Read Kok Borok JISAIA 40 Bible Online

JISAIA 40 - Kok Borok bible

JISAIA 40

¹Khá srang di, ani bororok khá srang di, abo norokni Kaitor sa-o.

²Jerusalemni lukurokno kwchang kwchang khe kók sa di tei bórokni thani kókno sakhlai di, bórokni chobani[24] jora pái súk kha, tei bórokni cha yarok nakarjak kha, sumsokrokbo nakarjak súk kha.

³Borok khoroksa khorang chirikhógwi hai hwnwi sa khlaiwi tongo: “Hasing hapharo Subraiyungni bagwi lahar snam di; chini Kaitorni bagwi hasing hapharo lamano kepleng khlai di!

⁴Bebak harungrok kuchuk khlaijaknai, bebak hachukrok tei hatháirok hache rwjaknai; ha milik yarok milik rwjaknai, lahar thatra butra ma miliknai.

⁵Subraiyungni chẃngsacha phunukjak anw, tei bebak bahan bwthẃini bororok baksa khe abono nuknai, tamni hwn khe Subraiyung sakphangni khúk bai o kókno sa-o.”

⁶Khoroksa chirikhógwi hai hwnwi sa-o, “Sa khlai di!” “Tamono ang ma sakhlainai?” hwnwi ang sẃng kha. Bebak bahan bwthẃini bororok sam hai tei bini bebak naithokmarokbo hapharni khum bubar hai se.

⁷Sam rampraui thángo, khum bubar kwrai-o; Subraiyungni hama abórokni saka-o nangwi-o; kubui’-no bororok bo sam hai se.

⁸Samrok mwrano, khum bubar babwrai wngo; phiya ba chini Kaitorni kóktháirok le mol brúm brúmno tong phlainai.

⁹O Siyon, kothoma kaham pírnairok hachukni kuchugo kasaui di; o Jerusalemo kothoma kaham[25] pírnairok phan khe chirikhók lai di; khorangno kotor khlai lai di, ta kiri di; Judani kamiyungno naiwi bebakno’-no hai hwnwi sa di; “Norokni Kaitorno naisik di!”

¹⁰Nahar di Subraiyung Kaitor phan thonwi phai-o, tei bini phankrak yak bini wngwi naikolwi tongo; nahar di bini sokat bini thani’-no tei bo supungwi rw phimabo bini bwskango’-no tongo.

¹¹Bo mera mwrwknairok hai khe mwrwgwi chá rwnai, bo bini yago merarokno thumwi tubunai, bo mera bwsarokno bini yaktwk bai bamsaui tẃinai, tei bwsa gwnangrokno kwchang kwchang khe tẃinai;

¹²Sabo yapha bai hayungni twirokno su kha, eba nokharokno muk bai khe su-ui nai kha, ha sakani hadlwirokno ura khung bwswk su-ui nai kha, hachukno sumani bai tei hatháino sukong bai su-ui man kha ba?

¹³Sabo Subraiyungni pholano dagiui mannai tong? Eba kókbiti rwnai wngwi bono sabo phrwngnai tong?

¹⁴Saboni thani sinani bagwi bo kókbiti sẃng kha ba? Tei sabo bono bujsóino phrwng kha ba, sabo bono rwngmungno phrwng kha ba? Rwngmungni lamano sabo phunuk kha ba?

¹⁵Nai di dopharok golani twi thopsa hai se, tei rwtamungo hasing kolsa hai khe se lekha jago, nai di bo hasing kolsano tisama hai khe twi rukungno tisaui mano.

¹⁶Lebanon hór mwchẃngna nangmani bol swk se wng ya. Tei aro tongmani mal-matarokbo sógwi yapharna se ká ya.

¹⁷Bini thani bebak dopharokbo mungsa buya, Bo abórokno kwrwini slái bo kwrwi tei bukcha hwnwi uansugo.

¹⁸Hakhe norok Kaitorno sabo bai súchanai? Taknairok bini mangno tago,

¹⁹takjak mwtairok! Taknairok mangpilino takma manwi-o gele rw-o; tei rangchakni manwi taknairok abórokno rangchak silo. Tei aboni bagwi rukphaini buduk snamo,

²⁰bigrarok khe hilini bagwi sók ya buphangno saiwi na-o; sakni bagwi khoroksa tang kwrwng rutugo; bo abo bai khe kutulwi man ya mwtaino tak rw-o.

²¹Norok saui man ya da? Norok khna ya kho da? Cheng phuruni simi norokno sajak ya kho da? Hayung snam phuruni simi norok saui man ya diba?

²²Bo’-no hayungni kitingjak nokha sakani achukthayungo achukjak, tei aro-o tongnairok kúkthora hai máng; rí swngma hai khe bo’-no nokhano swngwi rw kha, tongnani bagwi ríni nok tang tẃi khe abono khatonwi rw kha.

²³Bo habugrarokni phanno samung chúk ya khlai kha, tei o hani tẃiphangrokno chúk ya manwi hai khlai kha.

²⁴Bórokno nangpleple khe kái kha, bórokno nangpleple khe ha-o kái kha, bórok ha bisingo nangpleple khe yarwng sukhlai kha, bo abórokni saka-o ahaino sup khe, abórok ahaino ransaui thángo phiya nokbar sibwi phai khe chwkap hai khe, bórokno kobon rwui tlango.

²⁵Aboni bagwi norok ano sabo bai baksa wng anw hwnwi sabo bai súchanai? Kwthar kuk khoroksa sa-o.

²⁶Norok nokha phaising naisaui naisigwi nai di; omorokno sabo snam kha? Bo athukirirokno kolsa kolsa khe tikhlaiwi tubu kha, bo bórokno bebak bumung khu-ui ringo; bo bini phan kwrak bai khe, tei bini suar kwrakni bagwi abórok kolsa phano kwmaui man ya.

²⁷O Jakob, nwng tamni bagwi o kók sa, o Israil nwng tamni bagwi o kók sa, “Ani lama Subraiyungni lama bai huijak, tei ani manthaino ani Kaitor sak nangjak ya?”

²⁸Nwng saui man ya da? Nwng khna ya kho da? Subraiyung’-no mol brúmni Kaitor, hani páithak jora Takchengnaisa. Bo lengjak ya tei sak belwi tháng ya, bini simungno naitugwi pái rwui man ya.

²⁹Bo lengjakrokno phan rw-o, tei phan kwrwi bororokno phan boksinwi rw-o.

³⁰Phiya siklarok bo lengjago tei belo, tei siklabo lengwi klai-o.

³¹Phiya ba Subraiyungno khatungwi naisingwi tongnairok, bórok phan kwtal mannai, bórok tolingrok hai khe bwkrang phehelwi kuchugo bir anw, bórok khabrum phano leng glak, bórok him phano bel glak.