Read Kok Borok JISAIA 56 Bible Online

JISAIA 56 - Kok Borok bible

JISAIA 56

¹Subraiyung hai hwnwi sa-o, “Bujsóino tẃi di tei sói kubui khe tang di, tamni hwn khe daktino ani mwthangma phainai tei ani phiyókma phunukjaknai.

²Omo hai khlainai bororok hamchajak abono dera rw yarok tei bebak samung sitrano yak rw yaui tongnai tei omono kwrak khe romwi tongnairok, sabat salno tẃiwi tongnairokno hamchajak.”

³Subraiyung bai gwdal phainai buini hani bororok hai hwnwi ta hwn thung, “Subraiyung kubui’-no chwngno bini bororok bai swkak anw.” Hakhe gurma khoroksa phano, “Nai di ang le buphang kwran se” hwnwi ta hwn thung.

⁴Tamni hwn ba, Subraiyung hai hwnwi sa-o, “ani sabatno tẃinai gurma ani lenglama salno tẃiwi tongnai, ani khá phurmano saui nanai tei ani swmaino kwrak khe tẃinaino,

⁵ang bórokno ani noksingo tei chokdeual bisingo nok naithok rwnai tei sajwk sajlani slái mung kaham rwnai; ang bórokno komor phlai ya tei mol brúm brúm tong phlainai bumung rwnai tei omo khibijak glak.”

⁶“Tei buini hani bororok Subraiyung bai gwdal phainairok, bono monna phainairok, Subraiyungni mungno hamjagwi bini seleng wngna bagwi sak gwdal phainairok, bebak sabat salno tẃinairok tei abono dera rw yarok, ani swmaino kwrak khe tẃinairok,

⁷omorokno ang ani hathái kwtharo tubunai tei ani surima nogo bórokno tongthok rw anw; bórokni sógwi yapharmani tei ratharwi yapharmarokno ani háyá saka-o yachakjaknai; tamni hwn khe, ani nok bebak bororokni surijakma nok hwnwi hwnjaknai.”

⁸Subraiyung Kaitor hai hwnwi sa-o, “Sabo Israilni basijakrokno thum kha, hai phano ang a thumjakrok bai baksa khe tei kubunrokno bini thani thumnai.”

⁹Hapharni bebak mal-matarok, o bolongni bebak mal-matarok phai di monok phai di.

¹⁰Bono monnairok bebak phula máng, bórok bebakno si ya gwja; bórok bebak sẃi bobarok, sẃngwi man ya gwja; bórok imang nugo, rokoui tongo, murumui muktrwi thángwi tongnano hamjago.

¹¹Sẃirok belai chákrak; bórok cháuibo ok pungjak ya. Mera mwrwknairokbo sinani rwng ya; bórok bebakno sak sakni lama tẃi him lai kha, khoroksa khoroksa bebakno sak sak mannani bagwi nai lai kha.

¹²Bórok bebakno hai hwnwi sa lai-o, “Phai di, chwng angur bwtwi nahar lai anw, chwng chuak nung laiwi phek lai anw. Tei tinini sal hai’-no khwna bo wng anw, abono aswk kotor wngnai su-ui pái glak.”