Read Kok Borok JISAIA 36 Bible Online

JISAIA 36 - Kok Borok bible

JISAIA 36

¹Habugra Hejekiani nokha bisi chibrwini jora-o Asiriyani habugra Senacherib Judani bebak chokdeual bai kitingjak kamiyungrokno choba khlaiwi segwi na kha.

²Aboni ulo Asiriyani habugra Rabsakeno sengkrak bodol kotor bai khe Lakhisni simi Jerusalemni habugra Hejekiani thani rohor kha. Tei bo aro thángwi sakani pukhirini twisa ganani laharni samni rí supnaini phalnok gana-o bathagwi kha.

³Ulo Hilkiani bwsla bugrani nokni barja Eliakim tei tangkra Sebna swi kwrwng, phiya Asapni bwsla Joa láibuma swinaisa aro ongkhorwi phai kha.

⁴Hakhe Rabsake bórokno hai hwnwi sa kha, “Hejekiano o kókno sa di, ‘Bubagra kotor Asiriyani bugra o kók sa-o: Nwng tamono tẃiwi bwkha beraui aswk khá-o poito wng kha?

⁵Haino búkhúkni kókrokno da nwng ba chobani kókbiti tei phan hwnwi uansuk? Nwng tabuk sabono bwkha beraui ano kebengwi bacha kha ba?

⁶Nai di, nwng Ijipno bwkha beraui tongo, abo raidangni dwkhwi kocho se, khoroksa swk aro bwkha beraui yak rw khe bini yago busu se panai. Ijipni bugra Pharaono khájaui tongnairokno bo abo haino khlai-o.

⁷Phiya ba, nwng ano hai hwnwi sa khe, “Subraiyung chini Kaitorno se chwng bwkha beraui tongo,” hakhe bo ba abo ya diba, kuchuk khe snamjak khulumna bagwi khulumthai tei háyárokno nor baiwi Hejekia, Juda bai Jerusalemno hai hwnwi sa kha, “Norok o háyá-o suri lai di?”

⁸Tabuk aboni bagwi ani bubagra Asiriyani bugrani thani kók rw di, hwnwi ang nono koiwi sa-o: Tumungno nini aro korai kanai kwrwngrok tong khe ang nono mak nwisai korai rwnai.

⁹Ijipno se nwng korai malkhung bai korai kanai sengkrakrokni bagwi bwkha beraui tongo hwn khe, bahai khe ani bubagrani kotoi kuk sengkrak bokhorok khoroksano phano mechenwi mannai?

¹⁰Tei se, ang ba Subraiyungni kók na yaui da o hano sokomorna bagwi phai ba? Subraiyung se ano tháng di a hano kebengsaui sokomor di hwnwi sa-o. ’ ”

¹¹Hakhe Eliakim, Sibna tei Joa Rabsakeno hai hwnwi sa kha, “Chwng koi ja-o, nini selengrokno Arami kók bai sa di, tamni hwn khe chwng abono romwi mano; chokdeual saka-o tongnai o bororokni gana-o chini thani Hibru kók bai kók ta sa di.”

¹²Phiya ba Rabsake hai hwnwi sa kha, “Ani bugra ba nini bugrani thani tei nini thani o kókrokno sanani bagwi da ano rohor? Tei swraimung nangjak a chokdeualo achuk laijak bororok norok bai baksa sak sakni khi chánani tei sakni sẃtwi nungnani bagwi bórokni thani khe rohorjak ya diba?”

¹³Ulo Rabsake bachaui Hibru kók bai chirikhógwi hai hwnwi sakhlai kha, “Norok bubagra kotor Asiriyani bugrani kókrokno khna di!

¹⁴Bugra hai hwnwi sa-o: ‘Hejekia bai norok ta phemlokjak di, tamni hwn khe bo norokno mwthangwi man glak.

¹⁵Tei Subraiyung chwngno mw se mwthangnai tei o kamiyung Asiriyani bugrani yago rw se rwjak ya hwnwi Hejekia bai sajagwi Subraiyungno khá ta bera rwjak thung.’

¹⁶Norok Hejekiani kókno ta khna di; tamni hwn khe Asiriyani bugra o kók sa-o; ‘Norok ang bai se kwthaui tongna bagwi kók kha di tei ongkhorwi ani thani phai di; hakhe norok bebakno sak sakni angur bwthái bai khwichang bwthái ma chánai tei bebakno sak sakni twikhorni twi ma nung anw.

¹⁷Ulo ang phaiwi norokno ani sakni ha hai kwrẃngsa ha-o, bwthái bwchlwi bai angur bwtwini ha-o auan bai angur barini ha-o norokno tlangwi thángnai.

¹⁸Subraiyung chwngno phiyóknai hwnwi, saui Hejekia bai lama koró rwjak ya tẃi khe hus wng di. Dopharokni mwtairok masa swk Asiriyani bugrani yakni hano phiyógwi da man kha ba?

¹⁹Hamat bai Arpadrokni mwtairok buro? Sepharbaimni mwtairok le buro? Bórok Samariano ani yakni phiyógwi da man kha?

²⁰O bebak harokni mwtairok ani yakni bórokni hano buro phiyók kha ba? Hakhe Subraiyung tamni bagwi Jerusalemno ani yakni phiyóknai?’ ”

²¹Phiya ba bororok siring siring khe tong lai kha, bini kókno tháisa phano uphilwi sa li ya, tamni hwn khe “Uphilwi bono kók ta sa phi di” hwnwi bugra bai dagijakma tongo.

²²Ulo Hilkiani bwsla bugrani nokni tangkra Eliakim, Sebna swinaisa bai Asapni bwsla láibuma swinai Joa sak sakni rí sichigwi Hejekiani gana-o phaiwi Rabsakeni kókrokno bono sa kha.