Read Kok Borok JISAIA 46 Bible Online

JISAIA 46 - Kok Borok bible

JISAIA 46

¹Bel khorok bomjak, Nebo khe kongjak, bórokni takjak mwtairok yabrwirokni tei mal-matarokni saka-o; norok abórokno boksaui tẃimani, lengjak mal-matarokni saka-o poja hai wng kha,

²bórok thansa khe bom khlai kha, kongsonwi klai kha, Bórokni takjak mwtairokno mwthangwi man li ya, phiya bórok se buini ha-o khajagwi ma tháng si-o.

³O Jakobni bosong, Israil bosongni bebak yógwi tong rwknairok, ani kókno khna di, achai phuruni simi ang norokno bamsaui tubumani, bohok bisingni simi ang norokno tẃiwi phaimani;

⁴tei norokni umor chakrani jora-o bo ang’-no tongnai, tei bwkhnai phur phuru-o bo ang nono bamsaui tẃinai. Ang’-no tak kha tei ang’-no bamsaui tẃinai; ang’-no bamsaui tẃinai tei ang’-no mwthangnai.

⁵Norok ano sabo bai kosol khlainai, tei sabo bai baksa hwnnai, eba sabo bai ano su-ui nai khe, chwng khoroksa bai tei khoroksa kosol wngno?

⁶Kholjangni rangchakno khibinairok, tei rwtajaknai bai khe rukphaino rwta-o, rangchakni manwi taknaino rang rwui tubu-ui phai-o, tei bo abo bai khe mwtai tago; ulo khe bórok abono bolokhógwi khulum lai-o.

⁷Bórok abono bangora saka-o khe boksaui tẃi-o, bini tonthai-o khe tonwi rw-o, tei aro’-no bachaui tongo; bo aroni kutulwi man ya. Khoroksa swk bini thani kap khe bo uphilwi saui man ya, eba khoroksano phano bini digi-sigini kati rwui man ya.

⁸“Samung hamya tangnairok norok omono muitu khlai di, tei bwkha-o uansuk phi di,

⁹lái thángma kwcham samungrokno muitu khlai di; tamni hwn khe ang’-no Kaitor, ano karwi tei khoroksa phano kwrwi. Ang’-no Kaitor tei ang’-no solnai tei kwrwi.

¹⁰Ang yaphangni simi páithakni wngmungno sakhlaiwi hai hwnwi sa-o; ‘Ani kókbiti tong phlainai tei ani bwkha-o chapmarokno ang khlaiwi páinai.’

¹¹Ang salkabaini khepsanai tokno, hakchal hani ani kók khnanai borokno ringnai; ang kók sa kha tei ang abono khlaiwi páinai; ang uansuk kha tei ang abono khlai páinai.

¹²“O kók khna ya bwkha sitrarok, norok yókmung bai hakchalo tongnairok; ani kókno khna di;

¹³ang ani phiyókmungno sampha khlai kha, omo hakchal wng glak, tei ani mwthangmani naisingwi tong glak; ang Siyonno ani mwthangma-ono tonnai, tamni hwn khe Israil wng kha ani chẃngsacha.”