Read Kok Borok JISAIA 51 Bible Online

JISAIA 51 - Kok Borok bible

JISAIA 51

¹“Norok mwthangjakna muchungnairok, ani kók khna di, norok Subraiyungno naituknairok; norok ani kók khna di, norokbo holongni tikhlaijak kha tei buroni khurwi tisajaknai nai di.

²Norokni pha Abrahamno, tei norokno bánai Sarani phaising naharwi nai di; tamo khe bo saichung susuk wngwi tong phuru, ang bono ringwi hamari kupulung tei bono kwbángma khlai kha.

³Tamni hwn khe Subraiyung Siyonno khá srang rw kha: Bo haino klaiwi tongjak harokno khá srang rwnai, bukcha bolongrokno Eden hai khlainai, hasing hapharno Subraiyungni tháiblwng hai khlainai. Bini aro-o tongthotok bai khakchangma mannai tei hambai bai rwchapmungni khorangrok máng tongnai.

⁴“O ani bororok ani kók khna di; tei ani dopharok ang kók samarokno khunju kaichom di; tamni hwn khe ani oroni se raidarok ongkhornai; tei bororokni thani pohor wngnani bagwi sói buj thumnai.

⁵Ani phiyókjakmung doui samphaui tong kha; ani mwthangma samung chengjak kha; ani yaktwk lukurokno tẃithernai; twijlang rukungni harok ano naisingwi tong anw; tei ani yakno bórok khatungwi tong anw.

⁶Norok nokha phaising naisaui nai di; tei hano naikhlaiwi nai di; tamni hwn khe nokha hoku hai kwmaui tháng anw; tei ha bo rí hai kwcham wngwi tháng anw; tei aro tongnairok bo thampuirok hai khe thwi bainai;[30] phiya ba ani mwthangma le mol brúm brúm tong rwknai, ani phiyókma bo pái phlai glak.

⁷“Norok sói kubuino saui mannairok, tei bwkha-o ani raidano tonnairok ani kókno khna di; bororok samano ta kiri di; tei bórokni kebengmano bo ta sundru di.

⁸Tamni hwn khe rírokno urirok cháma hai khe bórokno cháui páinai; tei yóng bórokno ulni rí cháma hai khe cháui páinai; phiya ba ani phiyókmani le mol brúmni bagwi wngnai; tei ani mwthangma kusung kusungni bagwi wngnai.”

⁹Sicha di, sicha di, phan thon di, o Subraiyungni yak; swkangni salrogo sichama hai khe sicha di, bisi kwbángma swkangni bosongrok hai khe sicha di; nwng ba Rahabno phondrik-phandrak khe tan ya diba? Dragon kotormano phondrik phondrik khe tan ya diba?

¹⁰Nwng ba twijlangni twino, twi kuthukmano phwran ya diba? Twi kuthuk tẃi khe phiyókjak bororokno lama snamwi basu rwui rohor ya diba?

¹¹Aboni bagwi Subraiyungni phiyókjak bororok kiphilwi phai anw, tei rwchapmung bai khe Siyono phai anw; tei bórokni khorogo pái phlai ya tongthokni motok tong anw; bórok tongthokma tei khá srangma man anw, bwkha báima bai kapma khárwi ma tháng anw.

¹²“Ang, ang’-no norokno khá srang rwnai; nwng le sabo, jabra hai swrapsani bagwi snamjak a thwiblang borokno kiriui tong?

¹³Nwng nono taknai Subraiyungno pogwi tháng kha hai de? Bo se nokhano phuaro tei hani thonglano songcha-o. Tamni nwng sal brúm brúm sátoknairokni thamchino, nono sokomorna tiyar wngjakrokno kiriui tongnai? Hakhe buko sla sátoknaini a thamchi?

¹⁴Khajakrok daktino phiyókjak anw; bo hakhoro thwina nang glak; tei bini chámungbo man ya wng glak.

¹⁵Tamni hwm khe ang Subraiyung nini Kaitor, ang twijlangno pupak rw khe bini twi aphal ma ka-o, sengkrakrokni Subraiyung ani bumung.

¹⁶Tei ang ani kóktháirokno nini khugo rw kha; phiya ani yakni sampili-o nono huiwi ton kha, ang nokhano phuar kha; tei hani thonglanobo kái kha. tei Siyonno hai hwnwi sa kha, ‘Nwng ani borok.’ ”

¹⁷Sicha di, sicha di, bacha di, o Jerusalem, norok Subraiyungni yakni bini thamchini khuri-o nungnairok, khurini bebakno nungwi phek súk kha, kepleng khe himwi man li ya,

¹⁸bini aswk bwsa chwla achainairokni bere, khoroksa phano bono yak tolwi tẃinai kwrwi kha; aswk naikolwi tor rwjaknairokni bere khoroksa phano bini yak romwi tẃinai kwrwi kha.

¹⁹O mungnwi nini sago nang phai kha. nwng bai baksa sabo khá khamnai tong? Bukcha khlaijakma tei swbaijakma, asari tei seng; sabo nono khá kwchang rwnai?

²⁰Khẃi-o nangjak mwswi hai khe nini nwsarok lengpraui lampra bokhorokni mathe klaiwi tong bai kha, bórok Subraiyungni jolijakma bai kupulung. Kaitorni swraimung nangjak.

²¹Aboni bagwi nwng o kókno khna di. O sátokmung manjak, nwng kephek hai phano arak bai ya.

²²Nini Subrai, Subraiyung, sakni bororokni bagwi kók sachrunai hai hwnwi sa-o; “Nai di, ang pheknai khurino, ani thamchini khurino nini yakni na kha; ani jolimani khurini tei ta nung si di,

²³tei ang nono sátoknairokno phiya ‘Bokhorok bom di, chwng nini saka tẃi himnani,’ hwnwi hwnnairokno nini yago abono yapharnai; nono, tei nono ha hai khe saka tẃi lahar hai khe bomol tẃi himnairokni bagwi phehelwi rw kha.”