Read Kok Borok JISAIA 44 Bible Online

JISAIA 44 - Kok Borok bible

JISAIA 44

¹“Tamo khe, o ani seleng Jakob, ang chongmani Israilrok, nwng tabuk khna di!

²Nono taknaisa, nono ogo tong phuruni simi snamnaisa, Subraiyung hai hwnwi sa-o, ang nono chubanai; o ani seleng Jakob o ani chongjak bosong Jesurun ta kiri di.

³Tamni hwn ba, ang twi kangjak ha-o twi lukhlaiwi rwnai, ha kwran-o twisa boui rwnai; ang nini bosongni saka-o ani phola lukhlai rwnai, tei nwsarokni saka-o ani hamari lukhlai rwnai.

⁴Bórok twi-o terenda achai tẃi khe pasaui phainai, twi yorjak rukungni jaroi phang hai.

⁵Khoroksa hai hwnwi sanai, ‘Ang Subraiyungni,’ tei khoroksa sakno Jakobni bumung bai ringjaknai, tei khoroksa sakni yago ‘Subraiyungni’ hwnwi swinai, sakno Israilni dopha hwnwi sini rwnai.”

⁶Israilni bugra tei bono phiyóknai Subraiyung, hai hwnwi sa-o, “Ang’-no yaphang ang’-no buchuk; ano karwi tei kubunni Kaitor kwrwi.

⁷Ang hai sabo tong? bo abono sakhlai thung. bo omono sakhlai thung tei omono ani bwskango ton thung. Ulo tamo tamo sók phaino sabo sakhlai kha? Tamo wngnani tong kho, chwngno swkang’-no saui khna rw thung.

⁸Norok ta sundru di, ta kiri di; ang swkangni simi’-no norokno sakhlai ya diba? Tei norokno ani nuknairok! Ano karwi tei kubun Kaitor da tong? Aro tei holong kwrwi; ang tei kubunni khoroksano phano sini ya.”

⁹Mwtai taknairok bórok mungsa buya; tei bórokni hamjakma manwirok bo mungsa chúk ya; tei bórokni sakni nukmarok nukma bo klai ya tei simani bo klai ya, bórok lachimungo se klai rwjaknai.

¹⁰Khoroksa swk mwtai snamma eba taknaisani takjak mwtai abo mungsabo chúk ya.

¹¹Nai di, bini bebak bororok lachimung rwjaknai, o taknairok bórok haino borok ja se; bórok kwrẃngsa khe phaiwi bwskango bacha phai thung, bórok sikirijak bainai, bórok thansa khe lachi rwjak bainai.

¹²Sor taknaisa abono snamo, hokhi kutung saka-o togwi abono snamo, tokjaknai bai togwi sakduk snamo, sakni phankrak yak bai abono tago; bo ok khuijagwi phan kwrwi wngo, bo twi nung yaui tongo tei lengjago.

¹³Buphangni manwi tannaisa abono swikong bai mari rigwi na-o; tei bwkha-o chongmani tẃi khe naithok rw-o tei sujaknai bai khe su-ui mari bogo; nogo tongnani bagwi bo borokno kosol khe borok hai khe sakduk rwui naithok rwui snamo.

¹⁴Bo sidar buphangno tan phai-o; eba bolongni buphangrokni bere kwrak buphangno saiwi na-o; bo sidar buphangno kái-o tei uatwi abono ham rw-o.

¹⁵Ulo khe abo bororokni bagwi sókjaknai bol wngo; bo aroni’-no bokocho kaisa swk tlangwi hór tongo; tei hór mwchẃngwi auan sero; tei aboni’-no mwtai snamwibo abono khulumo tei aboni’-no mwtai tagwi bo aboni bwskango bolokhógwi khulum laiwi tongo.

¹⁶Bo aboni bokocho kaisano khe hóro sógo; tei kubunni bokocho bai khe muihan sógwi cháui ok kochom rw-o; tei abo bai’-no sógwi hór tong twtwi hai hwnwi sa-o; “Ang sakno halangwi túng-túng wng kha, hórni kutung na kha!”

¹⁷Tei bo aboni tong rwkma bokocho bai khe mwtai snam kha, bini sakni bagwi kaisa mwtai snamo; bo aboni bwskango bolokhógwi khulumo tei bini thani suriui hai hwnwi sa-o, “Ano phiyók ja di, tamni hwn khe nwng se ani mwtai!”

¹⁸Bórok khoroksa phano chongwi na li ya gwja, aro rwngmung kwrwi kha eba kaham da hamya sanani chongmabo kwrwi kha, tamni hwn khe bo bórokni mokolrokno kholobwi rw kha, aboni bagwi bórok nuk li ya gwja tei bórokni bwkha muthupjak, aboni bagwi bórok romwi man lai li ya.

¹⁹Khoroksa phano chongwibo nai li ya, rwngma bo kwrwi kha tei kaham da eba hamya cher laiwi hai hwnwi sa li ya, “Ang aboni bokocho kaisano hóro sók kha, aboni hokhi bai auan muthung kha tei muihan bo sógwi chá kha; tei a tong rwkmani bokocho bai khe ang selengmasingcha manwi snamnai hai da? Buphang bokochoni thani ang bolokhógwi khulumnai hai da?”

²⁰Bo thapla saka-o chá rw-o; korójak bwkha bono lama koró rw kha tei bo sakno mwthangwi man li ya, eba bo, “Ani yagra yago omo tatal ya da?” hwnwibo saui man li ya.

²¹O Jakob, o Israil, nwng omorokno bebakno muitu khlai nai di, tamni hwn ba nwng ani seleng se; ang nono snam kha, nwng ani seleng se; o Israil nwng ang bai pokjak glak.

²²Ang nini cha yarokno bebakno chumui hai khe, tei nini sumsokrokno siyari hai khe hugwi khibi kha; nwng ani thani kiphil di; tamni hwn khe ang nono phiyók kha.

²³O nokharok rwchap lai di, tamni hwn khe Subraiyung se omono khlai-o; o hakhor kuthukrok norok chirikhók lai di; o hachukrok chirikhógwi tongthogwi rwchap lai di, norokbo tongthogwi rwchap lai di! Tamni hwn khe Subraiyung Jakobno phiyók kha; tei Israilrokni bisingo chẃngsacha khlaijaknai.

²⁴Nono phiyóknaisa tei bohok bisingni simi nono sak-mang rwnai Subraiyung ahai hwnwi sa-o, ang Subraiyung se omorokno bebakno snamo; Ang saichung susukno nokhano tei hano phehel kha, sabo ang bai tong ba?

²⁵Tatal khe sanairokno, bo’-no bwkha swbai-o, tei Kaitorni kók sa-o hwnnairokno kwmam rw-o; sinairokno uklok uslu rw-o, sinai nuknairokno butua snamo,

²⁶bo bini selengni kóktháino kwrak khlai-o, bini suarirokni kókbitino nang rw-o; bo Jerusalemno tẃiwi sa kha, abo bororok bai tongjaknai, tei Judani kamiyungrokno tang phijaknai, bini báijakrok songchajak phinai;

²⁷bo kuthukno hai hwnwi sa kha, “Kwran wng di; ang nini twimarokno phwranwi khibinai.”

²⁸Bo Sairasno tẃiwi hai hwnwi sa kha, “Bo ani mera bodolno mwrwknai, bo ani uansukmano supung anw.” Bo Jerusalemno tẃiwi sa kha, “Bo tei uáisa tangjak phinai,” tei noktharno tẃiwi hai hwnwi sa kha, “Nini thongla káijak phinai.”