjak bororok simi’-no kiphilwi phainai, bórok tongthogwi rwchapmung bai khe Siyono hap phainai. Bórokni khorogo pái phlai ya tongthok tongnai; bórok khá srangma bai tongthokma bai kupulung wngnai; tei tong khochor bai kirimung khárwi thángnai.