Read Kok Borok JISAIA 37 Bible Online

JISAIA 37 - Kok Borok bible

JISAIA 37

¹Bugra Hejekia o kókno khna kheno sakni rí chir kha tei rí soroino chum kha hakhe Subraiyungni nogo tháng kha,

²tei bo bugrani nokni barja Eliakim bai tangphang swinaisa Sebnano tei ochairokni bere okrarokno rí soroi chum rwui Amojni bwsla Jisaia diyarini thani rwi rohor kha.

³Bórok bono hai hwnwi sa lai kha, “Hejekia hai hwnwi sa-o, ‘Tinini o sal wng kha tong khochorni sal, kuljakma sal, lachimungni sal; chwrai achainani jora wngjak, phiya ba bánani phan se kwrwi.’

⁴Asiriyani bugra kwthang Kaitorno lachi rwna bagwi rohorjaknai Rabsakeni kók samarokno Subraiyung nini Kaitor khna khwna tei Subraiyung nini Kaitor khnama hai kheno bo’-bo kulnai; aboni bagwi tabuk jora a tong rwknairokni bagwi nwng suri san di.”

⁵Bugra Hejekiani selengrok Jisaiani thani phaiwi sók phai khe,

⁶Jisaia bórokno hai hwnwi sa kha, “Norokni bugrano o kókno sa di, ‘Subraiyung o kók sa-o: Nwng a khnamani kók bai ta kiri di, o kók bai’-no Asiriyani bugrani selengrok ano naislerjagwi kebeng lai-o.

⁷Nai di, ang bini bisingo kaisa phola rw anw, hakhe bo mungsa swk kók nathong khna anw tei bini sakni ha-o kiphilwi tháng anw; aboni ulo ang bini ha’-ono bono seng bai buthar anw.’ ”

⁸Rabsake kiphilwi tháng kha tei thángwi nugwi kha, Asiriyani bugra Libna bai khe choba nangwi tong lai-o; tamni hwn khe bugra Lakhisni tháng kha hwnwi khna kha.

⁹Tabuk habugra Ithiopiani habugra Tirhakani kókno hai hwnwi khna kha, “Bo nwng bai choba nang lainani bagwi ongkhorwi phai kha.” O kókno khna khe, bo Hejekiani thani tẃitun tun rohorwi sa hor kha,

¹⁰“Norok Judani bugra Hejekiano o kókno saui di: Norok poito khlaima Kaitor bai Jerusalem Asiriyani bugrani yago yapharjak glak hwnwi saui ta bandijak di.

¹¹Nai di, norok khna kha, Asiriyani bugrarok bebak harokno tamo tamo khlai kha, khairok yaui sokomor súk kha. Hakhe nwng yó de yókno ba?

¹²Ani chuchusong sokomorma a Gosan, Haran, Rejep tei Telasarni Edeno tongnai dopharokno bórokni mwtairok phiyógwi da man kha ba?

¹³Hamatni bugra Arpadni bugra, Sepharbaim kamiyungni bugra, Henani bugra tei Ibauni bugra buko biyang?”

¹⁴Hejekia tẃitunrokni yakni kóktun man kha tei abono poriui nai kha; tei Hejekia Subraiyungni nogo tháng kha tei Subraiyungni bwskango abono phehelwi rw kha.

¹⁵Hakhe Hejekia Subraiyungni thani hai hwnwi suriui sa kha:

¹⁶“O sengkrakrokni Subraiyung, Israilrokni Kaitor, cherubrokni saka-o achukthayungo achuknai swngcharni bebak hani Kaitor; nwng’-no nokhano tei hano snam kha.

¹⁷O Subraiyung, khunju kaichomwi khna ja di; O Subraiyung mokol phiyógwi naisik ja di; kwthang Kaitorno lachi rwna bagwi Senacherib kók sa hormarokno khnaui nai di.

¹⁸Omo kubui’-no, o chini Subraiyung, Asiriyani bugrarok ha sakani bebak dopharokno tei bórokni harokno sokomorwi bukcha khlai rw kha,

¹⁹bórokni mwtairokno hóro khiklaiwi rw bai kha; tamni hwn khe abórok mwtai ya, bororok yak bai snamjak buphang tei holongrokni se; aboni bagwi abórokno swbaiwi sokomor bai kha.

²⁰Hakhe tabuk o Subraiyung chini Kaitor, nwng chwngno bini yakni mwthang gra si di, hakhe ha gwnangwini bororok nwng simi se khoroksa susuk Kaitor hwnwi saui mannai.”

²¹Aboni ulo Amojni bwsla Jisaia Hejekiani thani hai hwnwi sa horwi rohor kha, “Israilni Kaitor Subraiyung hai hwnwi sa kha: nwng Asiriyani bugra Senacheribni kókno tẃiwi ani thani suri kha,

²²Subraiyung bini kókno tẃiwi o kók sa kha; ‘Siyonni bwrwi sikla kwthar nono sak nang ya wng kha, bo nono hamya sa kha; o Jerusalemni sajwk bo nini uklogo khorok jangri kha;’

²³nwng sabono lachi rwui tong? Sabono kebengwi tong? Sabono kebengwi khorang chirigwi tong? Tei kung chugui saka-o naisaui tong? Israilni kwthar kukno se kebengo hai ya da!

²⁴Nwng nini selengrokni tẃi khe Subraiyungno lachi rw kha tei nwng sa kha; ang ani korai malkhungrok bai khe hachukni buchuk jora kasaui kha, Lebanonni hakchal jora tháng kha. Ang bini kuchuk tei kotor sidar buphangrokno tei kaham kuk buphangrokno bebak tan bai kha.

²⁵Ang twikhor khurwi twi nung kha, ang ani yakungni yakorai bai Ijipni bebak twisarokno phwran bai kha.”

²⁶“Nwng khna ya kho diba bisi kwbángma swkango’-no ang omono chongwi tongmani? Bisi kwbángma swkangni simi’-no khá-o tonwi tongmani, ang tabuk abono phnang kha. Nwng kamiyung kwrakrokno swbai sukhrubwi haplok khe rúng di,

²⁷bórokni aro tongnairok phan chúk ya, bwkha báijak tei lachima manjak tei hapharni jabra hai wng kha, jabra kwlwi hai, núkhúng sakani jabra hai tor ya sini’-no hoiwi pái-o.

²⁸“Ang, nwng achugwi tongmani, phataro ongkhorwi thángmani, bisingo hapmani tei ano kebengwi nini thamchi phunukmani bebakno ang saui mano.

²⁹Tamni hwn khe nwng ano kebengma tei ano jolimani kók ani khunju-o klai kha, aboni bagwi ang nini bukungo bosoi biching bai khe kwcha rwnai tei nini búkhúgo jing thepanai tei nwng phaimani a lama tẃi’-no nono kiphil rwnai.”

³⁰“Hakhe omo nini bagwi mari wngnai; o bisi-o haino mai-khul wngmano chá lai di tei nokha bisiknwi bisi-o aswkno aswk bwthái bwchlwi wngnai tei nokha bisik thamni bisi-o bwchlwi sarwi bwthái bwchlwi ra di tei angur bari khlaiwi aroni bwtháirokno chá di.

³¹Juda bosongni yógwi tong rwknairok, bórok tei uáisa bisingo yarwng súnai tei saka-o khe bwthái tháinai.

³²Tamo khe yógwi tong rwknairok Jerusalemni nongkhorwi thángnai, Siyon hachugo yógwi tong rwknai bodol phataro ongkhorwi tubujaknai. Sengkrakrokni Subraiyungni muchungma abo wngnai.”

³³“Aboni bagwi Asiriyani bugrano tẃiwi Subraiyung hai hwnwi sa kha; bo o kamiyungo phai glak, eba aro chakhla kok glak, aro phui tubu-ui phai glak, eba gerebwi tokjak glak.

³⁴Bo phaimani lama tẃi’-no kiphilwi tháng phinai, bo o kamiyungo phai glak, hwnwi Subraiyung sa-o.

³⁵Tamo khe ang sakni bagwi tei ani seleng Daudni bagwi o kamiyungno kati rwnai.”

³⁶Aboni ulo Subraiyungni suari swkang thángsogwi Asiriyani sengkrakrokni bathamni khorok sara tei charchibarokno butharwi kha; bororok aichugo bachaui bebak mang kwthwi klaijak nuk kha.

³⁷Aboni ulo Asiriyani bugra Senacherib nogo kiphilwi tháng kha tei thángwi Ninobi-o tongwi kha.

³⁸Ulo bo bini mwtai Nisrokni nogo thángwi khulumui tongmani jora-o, bwslasong khoroknwi Adramelek bai Sarejer bono tanwi buthar kha, ulo khe bórok Ararat ha-o khárwi tháng kha. Tei bini yakchu-o khe bwsla Esarhadon bugra chá kha.