Read Kok Borok JISAIA 55 Bible Online

JISAIA 55 - Kok Borok bible

JISAIA 55

¹“O kangjaknairok phai bai di, norok twi-o phai di; norok rang kwrwirok phai bái di. chámung pai phai di tei chá di; phai di rang nang yaui’-no chámung. tei angur bwtwi tei dut haino pai phai di.

²Tamni bagwi norok sói chámung yani bagwi ba rangrokno swbai, khá kochomma kwrwi abo tẃirokni bagwi, tamni phan khibiui samung tangwi tong? Khir khir khe ani kókno khna di; kaham kuk chámungno chá di. a chámung kaham cháui nini khá kochom rw di.

³Nini khunju kaichom di, ani samo phai di; norokni langma thangwi tongna bagwi khna di; tei ang norok bai mol brúm brúmni bagwi swmai tang anw; ang hamjakmung bai khe Daud bai swmai rwma haino narwknai.

⁴Nai di ang bono dopharokni thani mukumu hai, tei bono khoroksa tẃiphang tei lukurokni bokhorok chong kha.

⁵Nai di, mung sini ya dopharokno ring anw, nono sini ya dopharok, nini thani khachigwi phai anw, abo Subraiyung nini Kaitor, tei Israilni kwtharni jarwi se wng anw; bo nono chẃngsacha khlai kha.

⁶“Subraiyungno manthok phuru’-ono naituk di, Samo tong phuru’-ono bono ring di.

⁷Borok hamyarok bini lamano khibi thung tei sumsok gwnang bini uansukmano yakar thung; bo Subraiyungni thani kiphilwi phai thung, hakhe bo bono khairok anw; kiphilwi phai thung, tamni hwn ba bo bebakno nakar bainai.

⁸Tamni hwn khe Subraiyung hai hwnwi sa-o, ani uansukmarok bai nini uansukmarok thansa ya; tei nini lamarok bai ani lamarokbo thansa ya.

⁹Tamni hwn ba ha bai nokha chukma swkno, norokni lama bai ani lama aswkno chugo tei norok uansukma bai ani uansukmarok bo aswkno kuchuk.

¹⁰“Tamni hwn khe uatwi tei kothor kwsap nokha sakani ha-o klai phaiwi, tei aro-o kiphilwi tháng phi ya, phiya hano kochom rwui bwchlwirokno bumuk per rw-o; tei sarnairokno bwchlwi tei chánairokni bagwi chámung rw-o;

¹¹ani búkhúkni ongkhorma kóktháirokbo abo tẃi’-no wngnai; abo nang ya tei bukcha wngwi ani thani kiphilwi sók phai glak; tamo khe ang khlaina muchung tẃi’-no; abo khlaiwi páinai; tei ang khlaina bagwi rohormarokno khlaiwi hamcha rwnai.

¹²“Phiya norok tongthogwi phataro tháng anw, tei kwchang kwchang khe tolwi tẃijak anw; hatháirok tei hachukrok norokni bwskango chirikhógwi tongthogwi rwchap anw; tei hapharni bebak buphangrok yapha khorop lai anw.

¹³Busuphangni achai thani saipras buphang achai anw; atakereng achai thani khum phang achai anw; tei omo Subraiyungni mukumuni bagwi wngnai, omo mol brúmni mari wngnai, abo tei kwmaui tháng glak.”