Read Kok Borok JISAIA 38 Bible Online

JISAIA 38 - Kok Borok bible

JISAIA 38

¹Omo hai jora-o Hejekia hamya klaiwi thwi twtwi wng kha. Hakhe Amojni bwsla Jisaia diyari, bini thani-o phaiwi bono hai hwnwi sa kha, “Subraiyung hai hwnwi sa-o; nwng nini núkhungo tiyar khlaiwi ton di, tamni hwn khe nwng thwinai, nwng tei kwthang tong glak.”

²Hakhe Hejekia chokdeual phaising mwkhang rwui Subraiyungni thani suriui,

³hai hwnwi sa kha, “O Subraiyung, nono ang koija-o, nwng tabuk ano muitu khlai ja di; ang nini bwskango bwswk kubui bai tei bwkha rw súgwi tong kha tei nini mokolo kaham hwnwi chajakma tẃi’-no khlai kha.” Tei Hejekia belai chirikhógwi kap kha.

⁴Aphuru Jisaiani thani Subraiyungni o kókthái sók phai kha;

⁵“Tháng di Hejekiano saui di, nini chuchuni Subraiyung Daudni Kaitor, o kók sa-o, ‘Ang nini surimano khna kha; ang nini mokolni muktwi nuk kha; nai di, ang nini langmano tei nokha bisi chiba phologwi rwnai.’

⁶Hakhe ang o hano Asiriyani bugrani yakni phiyógwi nono rwnai tei o kamiyungno kati rwnai.”

⁷“Omono nini bagwi Subraiyungni aroni mari wngnai, bo swmai tangwi kók rwma haino Subraiyung khlainai.

⁸Nai di, ang Ahasni bagwi saklom yapri yakamchi uslu rwnani bagwi salno uslu rwnai. Hakhe sal uslu-ui tháng khe sampili yapri yakamchi uslu-ui tháng kha.”

⁹Judani bugra Hejekia bini sak hamya wngwi hammani ulo swi lang kha, omorok wng kha ahai:

¹⁰Ang sa kha, ani umorni sal kwpacholong tong phuruno ang thángthai; o ang mangkhorni duglamo hapnai, ani umor khakjak jorano ang koró kha.

¹¹Ang sa kha, ang Subraiyungno kwthangrokni o ha-o tei nuk glak; o ha saka-o tongnai bororokno ang tei naisik glak kha.

¹²Mera mwrwknairokni rínokrokno norjakma hai khe ani tongthai norjak kha; ang rí taknairok rí dolsama hai khe ani langmano dolsa kha; bo rí takma thantini ano tansu-ui khibi kha; nwng ano salsa horsani bisingno pái súk rw anw.

¹³Ang phung jora chubachuni bagwi kap kha, bo singho hai khe ani bekrengrokno swbai kha; Nwng ano salsa horsani bisingo’-no pái súk rw anw.[21]

¹⁴Monoknai hai, eba twini takhumsa hai khe khorang khlai tongmani, tokthu hai kengaiwi pungwi tongmani. Saka naisa te naisa te ani mokol ruai súk kha, o Subraiyung, ang sátokjak kha; Nwng ani mwrwknai wng ja di!

¹⁵Hai phano ang tei tamo sanai? Bo ano sa kha, tei bo sakphang se omo hai khlai-o. Ani langmani tektoni bagwi, ani bebak muktrwi khárwi tháng bai kha.[22]

¹⁶O Subraiyung, omorok bebak bai’-no bororok kwthang wngwi tongo, tei omorok bebak bai’-no ani pholani langma; ani sak ham rw ja di, ano mwthangwi ton ja di!

¹⁷Nai di, o tekto manjakma ani kahamni bagwi se; ang belaino tekto man kha; phiya ba nwng ani langmano komor thai hakhorni kati rw kha,[23] nwng ani bebak sumsokrokno nini uklogo khibiui rohor kha.

¹⁸Kwthwirokni hakhor nono hambai rwui man ya, kwthwibo nono lobwi man ya; nini kók narwkmungno hakhoro thángnairok khatungwi man ya.

¹⁹ang tini khlaima haino kwthang bororok nono hambai rw-o, ang tini nono abo khlaiwi tongo; bupha bwsarokno nini kók narwkmano saui khna rw anw.

²⁰Subraiyung ano mwthangnani, aboni bagwi ani rwchapmung bwtangno chwng chongpreng tamwi rwchap lai anw, sal brúm brúm chini thangsungo Subraiyungni nogo rwchap lai anw.

²¹Aphuru khe Jisaia hai hwnwi sa kha, “Hamnani bagwi bórok tabuk khwichang bwtháino phereui kula-o phul thung.”

²²Aphuru Hejekia omo haibo hwnwi sa kha, “Ang Subraiyungni nogo tamo marino nugwi thángnai ba?”