Read Kok Borok JISAIA 47 Bible Online

JISAIA 47 - Kok Borok bible

JISAIA 47

¹O kwthar siklajwk, Babilonni sajwk, ongkhorwi phaiwi hadlwi-o achuk phai di, o Kolodiani sajwk, achukthayung kwrwi, ha’-ono achuk di; tamni hwn khe bororok nono tei naithok, tei tẃilwlwk hwnwi ring glak.

²Gom pherejaknai holong naui bwthái bwchlwi sukhrup di, nini hungma ríno khuk lai di, yakungni ríno khukcha di, yakung bukcha khlai di; yakung bai himwi twimarok basu di;

³nini sago rí kwrwi nukjaknai tei nini lachimung phunukjaknai, ang yagul sunai, tei khoroksano phano phiyók glak.

⁴Chwngno phiyóknai, bini bumung sengkrakrokni Subraiyung, bo wng kha Israilni kwthar kuk.

⁵O Kolodiani bwsajwk, siring siring khe achuk di, tei mwnakma-o thángwi tongwi di; tamni hwn khe nwng tei hani bubagrajwk hwnwi ringjak glak.

⁶Ang ani bororokno joli kha, ani bumungno sitra rw kha; tei bórokno nini yago yaphar kha, nwng bórokno khairok li ya, nini horbakno belai hilik khlaiwi bórok chakrarokni saka rw kha.

⁷Nwng hai hwnwi sa kha, “Ang mol brúmni bagwi bubagrajwk wngnai,” aboni bagwi’-no nwng omorokno bwkha-o chu-ui ton li ya, eba bórokni páithago tamo wngno uansuk li ya.

⁸Aboni bagwi tabuk, o tongthok-cháthokno hamjaknaijwk omono khna di, nwng kirima kwrwi khe achugwi tongwi, bwkha bising-bising hai hwnwi sa kha, “Ang simi se tei ano karwi oro khoroksa phano kwrwi; ang randijwk hai khe achugwi tong glak, eba bwsa kwmamani dukhuno si glak.”

⁹Muphlik kaisani bisingo’-no o mungnwi nini thani phai sók phainai, achomsa salsani salo’-no nang phainai; nini kók mwtai kwrwngrok kwbángma tong phano tei kotor kotor danda-baji kwrwngrok tong phano nini thani kupulung khe sók phainai.

¹⁰Nwng nini tong sitra tongmung bai se kirina kwrwi hai ma tongo, nwng hai hwnwi sa-o, “Khoroksa phano ano nuknai kwrwi;” nini simung tei wngmung nono lama koró rw kha; tei nwng bwkha bising bisingo hai hwnwi sa kha, “Ang simi se, ano karwi tei khoroksa phano oro kwrwi.”

¹¹Tamo khe cha ya nini saka-o sók phainai; abono nwng kasaui man glak; nini saka-o digi-sigi sók phainai, nwng aboni yókna bagwi mungsa phano khlai man glak; nini saka-o achomsa komormung sók phainai, nwng abo mungsa phano sislap glak.

¹²Nwng nini kók mwtai kwrwngrok bai tei danda-baji kwrwngrok bai kwrak khe bacha di, nwng chwraini simi omoni bagwi tangwi phaimani; nini samungrok chaui phano mano, nwng sikiriui manna phano tongo.

¹³Nwng nini kwbángma kókbiti sanairok bai leng súkjak; nokhano khaknairok, athukiri lekhanairok, tal nuksono nono tamo wngno sanairok bwskango bacha thung tei nono phiyók phai thung.

¹⁴Nai di, bórok chwkap hai se; hór bórokno kham rwui pái kha; bórok sak sak hórjlaini yógwi man glak; abo hangarni hór ya, aro achugwi hór tongwi mannai.

¹⁵Nwng pal khe samung khlaima bororok, tei sikla phuru him laima a bororokno; bórok sak sakni lama tẃi’-no tháng bai kha; aro nono mwthangnai khoroksa phano kwrwi kha.