Read Kok Borok JISAIA 48 Bible Online

JISAIA 48 - Kok Borok bible

JISAIA 48

¹O Jakobni bosong, o kókno khna di; Israil hwnwi bumung pharwi ringjago, tei Juda núkhungni ongkhorwi phaimani; norok Subraiyungni mung bai swmai tangwi tongo; tei Israilni Kaitorno lonwi tongo; phiya ba, kubui bai ya tei sói bai buya.

²Tamo khe bórok kwthar kamiyungni borok hwnwi sakno sinijago; tei Israilni Kaitorni thani bwkha rwui tongo; bini bumung sengkrakrokni Subraiyung.

³Swkango wngmarok bebak, ang swkangni simi’-no sakhlai kha, bórok ani khukni ongkhorwi thángmani, ang bórokno sini rw kha; hakhe ang achomsa khlai kha, tei bórok sók phai kha.

⁴Tamo khe ang saui mano, nwng kók khna ya, nini gwdna sor hai kwrak, tei nini murku pitol hai.

⁵Aboni bagwi ang swkangni simi’-no bórokni kókno nono sakhlai kha, bórok sók phaimani swkang’-no nono saui khna rw kha; wng ya khe nwng hai hwnwi sa anw, ani takjak mwtairok se omorokno khlai-o, ani snamjak mwtai tei takjak mwtai se bórokno dagi-o.

⁶“Nwng khna kha; tabuk omorok bebakno naisik di; tei nwng omono sakhlai ya da? Tabukni simi ang nono kwtal Kwtal kók khna rwnai, nwng saui man ya huijak kókrokno saui man rwnai.

⁷Abórok tabukno snamjago, sal dwk ya kho; tinini swkang nwng omorokno khna ya kho, wng ya khe nwng hai hwnwi sa kha mun, ‘Nai di ang omorokno bebakno sini-o.’

⁸Nwng uáisabo khna ya kho, saui bo man ya kho, yaphangni simi nini khunjubo phiyókjak ya kho; tamo khe ang saui man kha, nwng belai bandiui samung tangnai, tei achai phuruni simi’-no nwng kók khna ya hwnwi sinijago.

⁹“Ang ani bumungni bagwi thamchi holi rw anw, ang nono khibi ya wngna bagwi, tei sak lobjakna tẃi, nini bagwi sakno mwthang anw.

¹⁰Nai di, ang nono chwkai kha, phiya ba rukphaino khlaima hai ya; ang nono sátokmungni hór bai se amjok kha.

¹¹Ang ani sakni bagwi, tamni hwn khe sakni bagwi se khlai-o, ani bumung tamni bagwi sitra rwjaknai? Ani chẃngsachano ang buino rw glak.”

¹²O Jakob, o ani ringjak Israil! Ani kókno khunju kai di; ang’-no bo, ang’-no yaphang tei ang’-no buchuk.

¹³Ani yak bai’-no hani thonglano kái kha; ani yagra yak bai’-no nokharokno phologo; ang bórokno ring phuru khe bebakno baksa khe bachaui phai lai-o.

¹⁴“Norok bebakno kuthum lai di tei khna di! Bórokni bere sabo omorokno sakhlai kha? Subraiyung bono’-no hamjago; bo Babilonno tẃiwi uansukmano cha rwnai, tei bini yak Kolodiarokno kebengnai.

¹⁵Ang, ang’-no bono o kók sa-o tei ringo, Ang bono tubu kha tei bo bini lama-o hamcha rwnai.

¹⁶“Ani samo phai di, tei o kókno khna di: Yaphangni simi’-no kók khogwi sa ya; omo nang phai phuru ang aro tongo.” Tabuk khe Subraiyung Kaitor ano tei bini Phola bai khe rohor kha.

¹⁷Subraiyung, nini mwthangnai, Israilni a kwthar, hai hwnwi sa-o, “Ang Subraiyung nini Kaitor, ang nini hamkraini bagwi phrwngo, tei nini tháng thai lama-o nono tẃi-o.”

¹⁸Ang muchungo nwng ani dagimarokno khna thung! Hakhe nini khakchangma twima hai wng kha mun; tei nini sói kubui twijlangni twi aphal hai wng kha mun.

¹⁹Nini bwsarok hasingsa hai wng kha mun; nini bosongrok bwthái bwchlwi hai wng kha mun; tei bórokni bumung tanjak glak; eba ani bwskangni sokomorjak glak.

²⁰Norok Babilonni ongkhor di, Kolodiani khár di; tongthokma khorang bai khe omono sakhlai di; ha páithak jora omono si rw di; hai hwnwi sa di, “Subraiyung bini seleng Jakobno mwthang kha!”

²¹Bo bórokno hasing haphar tẃi tlangwi tháng phuru, bórok twi kang buya; bo bórokni bagwi holongni twi chersa rwi rw kha; bo holongno phekok kha, tei twi ongkhorwi phai kha.

²²Subraiyung hai hwnwi sa-o, “Borok hamyarokni bagwi mungsa khakchangma kwrwi.”