Read Kok Borok JISAIA 39 Bible Online

JISAIA 39 - Kok Borok bible

JISAIA 39

¹A jora-o Baladanni bwsla Merodak Baladan Babilonni habugra. Bo Hejekiano hamya klaimani tei hammani kókno khna khe bini thani kóktun tei hili rwi rohor kha.

²Hakhe Hejekia bórokno lamsok kha tei bini rwbam nok, rukphai, rangchak, motom bakhorrok, manthok ya thokrok tei bebak chobani manwi rúngma nok tei bebak rwbamrokni tong-kwrwi manwirok bórokno phunuk kha. Hejekia bórokno phunuk li ya, abo hai mungsa manwi phano bini nogo eba bini bebak ha-o kwrwi kha.

³Ulo Jisaia diyari bugra Hejekiani thani phai kha tei bono hai hwnwi sẃng phai kha, “A bororok tamo sa phai? Tei a bororok buphuru nini thani phai?” Hejekia hai hwnwi sa kha, “A bororok hakchal ha Babilonni se ani thani phai-o.”

⁴Bo hai hwnwi sẃng phi kha, “Bórok nini nogo tamo tamo nuk kha?” Hejekia hai hwnwi sa kha, “Bórok ani nokni tong kwrwi bebakno nuk bai kha; bórokno ani rúngma nogo tei rwbamo tongma abo tẃi mungsa manwi phano phunuk ya kwrwi kha.”

⁵Aboni ulo khe Jisaia Hejekiano hai hwnwi sa kha, “Sengkrakrokni Subraiyungni kókno khna di.

⁶Nai di, omo hai salrok sók phai anw, aphuru nini nokni tong kwrwi tei nini chuchusong khatiui klangmani bebakno Babilono tlangwi thángjak bainai; mungsa phano tong rwk glak, hwnwi Subraiyung sa-o.

⁷Tei aro achainai nini bwsarokni bere baksano tlangwi thángjak anw; tei bórok Babilonni bugrani nogo banja snamjaknai.”

⁸Aphuru Hejekia Jisaiano hai hwnwi sa kha “Nwng Subraiyungni kók samani, abo kahamno.” Tamni hwn khe bo hai hwnwi uansuk kha, “Ani jora-o tong kwchang bai kirimung kwrwi wngnai.”