Read Kok Borok JISAIA 53 Bible Online

JISAIA 53 - Kok Borok bible

JISAIA 53

¹Chwng khnamarokno, sabo poito khlainai tong? Tei Subraiyungni yakno, sabono phunukjak kha?

²Tamni hwn khe bo bini bwskango buphang bwsa hai khe torsa-o tei ha kwrano bumuk perma hai khe yarwng sur rw kha. Bini sakduk se kwrwi, eba naithokmabo kwrwi, bini bwkhak mokol klainani mungsa bo kwrwi, tei naithok hwnwi naisikjakna bo kwrwi.

³Bo sak nangjak li ya tei bororok bai khibijak kha; bo dukhu nangjak tei bwkha báimung bai khe kupulung. Bororok abono nugwi mwkhang kholobo, bo sak nangjak ya; tei chwng bono yachak lai li ya.

⁴“Kubui’-no bo chini dukhurokno hor kha tei dukhuno ruju kha; hai phano chwng bo swprakjakmano Kaitor bai se swprakjago hwnwi hwn si-o.

⁵Phiya ba chini sumsokni bagwi bo sago kwsa cha rwjak kha, chini cha yani bagwi se bo bukhrupjak kha; bini sago swprakjakmani bagwi chwng ham rwjak kha; tei bo bwsago bujakmani bagwi chini sak hamyarok ham kha,

⁶chwng bebakno merarok hai lama koró bai kha; chwng bebakno chini muchung tẃi khe him lai kha; phiya, Subraiyung chini bebak sumsokno bini sago ruju-ui na kha.

⁷“Bo sátokjak kha tei kwsa man kha. hai phano bo mungsa sa li ya. Mera bwsarok ratharjakna bagwi tlangjakma hai, tei merarok buikhumu ranairokni bwskango siring siring khe tongma hai khe bo mungsa pung li ya.

⁸Bo sátokjakma tei buj thumjakma bai khe tlangjak kha; a jora-o bini bosongrokni bere abórokno tẃiwi sabo uansuknai tong? bo kwthangrokni hani norjak kha hwnwi, ani bororokni sumsokni bagwi se bini sago bujakma mari klai-o hwnwi sabo chong?

⁹Hakhe borok sitrarok bai baksa bini mangkhor snam kha, phiya ba thwi phuru khe bo gwnangrokni logisong wng lang kha, bo mungsa phano hamya khlai ya, tei búkhúgo phemlokmung bo kwrwi.”

¹⁰Hai phano, bono sukhrupnani bagwi Subraiyungni’-no chongjak; bo bono dukhu-o khiklai kha; bini langmano sumsokni yapharmung yaphar phuru khe, bo bini bosongno mokolo klai anw; bono umor kolok khlainai; tei bini yago Subraiyungni muchungma abo hamchanai.

¹¹Bo bini langmani lengmano nuknai tei bwkha kochom anw; ani kwthar seleng bini simung bai kwbángma borokno bujsói man rw anw, tamni hwn khe bo bórokni bebak sumsokrokno horwi tlangnai.

¹²Aboni bagwi ang bono borok kotorrokni bisingo banta kaisa rwnai, tei bo kwplairok bai baksa banta khlai lainai; tamni hwn ba bo thwinani bagwi sakni langma-o yaphar kha, tei sumsok gwnangrok bai baksa lekhajak kha; hai phano bo kwbángma bororokni sumsokno hor kha; tei sumsok gwnangrokni bagwi koiwi sachru-ui tongo.