Read Kok Borok JISAIA 43 Bible Online

JISAIA 43 - Kok Borok bible

JISAIA 43

¹Phiya ba tabuk o Jakob nono snamnai sa, o Israil, nono sak-mang rwnaisa Subraiyung hai hwnwi sa-o, “Ta kiri di, tamni hwn ba ang nono phiyók kha; ang nini bumung khu-ui nono ring kha, nwng ani.

²Nwng twi tẃi basu-ui tháng phuru ang nwng bai baksa tongnai; nwng twimarokni twi basu phuru-o, abórok nono swklwgwi man glak; hórjlai bising tẃi him phuru-o bo, nwng khampro glak, tei hór nono khampro rwui man glak.

³Tamni hwn khe ang Subraiyung nini Kaitor, Israilni kwthar kuk nini mwthangnai. Ang nono phiyókna bagwi nangma rangmari hwnwi Ijipno tei nini sak slái-o khe Ithiopia bai Sebano ma rw kha.

⁴Tamni hwn khe, nwng ani mokolo belaino morok, tei bórom gwnang, ang nono hamjago. Aboni bagwi ang nini sak slái-o bororokno; tei nini langmani sláisongo lukurokno rwnai.

⁵Ta kiri di, tamni hwn khe ang nwng bai pal tongo; ang salkabai bwkhakni nini bosongrokno tubunai, tei salthángbai bwkhakni norokno thumnai;

⁶ang salgrabaino sanai, yakarwi rw di; tei salsibaino sanai, romwi ta ton di; ani sajlasongno hakchalni simi tei ani sajwksongno ha páithakni tubu-ui rw phai di hwnwi sanai.

⁷Ani bumungno ringnairok, ani chẃngsachani bagwi ang snammarokno, ang bono tak kha tei ang bono sak-mang rw kha.”

⁸Mokol tongwibo mokol nuk ya bororokno, tikhlai tubu di, khunju tong phano nathongroknobo tikhlai tubu di!

⁹Bebak dopharok tabuk thumsa wng thung, tei lukurok bo kuthum lai thung. Bórokni bere sabo o kókno sakhlaiwi mannai tong, tei wngwi thángmarokno chwngno phunugui mannai tong? Bórok sak sakno kubui hwnwi phunukna bagwi, sachruna bagwi borok tubu-ui kubui hwnwi saui khna rw phai thung.

¹⁰Subraiyung hai hwnwi sa-o, norok’-no ani mukumu mari tei ani chongjak seleng, norok ano mon thung hwnwi, tei ano poito khlaiwi omo ang hwnwi saui man thung hwnwi chongo; ani slái swkang khoroksa’-no phano Kaitor hwnwi takjak ya kho, tei ani slái ulobo takjak glak.

¹¹“Ang, ang’-no Subraiyung, tei ano karwi tei mwthangnaisa kwrwi.

¹²Ang’-no sakhlai-o, ang’-no mwthang kha tei pír kha, aphuru norokni bisingo mwtai sini yarok kwrwi kho; aboni norok’-no sakki hwnwi ang Subraiyung o kókno sa-o.

¹³Ang’-no Kaitor a salni simi’-no ang’-no bo; tei ani yakni khoroksa phano phiyógwi mannai kwrwi; tei ang samung khlai-o, abono sabo kebengwi mannai tong?”

¹⁴Subraiyung norokni mwthangnaisa, Israilni kwthar kuk hai hwnwi sa-o, “Ang norokni bagwino Babilono borok rohor kha, tei bebak kasumungrokno swbaiwi páinai, Kolodiasong tongthogwi chirik laimani, kapsimang ma kap lai anw.

¹⁵Ang’-no Subraiyung, norokni kwthar kuk, Israilno taknaisa, norokni bugra.”

¹⁶Subraiyung hai hwnwi sa-o, twijlango lahar snamnai, tei twi kotor saka tẃi lama khlaiwi rwnai ang’-no,

¹⁷bo’-no korai malkhungrokno, sengkrakrokno, tei phan gwnangrokno tubunaisa; bórok ha-o rokoja kha, tei bachaui man li ya gwja, bórok pái súk kha, chati thwi tẃi khe sopsa wng kha:

¹⁸Norok swkangni manwirokno muitu ta khlai di, eba kwchamrokno tẃiwibo ta uansuk lai di.

¹⁹Nai di, ang kwtal samung khlaiwi tongo; abo tabukno bumuk perwi achai anw; norok abono saui man glak diba? Ang haphar bukcha-o lama snamwi rwnai, tei hasing hapharo twimarokbo rwnai.

²⁰Bolongni mal-matarok, siyalrok tei tok mangingangrok bebakno ano bórom khlai anw, tei haphar bukcha-o twi rwnai, hasing hapharo twimarok bo rwnai.

²¹Ang sak baithangni bagwi tei ani lobjaknanino sakhlaina bagwi ani bororokno tak kha;

²²“Hai phano o Jakob, nwng ano ring li ya, o Israil nwng ano tẃiwi lengjak kha!

²³Nwng ani thani nini merarokno sógwi barokna bagwi tubu li ya; eba nini ratharmung bai khe ano bórom khlai li ya. Ang yapharmano tẃiwi nono seleng khati rw ya, eba satrai sóknano tẃiwibo lengpra rw ya.

²⁴Nwng ani bagwi rang rwui kuruk kwtẃi pai ya kho; eba nini ratharjak mera bupham baibo khá kochom rw ya; tamo khe nini sumsok bai se ano khan rw si-o, nini bebak cha ya samung bai ano lengpra rw kha.

²⁵“Ang, ang’-no bo, ang sak sakni bagwino nini bebak cha yano hu-ui khibi kha; nini bebak sumsokrokno muitu khlai glak.

²⁶Ano muitu khlai rwui rw di; phai di thansa khe kók sa lai anw; sói hwnjakna bagwi nwng nini kókno saui khna rw di.

²⁷Nini swkangni nwpha[28] sumsok khlai kha, tei nini kwcharni manjunai bororok ano kebengwi cha ya khlai kha.

²⁸Aboni bagwi ang nini ochairokno kwthar háyáni samung tang rw ya, tei Jakobno sokomornani bagwi tei Israilno lachimasingcha khlaina bagwi yaphar kha.