Read Kok Borok JISAIA 45 Bible Online

JISAIA 45 - Kok Borok bible

JISAIA 45

¹Subraiyung bini chongjak borok, Sairasno tẃiwi hai hwnwi sa kha, ang bini yagrani yakno rom kha, bini bwskango dopharokno yago khe tẃinani bagwi, tei habugrarokni changni rí khengnani bagwi, bini bwskango bebak dugarrok phiyoknai, tei hapma duglam kotorrok sojak khe ton glak.

²Ang nini bwskango thángnai, tei kuchukrokno milik khlainai, ang pitolni dugarno swbai páinai, tei sorni berepjaknairokno bokocho khe tansu-ui khibinai.

³Ang nono mwnakma-o khatijak tongma rang rí, tei huijak tongma manwirokno rw anw, hakhe nwng saui mannai ang’-no Subraiyung Israilrokni Kaitor nini mungno khu-ui ringo.

⁴Ani seleng Jakobni bagwi, tei ani chongjak Israilni bagwi, ang nono mung khu-ui ringo, nwng ano sini ya phano ang nono mung rw kha.

⁵Ang’-no Subraiyung tei khoroksa phano kwrwi, ano karwi tei kubun Kaitor kwrwi, nwng ano saui man ya phano, ang nini bwchango rí khanai.

⁶Salkabaini simi salthángbai jora tẃi, bororok saui man thung, ano karwi tei khoroksa phano kwrwi, ano karwi tei oro Subraiyung kwrwi.

⁷Ang’-no pohor snamnai tei mwnak khlainai, ang’-no bwkha srang rw-o tei ang’-no bwkha butharo; ang’-no Subraiyung, omorok bebakno khlainaisa.

⁸O nokha, sakani uatwi ua rw di; nokharok kubui sóino ua rw di; harok kochom thung, mwthangma bwthái thái rw thung, swngcharbo kubui sóino bumuk per rw thung, ang Subraiyung se omono snamo.

⁹Bati nang thung, sakni snamnaisa bai uálainai; takjak hani manwi, taknaisa bai se uálai-o! Ha ba tamo twk taknaino sa da sa ba, nwng tamono tak hwnwi? Nwng bai takjak manwi sa de sano, eba takma-o bini yak kwrwi hwnwi sa da sano?

¹⁰‘Nwng da ano achai rwnai?’ hwnwi buphano sanai borok tei ‘nwng da ok saui bá?’ hwnwi sanai a borok bo swraimung nang thung.

¹¹Subraiyung, Israilni kwthar tei bo’-no taknaisa, hai hwnwi sa-o; “Norok ani bwsarokni kókno tẃiwi sẃngna da, eba ani yakni samungrokno tẃiwi ano daginai da tamo?”

¹²Ang se hano snamo, tei bini saka-o borokno snam kha, ang yak baithang nokharokno phehel kha, tei bórokni bebak sengkrakrokno dagi kha.

¹³Ang bono sói kubui khe tongna bagwi khatung rw kha, tei bini bebak lamarok kepleng khlainai; bo ani kamiyungno songchanai, tei ani khajak bororokno phiyóknai, rangni bagwi buya eba hili manna bagwi buya hwnwi sengkrakrokni Subraiyung sa-o.

¹⁴Subraiyung hai hwnwi sa-o: “Ijipni rang-rí tei Ithiopiani paijaknai phaljaknai manwirok, tei Sabianni kolok kotor bororok, nini thani phainai, tei nini borok wng bainai, bórok nono rwkthar lai anw; bórok sorduk bai khajagwi phai anw, tei nono khorok bomwi khulum phai anw, tei bórok nono koiwi hai hwnwi sa anw: nini thani simi se Kaitor tongo, tei buini thani kwrwi, tei kubun Kaitor bo kwrwi.”

¹⁵Kubui’-no sakno hui tonnai nwng’-no Kaitor, mwthangnaisa Israilni Kaitor.

¹⁶Bórok bebakno lachimung man kha tei ubrum-jabrum máng, a mwtai taknairokbo bebakno baksa khe koró laijak máng.

¹⁷Phiya ba Israilrok khe kusung kusungni bagwi Subraiyung bai mwthangjak kha; nwng mol brúm brúm lachimasingcha khe eba pál man ya khe ma tong glak.

¹⁸Tamni hwn ba nokharokno snamnaisa Subraiyung hai hwnwi sa-o, bo sakphangno Kaitor! bo’-no hano snamo tei tago tei bo’-no songcha-o; bo omono gothok ya khe snam ya, tongthaini bagwi se snamo; bo hai hwnwi sa-o, “Ang’-no Subraiyung, ano karwi tei kubunni kwrwi.

¹⁹Ang mwnakma hani kwrẃngsa swgo phano huijagwi kók samani kwrwi; ang Jakobni bosongno; ‘Ubrum-jabrumo ano naituk di,’ hwnwi sa ya. Ang Subraiyung kók kubuino sa-o, ang sóino kókno sakhlai-o.

²⁰“O dopharokni bere kwthang tong rwknairok, norok bebak thumsa wngwi phai di, thansa khe ani samo phai di! Bórok mungsa phano si ya, bórok buphangni mwtaino tẃiwi berai lai-o, mwthangwi man ya mwtaini thani, thak yaui suri lai máng tongo.

²¹Sakhlai di tei norokni sajaknai kókrokno tubu di; bórok thansa khe kókbiti sa lai thung! Bisi kwbángma swkango sabo samani? swkangni simi sabo sakhlai kha? Abo ang Subraiyung khlai ya diba? Ano karwi tei kubunni Kaitor kwrwi, ang sói kubui tei mwthangnai Kaitor. Ano karwi tei khoroksa phano kwrwi.

²²“O hani páithak nar jorani bebak bororok, ani thani kiphil di tei mwthangjak di! Tamni hwn ba Ang simi Kaitor.

²³Ang sakni bumung bai’-no swmai tang kha, ani búkhúkni sói kók kubui ongkhor kha, a kók tei kiphilwi phai glak; ‘Ani thani bebakno yáskú ma súngnai, tei bebak slai’-no[29] swmai ma tangnai.’

²⁴“Bororok ano tẃiwi hai hwnwi sa lai anw, Subraiyungni thani simi se sói kubui tei phan tongo; tei bono tẃiwi chajak ya wngnairok bebakno bini thani phaiwi lachimasingcha wng bai anw.

²⁵Subraiyungni bising tẃi’-no Israilni bebak bosong kwplai tei bini chẃngsacha wng bainai.”