Read Kok Borok JISAIA 54 Bible Online

JISAIA 54 - Kok Borok bible

JISAIA 54

¹“O banji, bwsa bá ya, nwng tongthogwi rwchap di, o sak kengna bagwi ma kengaiyarok nwng chirigwi tongthogwi rwchap di! Tamni hwn khe, khibijakrokni bwsarok káijakrokni bwsarokni slái kwbáng wng kuknai, hwnwi Subraiyung sa-o.

²Nwng nini rí nokno phuar di; tei tongma nokni rí swngmarokno bo phuar di; ta uslu di, nini dwkhwirokno lok rw di; tei nini thongrokno rak rw di.

³Tamni hwn khe nwng yagra tei yaksi bwkhak phuarnai, nini bosongrok dopharokno yapha-o chop anw hakhe kami bukcharokno bororok bai kupulung wng anw.

⁴“Ta kiri di, tamni hwn khe, nwng lachimasingcha wng glak; ta uana di, tamni hwn khe nwng lachi rwjak glak; nwng nini sikla jorani lachimasingcharokno pogwi tháng anw; tei nini randi wngwi tongma jorani lachimasingcharokno; nwng tei muitu tong glak.

⁵Tamni hwn ba nono snamnaisa’-no nwsai; bini mungno wng kha sengkrakrokni Subraiyung; tei Israilni kwthar kuk, norokno Mwthangnaisa; bo bebak hayungni Kaitor hwnwi hwnjago.

⁶Tamo khe Subraiyung nono kak laijak, bwkha báijak bihikno ring tẃi khe eba khe sikla jorani bihik khibijakno ring tẃi khe ringo; hwnwi nini Kaitor sa-o.

⁷Tamo khe, ang srapsani bagwi nono khibi kha; hai phano, belai khairokma bai ang nono thum phinai.

⁸Ang belai jolima bai srapsani bagwi nini thani ani mwkhang hui kha; phiya ba mol brúm brúmni hamjakma bai nono khairok phinai, hwnwi nono phiyóknaisa Subraiyung sa-o.

⁹“Tamni hwn khe, ani thani omo Noani molo wngma hai se; ang swmai tang kha Noani jorani hai tei twi tor rwui hano lom rw glak; aboni bagwi ang swmai tang kha, ang nono tei kul glak;

¹⁰tamo khe hatháirok tei hachukrok se norjagwi tháng anw, phiya ba ani hamjakmani le nono yakarwi tháng glak; tei ani swmaini khakchangmung le tei norjak glak, hwnwi nono khairoknai Subraiyung sa-o.

¹¹“O dukhu manjak, bangkundri bai swprakjak, tei khakchangma kwrwi wngwi tongnai; nai di, ang nini kamiyungno naithok bumulni holong bai khe tisa phinai, tei saphir holongthai bai nini thongla káinai.

¹²Ang holong kuphur bai nini tailamrokno snamnai, tei holong kwchak bai nini bebak duglamrokno tei nini bebak chokdeualrokno kaham kuk holong bai khobnai.

¹³Tei bebak nwsarok Subraiyung bai phrwngjaknai; tei nini nwsarok belai khe hamchanai.

¹⁴Nwng sói kubui bai songchajaknai, nwng sátokjakma bai hakchal wngnai; nwng tei kiri glak; kirimung tei nini gana-o phai glak.

¹⁵Tumungno khoroksa swk swpraksa khe; abo ani aroni phaimani ya; khoroksa swk phano nono swprak khe; bo nwng bai chennai.

¹⁶Nai di, hangaro hór phnangwi nokbar subwi chobani bagwi nangmani chúkjak aitalrok snamnaisano ang’-no snamo. Sokomornani bagwi a sokomornainobo ang’-no snamo.

¹⁷Mungsa swk chobani manwi nono kebengwi snamjak khe; abo samungo chúk glak; nono kebengwi kók hamya samanibo nang rwui man glak: Ani seleng Jerusalem nini se! Ang nono kwplai wngnani bagwi hamari rwnani swmai tangjak hwnwi Subraiyung sa-o.”