Read Kok Borok JISAIA 50 Bible Online

JISAIA 50 - Kok Borok bible

JISAIA 50

¹Subraiyung hai hwnwi sa-o: Ang nwmano kagwi rohormani a kaksen bwlái buro? Eba ang nono phalmani a borok ba buko? Nai di nini sumsokni bagwi se nwng phaljago, nini cha yarokni bagwi se nwma kagwi rohorjago.

²Tamo wngwi ang phai phuru aro borok kwrwi wng? Ang ringhor phuru bórok khoroksa phano khúk yachaknai kwrwi wng? Ang bórokno phiyókna bagwi aswk da ani yak sók ya wng kha ba? Eba phiyókna bagwi ani ba phan kwrwi kha diba? Nai di ang kulma bai se twijlangrok ma rano, twimarokno hasingkhong ma kha-o; hakhe twi kwrwi wngwi kangwi thwi bai-o tei sogwi ma mwnam bai-o.

³Ang nokharokno mwnakma bai khe kobolo tei rí soroirokno bórokni kanmung khlai-o.

⁴Lengjak borokno bahai khe bwkha rak rwnai Subraiyung ano a kóktháirokno rw kha, phung ai brúm brúmno ano sochaui rw-o; bo ani khunjuno bini phrwngmano khnana muchung rw-o.

⁵Subraiyung ani khunjuno phiyógwi rw kha, tei ang kók khna ya wng li ya, ang ubo uphil li ya.

⁶Ang bunai-toknairokno phikung phehelwi rw kha. Khochai phuinairokno khangar chagwi rw kha. Ang lachimung tei khuktwi musujaknani bagwi mwkhang hui li ya.

⁷Tamni hwn khe Subraiyung Kaitor ano chuba-o; aboni bagwi ang cha ya hwnwi manjak li ya; aboni bagwi ang holong hai mwkhang kwrak khlai kha, tei ang saui mano ang lachimung rwjak glak,

⁸tamni hwn ba ano kati rwnai ani samo’-no tongo; sabo ano kebengnai? Phai di pal khe bacha lai anw. Sabo ani ari tong? Bo ani thani phai thung.

⁹Nai di Subraiyung Kaitor se ano chuba-o. Sabo ano cha ya hwnwi sakhlai ba? Nai di, bórok bebakno kanmung-chummung hai khe soroi wng bainai; bórokno yóngrok cháui páinai.

¹⁰Norokni bere sabo Subraiyungno kirinai tong tei bini selengni kókrokno khna nai tong, sabo mwnago himnai tong tei pohor kwrwi tong, hai phano Subraiyungno poito khlai di, tei Kaitor bai khe tong di.

¹¹Norok hór mwchẃngmani a hórni bwskang bwskang tháng di. Tamo khe Subraiyung yak baithang norokno majra rwnai, tei nono sátokmung manjak rwnai.