Read Kok Borok JISAIA 57 Bible Online

JISAIA 57 - Kok Borok bible

JISAIA 57

¹Borok sóirok komor bai-o tei khoroksa phano abono tẃiwi bwkha-o tẃinai kwrwi; khá berajak bororok tlangjak bai kha, phiya ba khoroksa phano sinai kwrwi kho; tamni hwn khe borok sói khe digi-sigini tlangjak bai kha.

²Bo khakchangma-o habwi-o; sói kubui-o himnairok khe bórokni thuyamo lengla-o.

³phiya ba norok kók diyari sanairokni aro tháng lai-o tei norok takjak mwtairokno khulum lai-o, norok lupcha bai sak phalnaijwkrokni bwsarok norok gana-o phai di.

⁴Norok sabono cheklek ba? Saboni bagwi norok khua lai-o kók sa lai? Norok ba sumsok khlainairokni bwsarok tei bandinairokni bosong ya diba?

⁵Norok uk buphang bwlwngo tei bebak bwlái khwrangjak buphang yaphango norokni muchungmani pas rohorwi tong kha; norokni bwsarokno holong kekhogo sabo rathar lai?

⁶Harungni holong milik sakarok nini banta; abórok’-no nini manthai; bórokni bagwi nwng nungmung lukhlaiwi yaphar kha tei bwthái-bwchlwirok yaphar kha, omorok bai ang khá kochomwi tongnai da?

⁷Nwng hathái saka-o tei kuchuk kuchugo nini thuyam bo kha tei ratharwi yapharna bagwi nwng kasaui tháng kha.

⁸Duglamni uklogo tei duglamni thongo nwng nini mukumu marino ton kha; tamni hwn khe nwng ano yakar kha tei nini thuyamno khugwi rw kha, nwng aswk jora kasa kha, nwng abono phuarwi rw kha tei bórok bai sakno bwswk khe phalnai hwnwi kók chap lai kha tei bórokni sak-lángano nuk kha.

⁹Nwng thok tẃiwi Molekni thani tháng kha tei nini thok motomno báng rw kha; nwng hakchal ha-o sakni tẃitunrokno rohor kha tei morke jora rohor kha.

¹⁰Nini lama kolokni bagwi uanajak kha, hai phano nwng, “Oro khatungma kwrwi” hwnwi sa li ya; tamo khe nwng phanni bagwi langma kwtal man kha, aboni bagwi nwng leng li ya.

¹¹Sabono nwng aswk sundru tei kirima chaui kók tatal sa, tei nwng ano muitu wng li ya tei ano khá-o uansuk li ya wng kha? ang jora kolokma siring siring khe tong kha hwnwi da nwng ano kiri li ya wng?

¹²Ang nini sói kubui khe tongmano tei tangmarokno sa anw, phiya ba bórok le nono chuba glak.

¹³Chubachuni bagwi nwng chirikhógwi kap phuru nini thumjak takjak mwtairok nono phiyók thung! Phiya ba nokbar abórokno kobon rwui tlang anw; hama rohor kaisa bai’-no abórok bebakno kobonwi tlang bainai; tamo khe ani thani katina bagwi bom phainairok ha mannai tei ani kwthar ha-o tongthai mannai.

¹⁴Tei omo hai hwnwi sajak anw, “Tisa di, tisa di, lama tiyar khlai di, ani bororokni lamani bebak kebengmungno nor di.”

¹⁵Tamo khe kuchuk tei bochlongo tongnaisa, mol brúm brúmno tong nai, bini bumung wng kha, Kwthar bo o kók sa-o: “Ang kuchugo tei kwthar tongthai-o tongo tei bwkha kwbai, koinene bororok bai bo tongo tei koinene bororokni pholano thangcha rwnani bagwi tei bwkha kwbairokni bwkhano thangcha rwnani bagwi sa-o.

¹⁶Tamni hwn khe ang uálai máng tong phlai glak, eba joli máng tong glak; tamni hwn ba phola ani aroni se nongkhoro tei ang se mwthangnai langmano snamo.

¹⁷Bini khámaima sumsokni bagwi se ang joli-o, ang bono swprak kha, ani mwkhang huiwi ton kha tei joli kha; tamo khe bini bwkhani muchung tẃi khe uklok kiphilwi tháng kha.”

¹⁸“Ang bini bebak lamarokno nuk kha, hai phano ang bono ham rwnai; ang bono tẃithernai tei bono khá kwchang rwnai tei bini kapsimang kabwi tongnairokno bo khakchangma rwnai.

¹⁹Hakchal tei samo kwchang kwchang hwnwi Subraiyung sa-o; tei ang bono ham rwui tisanai.

²⁰Phiya ba borok hamyarok khe twijlangni twi aphal hai; abo bathagwi tongwi man ya tei a twi-o harpek ka-o tei twi rumu wngo.

²¹Ani Kaitor sa-o, borok hamyarokni bagwi tong kwchang kwrwi.”