Read Kok Borok JISAIA 49 Bible Online

JISAIA 49 - Kok Borok bible

JISAIA 49

¹O twijlang rukungni harok, ani kókno khna di; tei hakchalo tongnai bororok norok khunju kaichom di. Subraiyung ok bisingni simi’-no ano ring kha, amani ogo tong phuru’-ono bo ano mung phar kha.

²Bo ani búkhúkno seng kubuk hai khlai kha, bini yakni sampili-o ano huiwi ton kha; tei ano huljak chakhla khlai kha, bini chakhla uásúngo khe daui ton kha.

³Tei bo ano hai hwnwi sa kha, “Nwng ani seleng, Israil, nini bising tẃi’-no ang chẃngsacha khlaijaknai.”

⁴Phiya ba ang hai hwnwi sa kha, “Ang haino se tangma klai si-o, bukcha tei nang ya o ani phan haino khibi kha; hai phano ani manmung le Subraiyungni thani se, tei ani samungni manthai le Kaitorni thani se.”

⁵Tabuk Subraiyung hai hwnwi sa kha, bo ano oksingni simi snamwi tubu kha, ang bini seleng wngwi Jakobno bini thani kiphilwi tubuna bagwi; tei Israilrok bini thani kuthumui manna tẃi khe, Subraiyungni mokolo ang bórom man kha; Ani Kaitor ani bagwi phan wng kha.

⁶Bo hai hwnwi sa kha, “Nwng Jakobni bebak bosongno songchana bagwi, tei Israilni khatijak bororokno tei uáisa kiphilwi tubunani bagwi, ani seleng wngnani, abo belai klai kók; ani mwthangma ha páithak jora sógwina bagwi, ang nono dopharokni thani pohor hai khlainai.”

⁷Israilno phiyóknaisa tei bini a kwtharsa bwkha kuthuk bai norjaknai, dopharok bai khibijaknaisa, tẃidulnairokni seleng: Subraiyung hai hwnwi sa-o, “Habugrarok nugwi bacha lainai; habugrani bwslasong tei bórok ha-o botok khe klai khulumnai; tamni hwn khe Subraiyungni bagwi’-no omo hai ma khlainai, bo wng kha kók narwknai, Israilni kwthar sa, bo’-no nono chongo.”

⁸Subraiyung hai hwnwi sa-o: “Ang khairoknani jora-o nini surimano khna kha, tei mwthangjaknani salo nono chuba kha; tei ang nono kati rwui ton kha, tei bororokni thani swmaini bagwi nono rw kha, abo bai nwng hano songcha anw, chúk ya klaijakrokno man rwui rwnai;

⁹nwng alongo chopjakrokno, ‘Ongkhorwi phai di,’ mwnago tongnairokno ‘Nukjak di,’ hwnwi sa anw, bórok lama botok chá rw anw; tei buphang kwrwi hachuk bolong bórokni mwrwk thai wngnai.

¹⁰Bórok ok khui glak, eba twi kang glak, hasingsa kutung eba satung bai bórok butharjak glak, tamo khe bórokno khairoknairok, bórokno tẃidulnai, tei twimuk tongmani tẃi bórokno béngjaknai.

¹¹Tei ang ani bebak hachukrokno lama snamnai; tei ani lahar kotor bebak kuchuk khlaijaknai.

¹²Nai di, omorok hakchalni phainai, tei nai di, bórok salsibaini tei salthángbaini phainai; tei a bororok Sinimni hani phainai.”

¹³O nokharok, tongthogwi rwchap di, o ha tongthogwi chirik di, o hachukrok khorang chirigwi tongthogwi rwchap mung rwchap di! tamni hwn khe Subraiyung bini bororokno bwkha srang rw kha; tei bini sátokjaknairokno khairoknai.

¹⁴Phiya ba Siyon hai hwnwi sa kha, “Subraiyung ano khibi kha! Ani Subrai ano pok kha.”

¹⁵“Bwrwima sakni abuktwi chánai chwraino pogwi da man ba? Bo sak ogo tẃima bwsano khairok yaui tongnai da? Omorok bo pogwi tháng phano, hai phano ang le nono pok glak.

¹⁶Nai di, ang ani yapha bai nono tagwi sakduk rw kha; nini chokdeualrok ani mokol bwskango mángno tongo.

¹⁷Nini tangnairok swbainairokni slái doui tang lainai, nini swbainairok tei nono bukcha khe khibiui thángnairok nini aroni ongkhorwi thángnai.

¹⁸Nwng khorok tisaui ayang uyang kitingwi naisik nai di, nini bórok thumjagwi phai-o, bórok nogo kiphilwi tongo! Kaitor Kwthang ba nwng nini bórokno tẃi kung chuknai, káijaknai bwrwi bini kanma gwina ganthirokno tẃi kung chuk tẃi khe nwngbo kung chuk anw.

¹⁹“Sói’-no, nini ha sokomorjak tei khibijakrok kwkham wngwi klai tongo, phiya ba omo hai jora phainai, aphuru nwng nini bororokno nini bisingo tongthai rwui man glak, tei norokno salsa monoknairok hakchal wngwi ma thángnai.

²⁰Nwng kwmajakmani bwsarok nini thai phaiwi hai hwnwi sa phai anw, ‘Oro ani bagwi belai tongthai kesep, ang tongnani bagwi tongthai snamwi di.’

²¹Aphuru nwng bwkha bising bising hai hwnwi sa phai anw: ‘Omorokno ani bagwi sabo achai rw lang? Ang ba bwsarokno kwmajagwi tei banja hai tongmani se bla, ang rwkhlaiwi rohorjak tei khárwi ma tongma se, omorokno ba sabo ba tor rw kha lok rw kha? Nai di, ang saichung tongmani se; hakhe omorok buroni sók phai bai kha?’ ”

²²Subraiyung Kaitor hai hwnwi sa-o: “Nai di, ang dopharokni saka-o ani yak tisa anw, tei bororokni bagwi ani nukmung mari tisa anw; tei bórok nini nwslasongno khuri-o bamwi tubu anw, tei nwsajwksongno bangora boksaui tubu-ui phaijak anw.

²³Habugrarok norokno rinai bupharok wng anw, tei bórokni Isirijwksong khe nono naikolnai bumarok wngnai; bórok ha-o mwkhang beraui nono khulum anw, tei nini yakungni hadlwi swlak anw. Hakhe nwng ano Subraiyung hwnwi saui man anw; ano naisingwi tongnairok, bórok lachimasingcha wng glak.”

²⁴Phan gwnangrokni yakni manwino segwi da man ba, eba twini dagaitrok bai romjaknairokno sabo phiyógwi mannai ba?

²⁵Sói sói’-no, Subraiyung hai hwnwi sa kha: “Phan gwnangrok bai choba-o tlangjakmano bo segwi najak phinai tei twini dagaitrok bai tlangjakmarokbo phiyókjaknai; norok ang bai khá kochomwi tong khe, angbo norok bai khá kochomwi tongnai, tei ang nini nwsarokno mwthangnai.

²⁶Ang nono sátoknairokno bórokni sakni bahanno chá rwnai, tei sak sakni thẃi khan rwui phek rwnai. Hakhe bebak bahan-bwthẃi gwnang ang’-no Subraiyung; norokni mwthangnaisa; norokno phiyóknai tei Jakobni phan gwnang kuk khoroksa hwnwi bororok saui man anw.”