Read Kok Borok JISAIA 58 Bible Online

JISAIA 58 - Kok Borok bible

JISAIA 58

¹“Chirikhógwi sakhlai di, khorang ta kosor rw di! Totro pungma hai khe khorang kotor khlai di; ani bororokno bórokni tongmung cha yani kók, Jakobni bosongno bórokni sumsokrokno sakhlai di.

²Bórok sal brúm brúmno ano naituk lai-o, ani phrwngmungno srwngna muchungma hai nukjago. Norok bini raidarokno tẃiwi sói khe samung tangnai dopharok hai khe khlai-o. Norok bini thani bujsói nai-o, bórok Subraiyungni samo tongnano hamjago.

³‘Chwng tamni bagwi ok bukcha khe suri kha, norok abono nuk ya da? Chwng tamni sakno koinene khlai kha, norok abono saui manna nai ya?’ Nai di norokni ok bukcha khe Surimani salo norokni sak tongthokmano se nai-o tei bebak norokni samung tangnairokno sátogwi tongo.

⁴Nai di, norok uálaina bai bu lainani bagwi se tei yamusung súk lainani bagwi se ok bukcha tongo. Norok tabuk omo hai khe ok bukcha khe suri phano norokni khorang chuknoha-o khna hor glak.

⁵Omo hai ok bukcha surimungno da ang nai ba? Abo ba tamo duksarok burung khe klai tẃi khorok bomwi khulum tẃi da tei rí soroi boui thapla phul kheno da wng ba? Omono nwng ok bukcha tongo da hwn tei o salno Subraiyung ya de yachakno ba?

⁶“Omo ani chongma ok bukcha ya da: Cha ya samungo khajak tongmano yakarnani; horbakno khibinani, sátokjakrokno phiyógwi rohornani tei bebak horbakrokno swbai khibinani ya diba?

⁷Ok khuijakrokno nini chámung banta khe rwnani, nok-huk kwrwi bigrarokno nini nogo tongthai rwnani; abórok ya diba? Sago rí kwrwi nuk khe bórokno rí-chum rwnani tei nini bosongrokno nuk khe sak pharwi tong ya wngnani, abórok ya diba?

⁸Abo hai khlai khe aichukni pohor hai nini chati chwng anw, nini kwsarok daktino hamcha anw; tei nini sói kubui khe tongma nini swkang swkang khe thangnai tei Subraiyungni chẃngsacha nini uklokni mwrwknai wngnai.

⁹Aphuru nwng ring khe Subraiyung khna anw; nwng chubachuni bagwi chiri khók anw, hakhe bo uphilwi sa anw, ang oro se. “Tumungno nwng norokni bisingni horbakno rosaui na khe, yasi surwi kók sitra samani khibi khe,

¹⁰tei ok khuijak bororokno nini chá bantano chá rw khe tei digi-sigi nangjakrokno bwkha kochom rw khe, hakhe nini pohor mwnago chẃngnai tei mwkhang somma dibor jorani sal hai wngnai.

¹¹Tei Subraiyung thak yaui nono lama soui tẃinai tei kaham nangma manwi bai nono bwkha kochom rwnai, abo bai nini bekreng raknai; tei nwng twi kochomjak ha hai wngnai, twimuk gwnang twisa hai twi ran phlai ya hai wngnai.

¹²Nini bororokni kwcham tei báikhrupjakrokno snam phinai; nwng kwbángma bosongni kusung kusungni thonglano tisa phi anw; tei nwng kwbairokno snam phinai tei tongthaini lamarokno snamnaisa hwnwi ringjak anw.

¹³“Nwng sabat salno sak nang ya wngwi yakung uslu khe, ani lenglama salo sak muchung tẃi tong ya hwn khe, sabat salno tongthotok tei Subraiyungni kwthar salno bórom khlaijaknai sal hwn khe, sakni muchung tẃi tong ya, eba sakni tongthok nai ya hwn khe, haino kók nang ya sa lai ya hwn khe;

¹⁴hakhe nwng Subraiyungno tẃiwi tongthok di tei ang nono hani kuchuk kukni saka-o kasa rw anw; ang nono chuchu Jakobni manna tongmarokno norokno chá rwnai, hwnwi Subraiyungni búkhúk o kókno sa-o.”